Taasipane 32 - Ngudradreadrekadhane Ka Sisiu 魯凱語聖經

Lazuku ka yakai tali talrawane kadravane Yuredange

¹ Kwini zuku ki Riwbingi si Gade makalra ku lwange si kiu lini. La drele kwini talikai Yazere si Gileade la sudalepe ka tapagwagwane ki nilapulapwane,

² la katwase kikawriva ki Musi si Ilriazare si ki tarasangililuku ki mapapangale, iya kai,

^3-4 “Ku paralubu ku Tamatama ki swa Iseraylri la malra kikai lakadaengane, amani kai Atarute, Dibune, Yazere, Nimera, Hesebunge, Ilriale, Sibame, Nibu si Biunge, amani ku tasudalepane pikai tutapagwagwane, makalra kai lwange si kiu nai.

⁵ Ala baadhanga naiane kai talikaiyane kaika kadaengane ku amucungulane nai, nai kai katwasenga talubalre kadravane Yuredange si ikai kavai.”

⁶ Ku Musi la tubalre, “Laibekace numi asurunga ikai kai, la palraainginga ki sakacekele numi ka swa Iseraylri katwase kikaruburu?

⁷ Anu maka lreeme pakasulri ki sakacekele numi ka swa Iseraylri, si kai talubalrenga kadravane Yuredange, kai mudaane kwini ki patarumara ki Tamatama numiane ka kadaengane?

⁸ Sa pakatwasaku ki cucungulane numi twalai Kadise Barania mwa lrilriu kavai kadaengane, amia kai ku taiyane numi.

⁹ Kwini lalasu sa darurunga vaalru Isekule, sa drelenga kwini kadaengane, ai sa siwlriwlri, pakasulri ki mapapangale, kai mubangalre mudaane kwini ki patarumara ki Tamatama ka kadaengane.

¹⁰ Ikai kwini ki vai, ku Tamatama la kaelaela, si kiketekete iya kai,

¹¹ ‘Ikai liniane kwidra tara mapusalenga ku cailini papubebelenge, ku twalai Izipiti ku umawmase, kadrwa ku natangeanga kulri maka mudaane kwini pukawnungali baai ki Aberahame, Isake, Yakubu ka kadaengane, ngwalai sa kai maka tukucingalre kilalra nakwane.’

¹² Kikai vaga amani ki sanaka aneeane, kathane ku swa Kenizi ka lalake ki Yepuni ka Kalebe si lalake ki Nunge ka Yesua kai lri kipaelre, kwini lalasu thadalrane ku tukucingalrane lini nakwane ka Tamatama.

¹³ Ku Tamatama la kaelaela ki mapapangale, la paacaicali kwini ki lalasu ikai calragulragu taramasupatele ka caili, pakela kwini ki yakai saka zidai kwini ku umawmase sa makitu pacainga makanaelre.

¹⁴ Kikai la kamaninga numi ku mwa balrithi ki cucungulane numi, ka amaninga ku pasalriu ka zidai ka umawmase, lri peelanga pakalisi ki Tamatama ki swa Iseraylri.

¹⁵ Kikai, kunumi ka swa Riwbingi si swa Gade ka zuku la kai numi mubangalre tupapalra iniane, lri peelanga cilri ki swa Iseraylri pikai calragulragu, kunumi lalri siamece numi ku capilane ku takipakamudane lini.”

¹⁶ Kwini lalasu la arwa deethe mucucubungu ki Musi, iya kai, “Ala, paswalana palraingi naiane tutakivane, pasikaiyana ki taelrelre si lalalake nai alradre ki cekele.

¹⁷ Ala nai ngiragelane ku atupalrane nai ki sakacekele nai ka swa Iseraylri kikaruburu, aswala mucekele, pakela ku tasutelradhane kapapedrenge ikai ki kadaengane lini. Lu ngimia kai, kai lataelrelre si lalake nai lri mudringadriingai ikai ki cekele, si kai ki vangavange ki drumane ka umawmase.

¹⁸ Lri pakeela nai ku takapapedrengane ki swa Iseraylri ikai ki takidrulrane lini ki kadaengane, ala lri kainganai nai siwlri mwa ki tavanane nai.

¹⁹ Kai nai lri malranga ku talikai kai tali sapakalriwgane ku kadaengane, kikai tarwamaranga nai kai tali talrawane kadravane Yuredange kai lrika cungulu nai.”

