Taasipane 31 - Ngudradreadrekadhane Ka Sisiu 魯凱語聖經

Kiakaruburu ki swa Midiange

¹ Ku Tamatama amia kai ki Musi,

² “Lri ngwalaisu ku tatavuvulrucane ki swa Midiange ki swa Iseraylri si pathavungu liniane; lu tulrepengengasu kikai ala lri katwasesu kidaili kawmasane.”

³ Ku Musi la kawriva ki mapapangale, “Padulrwa ku akikaruburane numi, si katwase kikaruburu ki swa Midiange, la pasikai ki Tamatama bilri ki badha.

⁴ Ku lazuku ki swa Iseraylri lri pata kudrukuudrulu ku umawmase kulri mwa kikaruburu.”

⁵ Kwini lazuku la pilri pata kudrukuudrulu ku umawmase, ku kiapaelre kikaruburu ku umawmase ta 12,000.

⁶ Ku Musi la paatamatama liniane kwini ki lalake ki barakalai ka Ilriazare ka Pinehase; ku Pinehase la iluku ku takaiyane ki Alrivilrivi ka taikaikaiyane si sapathingalane ka rapa ka lawngu.

⁷ Kwini lalasu pasusu ku drekase ki Tamatama ki Musi katwase kikaruburu ki swa Midiange, la papacai demedeme kwini ki lasawvalai lini,

⁸ paelre kwini ki tailrima ka talialalai ki swa Midiange ka Ivi, Rekeme, Zure, Hure Riba. Kwini lalasu la mialri papacai ki lalake ki Biure ka Balame.

⁹ Ku swa Iseraylri waravase ki laababai si lavavalake ki swa Midiange, la ribici si iluku ku lalwange, lakiu lini, la ravase demedeme ku la takuciacingalre ku lamanemane lini,

¹⁰ la lama demedeme kwini ki cacekele si takwapingane lini.

¹¹ Kwini lalasu la malranga iluku kwini ravase lini, patala umawmase si nilapulapwane iluku demedeme,

¹² wa iluku liniane si pikai balrealreanane Yeriku kwini babiabila kadravane Yuredange ka dratane Muabe ki tasulasuladhane, la baai ki Musi, Ilriazare, si mapapangale ki swa Iseraylri.

Siaulri mubalriu ku lakwapingi

¹³ Ku Musi, Ilriazare si la drumane ka kiacapili la makitu mulatadre ki tasulasuladhane si katwase kidredresenge ki lakwapingi.

¹⁴ Ku Musi la kalisi kwini ki singi takikaruburane ka lakiacapili si tarapadrekadrekase ka kwapingi,

¹⁵ la kivaga liniane, “Anu papanianiake kai ki laababai?

¹⁶ Thingala, amani kikai laababai ka kialalra ku vaga ki Balame, ikai kavai Piure lrilrigili ki laumawmase si baebalre ki Tamatama, la kipadradresenge ki swalrubu ku kawkawlu ki Tamatama.

¹⁷ Kikai asasane, kunumi pwa papacai demedeme ki lavavalake ka sawvalai si kwini taelrenga ki sawvalai ka ababai,

¹⁸ ai kai lri katumane ngipapasikai pasuru kwini ki laababai si kaiyana marudrange ka tawvailekete.

¹⁹ Ikai numiane ku papacai ki umawmase, ku wa sulrape ki kinawmasane ki wapacai, lri asuru ikai latadre ki tasulasuladhane makapitulu. Ikai ki samakatulrulu si samakapitulu, lri ngibabula numi si kwini ravase numi kwini laababai,

²⁰ la mialri bula kwini sanaka makalrilau, si kwini niarakaiyane ka lrangici, ubale ki kakiuane si angatu ka lawbubulu patuelre.”

²¹ Ku barakalai ka Ilriazare kawriva kwini ki singi takikaruburane ka laumawmase iya kai, “Ku baai ki Tamatama ki Musi ku kakudhane miyaiya kai:

^22-23 Kwini kaika amaka lamane ka lawbubulu, kai lakingi, gingi, lriwlu, adreme, si, cingi, lri ngukai ki apwi pakabula, ala arakai ku acilai sinau bula; kwini drumanenga arakaiya ku acilai pakabula.

