Taasipane 4 - Ngudradreadrekadhane Ka Sisiu 魯凱語聖經

Kipakicapili ki zuku ki Kuhathe

¹ Ku Tamatama peaelaela ki Musi, Arungu

² (Singikaiya ki maretetese, ki dadaanane) kithingale ku umawmase ki zuku ki Kuhathe ka swa Lrivi,

³ la malra pacase patuelre kwini tara matulrulunga pakela ki tara malrimalenga ku caili, kulri dulru ikai ki Alrivilrivi ka balrawbau ki Tamatama kipuawngane ku sawvalai.

⁴ Kwini lalasu lrika amani ku kiapasavidhi marasikai sanaka ngwakai ki tinusaniangane ka lawbubulu.

⁵ Ku Tamatama peaelaela ki Musi, lulri musuburu kwini tasuladhane, ku Arungu si lalakeini lri mudaane ki Alrivilrivi ka balrawbau, si mwalra kwini yacucubungu ki Langiane ka makalrilau, si kabungu ki Langiane.

⁶ Kwini lalasu lri arakai ku makecenge ku mathariri ka lrangici kabungu, ala pasabelenge ku nisavidhane ku salesese ku makalrilau kabungu, ala pwa kwini sabulriane pangukakai.

⁷ Kwini lalasu lri malra ku vaeva ku salesese ku makalrilau pibelenge ki tapikaikaiyane ki pange ka cukwi, la pibelenge ku thalange, tapasukaiyane ka usara, tapasukaiyane ki saparalikilikane ka didilrungu si kisi makitu pikai belenge. Kwini cukwi ka tapikaiyana ku pange.

⁸ Kwini lalasu lri arakai ku vaeva ku duduli ka makalrilau kabungu kilakikai lamanemane, ala lri kabungu ku sivale ku makecenge mathariri ka lrangici, ala malra ku babulriane pwa pangukai.

⁹ Kwini lalasu lri arakai ku salesese ku makalrilau kabungu ki tapikaiyane ki tinaki, tinaki, tinubengeangelradhane ka kaciane, thathalange, si nipasaelane ku lawlau ki ulrive ka takaiyane.

¹⁰ Arakai ku makecenge mathariri ka lrangici cabu kikai lawbubulu, pwa ki tapangukaiyane bulri.

¹¹ Ku saka taingeane, kwini lalasu ala lri sapa ku vaeva ku salesese ku makalrilau pubelenge ki kingi ka tapatarumaramarane, ala lri arakai ku makecenge mathariri ka lrangici kabungu, ala lri malra ku babulriane pangukai.

¹² Arakaiya ku salesese ku makalrilau cabu kwini yakai ki Alrivilrivi ka taikaikaiyane ka latakaiyane, ala kabungu ku makecenge mathariri ka lrangici, pikai ki sabulriane.

¹³ Mwalra sakidri kwini abeaberane si thuvugu ki tapatarumaramarane, la arakai ku thilalatadhane ku makalrilau kabungu ki tapatarumaramarane,

¹⁴ malra kwini nipatupapalrane ki tapatarumaramarane ka lawbubulu, kwini palungu, kaili, kakadrau si thalange makitu pubelenge, ala malra ku makecenge mathariri ka lrangici, la malra ku babulriane pangukai.

¹⁵ Lulri musuburu kwini tasuladhane, ku zuku ki Kuhathe lri mukalava ki Arungu si lalalakeini malra si kabungunga kikai la nitusaniangane ka lawbubulu si la nipatupalrapalrane ka lawbubulu, ala lri bulri. Ku umawmase ki zuku ki Kuhathe lutuumane kai lri maka sucipau kikai la tinusaniange, amani lwiyasi pacai. Lulri patalula kai Alrivilrivi ka balrawbau, ku zuku ki Kuhathe lrika amani ku waangeale kilakikai lawbubulu.

¹⁶ Ku lalake ki barakalai ka Arungu ka Ilriazare lrika amani ku wakadrenge nguelre ki Alrivilrivi ka balrawbau, si tinaki, taliane, si Taleke ka lrisi, saniange ka lawlau si kwini saniange ka Alrivilrivi ka balrawbau ki Tamatama.

¹⁷ Ku Tamatama kawariva ki Musi si Arungu,

^18-19 “Madha pangudadedethe kikai la tinusaniange ki maretetese ki wa Kuhathe, amani lu kipapacai. Amani ku kaika ngibwalane ku miyaiya kikai ku kakudhane, ku Arungu si lalakeini lri mudaane ki Alrivilrivi ka balrawbau, si apavavala ku awngane ki tangeea, si pelaela liniane ku lrika abulriane lini luka manemane.

