Taasipane 3 - Ngudradreadrekadhane Ka Sisiu 魯凱語聖經

Lalalake ki Arungu

¹ Ku Tamatama sa ikai lregelrege Sinai kawrivariva ki Musi si Arungu, ku mwabaibalrithi ki Musi si Arungu amani kikai yalebe kai laumawmase:

² Ku Arungu tasupate ku lalake: Ku takataakanga Nadabe, ku lagiagi iniane amani kai Abihu, Ilriazare, Ithamare.

³ Kwini lalasu kia pulawlau pacegecege abarakalai.

⁴ Ai ku Nadabe si Abihu sa ikai calragulragu ka Sinai papia ki Tamatama patarumara ku languapwapwi la kipapacai. Kwi lalasu kadrwa ku lalake lini, lakamani kwidra abarakalai ki Ilriazare si Ithamare sa panianianiakeana ku Arungu.

Ku swa Lrivi kiasikawlu abarakalai

⁵ Ku Tamatama kawariva ki Musi iya kai,

⁶ “Kusu mailuka ki zuku ki Lrivi kela, si sikawlu liniane asasiakawlu ki barakalai ka Arungu.

⁷ Lri kamani lini ku tara marasikai ku awngane ki Alrivilrivi ka balrawbau, pasikai ki barakalai si mapapangale kipuawngane,

⁸ Lri drangalru ki lawbubulu ki Alrivilrivi ka balrawbau, pasikai ki drumane ki swa Iseraylri kipuawngane.

⁹ Ku awngane ki Lrivi kathane ku amarasikaiyane papia ki Arungu si lalalakeini.

¹⁰ Kusu sikawla ki Arungu si lalalakeini pakicapili ku awngane ki barakalai. Sanaka aneanenga ku umawmase ku twalisi pasalriu ki kikai, lri tara kipapacai.”

¹¹ Ku Tamatama kawariva ki Musi iya kai,

^12-13 “Kikainga lrika nakwanenga ki swa Lrivi. Saka tapapacadhaneli ki aswalalanga kitulalake ki swa Izipiti, wamalra kwini ki takataakanga si aswalaalanga kitulalake ka nilapulapwane ki dadadaanane ki swa Iseraylri, si patukudha tusaniange patuelre, ka nakwanenga. Ai, kikai kai swa Lrivi lri ngitalikaiyane ki tasakaiyane ki takatakanga ki swa Iseraylri; kwini lalasu lrika nakwanenga. Tamatamaku.”

Takipacasane ki umawmase ki swa Lrivi

¹⁴ Ku Tamatama ikai calragulragu ka Sinai wadrekase ki Musi,

¹⁵ singikaiya ki maretetese ki dadaanane si pacase ki swa Lrivi, la malra kwini kiatulalakenga tara dramare papubebelenge ku sawvalai pacase patuelre.

¹⁶ Ku Musi la pangimia kwini.

^17-20 Tatulru ku lalake ki Lrivi: Geresune, Kuhathe, Mirari; kwini amani ku cucungulane ki zuku ki Geresune, zuku ki Kuhathe, zuku ki Mirari. Ku Geresune tadrusa ku lalake: Lribini si Simi. Ta supate ku lalake ki Kuhathe: Amerame, Izehare, Hiburungu si Uzile. Tadrusa ku lalake ki Mirari: Maheli si Muse. Amani lini ku cucungulane ki lamaretetese ka twalai ki zuku ki Lrivi.

²¹ Ku wa Geresunane yakai kai taidrusa ka wacekecekele ka Lribini si Simi.

²² Ku taradramarenga papubebelenge ku takitulalakane ku sawvalai ku kiapacase lu paelrelreanenga ku umawmase ta 7,500.

²³ Kikai maretetese lri italikai sapakalriwgu, ilrilrikudru ki Alrivilrivi ka balrawbau cegecege ku tasuladhane lini.

²⁴ Ku lalake ki Laele ka Ilriasape amani ku tamatama kai ki zuku.

²⁵ Lrika amani lini ku wakadrenge ki Alrivilrivi ka balrawbau, kwini ki adringi ka sapasabelengane ki Alrivilrivi ka balrawbau si sakabungane, sapaidringane ka make,

²⁶ ku make ku ngiathalringulu ki Alrivilrivi ka balrawbau si tapatarumaramarane, sapaidringane ki lrawlrawdru ki kalatadrane ki Alrivilrivi ka balrawbau. Lrika amani lini ku kiacapili sanaka macacapili ki ngwakai kai ki awngane.

²⁷ Ku maretetese ki Kuhathe yakai kai wacekecekele ki Amerame, Izehare, Hiburungu si Uzile.