²⁰ Ku Musi la tubalre, “Lwiyasi tengane ka lrika pangiamia numi kikai, ala ngiragelana icucubungu ki Tamatama la mwa kikaruburu!

²¹ Kwini lakwapingi numi lri makitu talubalre kadravane Yuredange; lri pasusu ki la drekase ki Tamatama si mwa kikaruburu liniane,

²² drikisi kwini ki kadaengane. Ala lri maka siwlringa numi, asi lwiyane kwini pangiamianga numi kwini capilane numi ki Tamatama si sakacekele numi ka swa Iseraylri. Ku Tamatama lri tuvaganga kwini tali talrawane kadravane Yuredange ku kadaengane ka abaadhane numiane.

²³ Lwiyasi la kai numi pangimia kikai kiketekete numi, lri pakipapawlringavaku numiane, pasalriunga numi ki Tamatama; lri ngwalai numi ki pasalrivane numi si kipathavungu, lutuumane kai lri maka mubere.

²⁴ Kikai kunumi lu mwa pasikai ki taelrelre si lalalake numi tucekela si la taaciladhane, la pasikai ki lakiu ravadre tutakivane. Madha karimurimuru tara pangimia kikai kiketekete numi kai vaga numi!”

²⁵ Kwini zuku ki Riwbingi si Gade la iya kai, “Lri tara pangimia nai kai vagasu.

²⁶ Kai taelrelre si lalake, lalwange, lakiu nai lri asusuru ikai ki lacekele Gileade.

²⁷ Ai lri pasusu nai ku drekase ki Tamatama si ngiragelane katwase kikaruburu, lri talubalre nai kadravane Yuredange mwa kikaruburu, mia kwini ki takawrivanesu.”

²⁸ Ku Musi la cunu ki Ilriazare, Yesua si drumane ka tarasangililuku ki swa Iseraylri iya kai,

²⁹ “Lwiyasi talubalrenga kadravane Yuredange kwini zuku ki Riwbingi si Gade, pasusu ku drekase ki Tamatama kikaruburu, lwiyasi la ngwalai ku taparalubane numiane kikaruburu si malra numi kavai kadaengane, lri baai numi liniane kavai kadaengane tali Gileade, ka lrika cungulunga lini.

³⁰ Alaiyasi la kai talubalre kadravane Yuredange tupalra numiane kikaruburu, lrika thadalrane numiane, ikai Kanange malra kwini taingeane ka cungulu lini.”

³¹ Ku zuku ki Gade si Riwbingi la tubalre, “Lri tara pasusu nai ku drekase ki Tamatama katwase pangimia.

³² Lri singikai nai ku tadrekasaneini talubalre kadravane Yuredange, si mudaane Kanange kikaruburu, ku lrika amaka malrane nai ikai tali talrawane kadravane Yuredange kai kadaengane si lrika cungulunga nai.”

³³ Ala kirimu ku Musi malra kwini kadaengane ki talialalai ki swa Amuri ka Sihunge si talialalai ki swa Basane ka Uge si kwini ngiathalringulu ki cekele tudrulru ki zuku ki Gade si Riwbingi si pararamau ka zuku ki Manase.

³⁴ Ku zuku ki Gade la tupela tucekele kwini lacekele ka Dibune, Atarute, Arure,

³⁵ Atarute Supane, Yazere, Yugebiha,

³⁶ Bithe Nimera, Bithe Harane.

³⁷ Ku zuku ki Riwbingi twapela tucekele ka Hesebunge, Ilriale, Kiriathaime,

³⁸ Nibu, Baale Miune (Kikai nagane nipelanenga), si Sibema. Twapela sunagane kwini ki lacekele.

³⁹ Kwini zuku ki Makire ka lalake ki Manase wadrikisi kwini cekele Gileade, si ravasenga kwini ki cekele, pawalrakau kwini ki yakai kwini ka swa Amuri.

⁴⁰ Ku Musi la baainga kwini Gileade ki swa Makire; la ikainga kwini.

⁴¹ Kwini zuku ki Manase ka Yaire la drikisi ku taipiane ku cekele, la sunagane kwini ki lacekele pasi “Swa Yaire”.

⁴² Ku Nubahe la drikisi kavai Kenathe si ngiathalringulu ka lacekele, la arakai ku naganeini tunagane kwini ki lacekele pasi “Nuba”.