Taasipane 30 - Ngudradreadrekadhane Ka Sisiu 魯凱語聖經

Kakudhane ki ngiabulru

¹ Kai lebe peaelaela ku Musi ki lakiacapili ki lazuku ki swa Iseraylri.

² Yakai ku umawmase ku papia ki Tamatama ngiabulru, ku kiaketekete kitepese, madha pulibalibake, lri tara pasusu ku taiyaneini si pangimia.

³ Ku tawvailekete lu ikaiyana ki tamaini yai, lwiyasi ngiabulru papia ki Tamatama ku kitepese,

⁴ kathane lu kilalra ku tamaini si kai palraingi, kwini alisu lri tara pasusu ku tangiabulrwaneini ku palraingini kitepese.

⁵ Lwiyasi la kilalra ku tamaini la kai palraingi iniane pangimia ku ngiabulruini ku takitepesaneini, kwini alisu kai lri pasusunga; ku Tamatama lri pacepe iniane, asi lwiyane ku tamaini kai palraingi iniane pasusu.

⁶ Lwiyasi kwini kaina marudrange ka ababai lu ngiabulru, adravane ka kidremedremeini ka kaika kidremedremeini, ku pwakawnu ku apangimiane, sakabilrilanenga ala karudrange,

⁷ kathane lu kilalra kwini tawaneini la kai palraingi, kwini alisu lri tara pasusu kwini ki ngiabulruini ku palraingingaini kitepese.

⁸ Lwiyasi kwini tawaneini la kilalra si kai palraingi iniane pangimia ku ngiabulruini si kitepeseini, kwini alisu kai lri pasusunga. Ku Tamatama lri pacepe iniane.

⁹ Ku walibakane si makakatwase ki tawaneini ku ababai, kwini ngiabulruini, si palraingini kitepese, lri tara pasusu.

¹⁰ Lwiyasi kwidra marudrangenga ku ababai la ngiabulru ku palrainginga kitepese,

¹¹ kathane lu kilalra kwini tawaneini si la kai palraingi, kwini alisu lri tara pasusu ku tangiabulrwaneini ku tapalrainganeini kitepese.

¹² Lwiyasi kwini tawaneini la kilalra si kai palraingi iniane pangimia ku ngiabulruini ku kitepeseini, kwini alisu kai lri pasusunga. Ku Tamatama lri pacepe iniane, asi lwiyane taelrelreini ka kai palraingi iniane pasusu.

¹³ Ku tawaneini yakai ku kindri thingale ku tangimiane ku wasuburu ku ngiabulruini si palraingingaini kitepese.

¹⁴ Ai, lwiyasi ku tawane ki alisu sa ivaivai kilalra iniane sa ngiabulru la kai pathingalane ka kai palraingi, kwini alisu lri tara pasusu ku tangiabulrwaneini ku tapalrainganeini kitepese. Ku tawaneini sa ivaivai kilalra ku tangiabulrwaneini la kai kirimu kai palraingi, wathingalenga kwini tangiabulrwaneini.

¹⁵ Lukabilrilinga, lwiyasi kwini tawane ki alisu la suburu kwini ningiabulrwane, kwini tawane ki alisu lri tara siamece ku kaika tapangimiane ku ngiabulru ki alisu.

¹⁶ Kikai yai Tamatama ka wabaai ki Musi tukakudhane ki ngiabulru si kiaketekete pangukai kudra ki kaiyana marudrange si ikaiyana ki tamaini ka ababai si kudra marudrangenga ka ababai.