²⁸ Ku taradramarenga papubebelenge ku takitulalakane ku sawvalai ku kiapacase lu paelrelreane ta 8.600.

²⁹ Kikai lamaretetese lri italikai lrawdru cegecege ku tasuladhane.

³⁰ Ku lalake ki Uzile ka Ilrizapane amani ku tamatama kikai ki maretetese.

³¹ Lri kamani lini ku arathungu kadrenge ki Langiane, tapikaikaiyane ki pange ka cukwi, tapikaikaiyane ki tinaki, tapatarumaramarane, la sarakaikaiyane ki barakalai ikai Alrivilrivi ka taikaikaiyane, si sapaidringane ki lrawlrawdru ki Alrivilriviilrivinga ka taikaikaiyane. Lri kamani lini ku kiacapili sanaka ngwakai kikai ki laawngane.

³² Ku tamatama ki swa Lrivi amani ku lalake ki Arungu ka Ilriazare; lri kicapili kwini ki sanaka kiapuawawngane marasikai kai ki Alrivilrivi ka taikaikaiyane.

³³ Ku maretetese ki Mirari yakai kai wacekecekele ki tai Maheli si tai Muse.

³⁴ Ku taradramarenga ku takitulalakane ku sawvalai papubebelenge ku kiapacase lu paelrelreane ta 6,200.

³⁵ Kikai zuku lri italikai dradha ki Alrivilrivi ka balrawbau cegecege ku tasuladhane. Ku lalake ki Abihaile ka Zurile amani ku tamatama kikai ki maretetese.

³⁶ Kwini lalasu kiapamarasikai kai ki labulri, sabarebare, ulrudru, drapale ki Alrivilrivi ka balrawbau si sanaka mamamwa ku ngwakai kai ku satumatumane. Kwini lalasu lri marasikai patuelre ku mamamwa kilakikai ki awngane.

³⁷ La lri kamani lini ku lri marasikaikai katheme kwini yatali latadre kwini ulrudru, drapale, taparairaisane ka ulrudru si calrisi.

³⁸ Ku Musi, Arungu si lalake ki Arungu lri sakai tali talrawane, icucubungu ki Alrivilrivi ka balrawbau cegecege ku tasuladhane. Lri ka amani lini ku lri pasikai ki swa Iseraylri si marasikai ku awngane ikai daane ki Alrivilrivi ka taikaikaiyane. Sanaka aneane ku waranau pasalriu kikai ki awngane, lri tara kipapaacai.

³⁹ Ku Musi, Arungu pasusu ku drekase ki Tamatama, singikai ki maretetese pacase kwini ki taradramarenga ku takitulalakane papubebelenge ku sawvalai ki swa Lrivi, lu paelrelreane ta 22,000.

Ku swa Lrivi ngiatalingikaiyane ki latinutakane

^40-41 Ku Tamatama kawariva ki Musi, “Kwini sanaka tinutakane ki swa Iseraylri lrika nakwane patuelre, la kamani ku singikaiya ki tangeea ku taradramarenga ku takitulalakane papubebelenge ku tinutakane ki swa Iseraylri. Ai, peaelaelaku kai swa Lrivi ka umawmase lrika amani ku ngiatalingikaiyane liniane ka lrika nakwane! Tamatamaku. Lai lri mialriaku pelaela kwini lwange ki swa Lrivi lri ngitalingikaiyane ki sanaka aswalaalanga kitulalake ka lwange.”

^42-43 Ku Musi pasusu ku tadrekasane, la malra kwini ki taradramarenga ku takitulalakane ku sawvalai papubebelenge ka tinutakane makitu pacase, lu paelrelreane ta 22,273.

⁴⁴ Ku Tamatama kawariva ki Musi,

⁴⁵ “Kikai asasane kusu malra kwini ki swa Lrivi patarumara nakwane, lani ngitalikaiyane ki takatakanga ki swa Iseraylri, la mialri malra kwini lwange ki swa Lrivi patarumara nakwane, lani ngitalingikaiyane ki aswalalanga kitulalake ka lwange.

⁴⁶ Ngwalai saka makakalra ku ta 273 ku tinwapane ki swa Iseraylri ki tinutakane ki swa Lrivi, lri tara langaisu sawlri kikai la tinutakane.

⁴⁷ Singikai ku takelretane ki Alrivilrivi ka taikaikaiyane, ku tangeea lri pakalrima ku gingi ka paisu.

⁴⁸ Kusu malra kikai sabalrithane ka paisu si baai ki Arungu si lalalakeini.”

⁴⁹ Ku Musi pasusu ku tadrekasane ki Tamatama,

⁵⁰ si malra ku 1,365 ku gingi ka sabalrithane ka paisu satedre

⁵¹ baai ki Arungu si lalalakeini.