²⁴ Luka samakapitulu, lri tara ngisasinau numi kwini laimai numi, lu pia numi kikai lri kitu mabula numi, si dulru mudaane ki tasulasuladhane.”

Mavalavala ku niravasane

²⁵ Ku Tamatama kawariva ki Musi,

²⁶ “Kusu si Ilriazare, si drumane ka kiacapili malra kwini niravasane, paelre kwini ki laumawmase si lanilapulapwane nguelre asipi patuelre,

²⁷ ala malra paudrusa pavala, ku pararamau baadha ki lakwapingi, ku pararamau baadha ki drumane ki mapapangale.

²⁸ La patwaladhana kwini ki talikaiyane ki kwapingi ka apararamau suru ku vaeva ki 500 tusapatarumarane ki Tamatama ka lapadulru, amani kwidra luka ta 500 ku niravasane lri suru ku tangea ku umawmase; lwange, ruba, nikiubawbalane ka kiu, kakiuane mialri maramaramau patuelre.

²⁹ La malra kilakikai si baai ki barakalai ka Ilriazare tusapatarumarane ki Tamatama ka mwakalrivili ka lapadulru.

³⁰ La patwaladha kwini ki pararamau ka mapapangalane, adravane ka niravasane ka umawmase, lwange, ruba, nikiubawbalane, kakiuane, malra ku taingeane ki malrimale si baai ki taramarasikaikai ki Alrivilrivi ka balrawbau ki Tamatama ka swa Lrivi ka umawmase.”

³¹ Ku Musi si Ilriazare pangimiya ku tadrekasane ki Tamatama piya.

^32-35 Kaika kathane ku suru ki lakwapingi ku lawbubulu, kwini ravase lini kwini lamanemane amani kai: Ku Kiu 675,000, lwange 72,000, ruba 61,000, tawvailekete 32,000.

^36-40 Ku malra ki kikaruburu ka lakwapingi ku apararamau yai: Ku kiu 337,500, ki kwini 675 yai apatarumarane ki Tamatama ka padulru; ku lwange 36,000, kwini 72 yai apatarumarane ki Tamatama ka padulru; ku ruba 30,500, kwini 61 yai apatarumarane ki Tamatama ka padulru; ku tawvailekete ta 16,000, ku ta 32 lri ka Tamatamane.

⁴¹ Ku Musi pasusu ku tadrekasane ki Tamatama malra kwini padulru si baai ki Ilriazare tusapatarumarane ki Tamatama ka mwakalrivili ka padulru.

^42-46 Ku malra ki mapapangale ku apararamau mararaamau ku malra ki lakwapingi; ku kiu 337,500, lwange 36,000, ruba 30,500, tawvailekete ta 16,000.

⁴⁷ Ku Musi patwalai kai ki niravasane, paelre ki umawmase si lanilapulapwane, wamalra ku vaeva ki malrimale, singiakai ku drekase ki Tamatama si baai ki taramarasikaikai ki Alrivilrivi ka balrawbau ki Tamatama ka swa Lrivi ka umawmase.

⁴⁸ Ku amani ku wasangiluku ki kwapingi ka lakiacapili wamwa kikawriva ki Musi,

⁴⁹ si iya kai, “Maka waasipinga nai ki lakwapingi nai, kadrwa ku asakivalane ku natangeanga.

⁵⁰ Lakamani wamalra nai ku ravase ki tangeea ku sangiragelanane ka kingi, kalathe, kalathe ki tabatirikane, tara, lridingi si sisilu, iluku si patarumara ki Tamatama, tusabalrithane ki niake nai, sidrama ku apalakebane naiane ki Tamatama.”

⁵¹ Ku Musi si Ilriazare la tarumara kikai lakingi, yadrepele ka la tinukucingalrane ka sangirageragelanane.

⁵² Ku patarumara kwini ki lakiacapili ki kwapingi ku telregane ikai ku 200 ka kukingi.

⁵³ Kwini langukwapiapingi la makitu ngipapikaai ku la malra lini.

⁵⁴ Ku Musi si Ilriazare wamalra iluku kilakikai kingi mwa ki Alrivilrivi ka balrawbau, si kitubi ki Tamatama palakebe ki swa Iseraylri.