²⁰ Lwiyasi ku swa Kuhathe la mudaane ki Alrivilrivi ka balrawbau, la dredrele ku padulrudulru ki barakalai ku sabulriane ki tinusaniange, kwini lalasu lri pacai.”

Awngane ki zuku ki Geresune

²¹ Ku Tamatama wadrekase ki Musi,

²² singikaiya ki maretetese, ki dadaanane kithingale ku umawmase ki zuku ki Geresune ka swa Lrivi,

²³ la malra pacase patuelre kwini tara matulrulunga pakela ki tara malrimalenga ku caili, kulri dulru ikai ki Alrivilrivi ka balrawbau ki Tamatama kipuawngane ku sawvalai.

²⁴ Kwini lalasu lri kamani ku wabulri kikai lawbubulu:

²⁵ Ku talrugulrugane ki sacaebane ki latadre ki Alrivilrivi ka balrawbau, ku sakabungane ku makecenge mathariri ka lrangici, sapaidringane ki lrawlrawdru,

²⁶ kwini ngiathalringulu ki Alrivilrivi ka balrawbau si tapatarumaramarane kwini ki kalatadrane ku make si calrisi, sapaidringane ki lrawlrawdru ki tali latadre ki Alrivilrivi ka balrawbau, si sanaka nipatupalrapalrane ka lamanemane. Lrika amani lini ku wakadrenge sanaka macacapili kikai ki laawngane.

²⁷ Ku Musi si Arungu lri kadrenge drele ki swa Geresune lu marasikai kikai awngane, si bulru liniane kwini pakaungu ki Arungu si lalakeini pasalri liniane kwini lawbubulu.

²⁸ Kikai laawngane amani ku akicapilane ki maretetese ki wa Geresunane ikai ki Alrivilrivi ka balrawbau. Kwini lalasu lri kai ki tasangilukane ki barakalai ka Ithamare ka lalake ki Arungu si marasikai kikai awngane.

Awngane ki zuku ki Mirari

²⁹ Ku Tamatama wadrekase ki Musi, singikaiya ki maretetese, ki dadaanane kithingale ku umawmase ki zuku ki Mirari ka swa Lrivi,

³⁰ la malra pacase patuelre kwini tara matulrulunga pakela ki tara malrimalenga ku caili, kulri dulru ikai ki Alrivilrivi ka balrawbau ki Twaumase kipuawngane ku sawvalai.

³¹ Kwini lalasu lrika amani ku marasiakai angeale bulri kwini bulri, sabarebare, ulrudru, drapale ki Alrivilrivi ka balrawbau,

³² si kwini ngiathalringulu ki Alrivilrivi ka balrawbau si kalatadrane ku ulrudru, bulri, drapale, taparairaisane ka ulrudru, si sanaka nipatupalrapalrane ku lawbubulu. Ku tangeea lri bulri ku pia kwini niyane.

³³ Kikai amani ku amarasikaiyane ki maretetese ki wa Mirariane ikai ki Alrivilrivi ka balrawbau. Kwini lalasu lri ikai ki tasangilukane ki barakalai ka Ithamare ka lalake ki Arungu pangimia kikai awngane.

Takipacasane ki umawmase ki swa Lrivi

^34-48 Ku Musi, Arungu si kiacapili ki mapapangale pasusu ku drekase ki Tamatama pakipacase ku umawmase ki taitulru ka zuku ki Lrivi—Kuhathe, Geresune, Mirari. Kwini lalasu singiakai ki maretetese, dadaanane, malra kwini ki twalai ki tara matulrulunga pakela ki tara malrimalenga ku caili, ku wadulru kipuawngane ki Alrivilrivi ka balrawbau ki Tamatama ku sawvalai makitu kipacase. Zuku ki Kuhathe 2,750 Zuku ki Geresune 2,630 Zuku ki Mirari 3,200 Lu paelrelreanenga 8,580

⁴⁹ Singiakai ku tadrekasane ki Tamatama ki Musi, ku tangeea makitwa kipacasenga; pasusu ku drekase ki Tamatama ki Musi, ku laumawmase makitwa ikai ku kidrulru lini ku awngane, ku kicapili ki amarasikaiyane, ku marasikai ki angealane bulri.