Taasipane 28 - Ngudradreadrekadhane Ka Sisiu 魯凱語聖經

Sapatarumarane kivaivai

¹ Ku Tamatama wadrekase ki Musi,

² pelaela ki swa Iseraylri lani ikai ki takelretane ki zikange kivaivai patarumara ki Twaumase ku taleke, amani kwidra kiragaini ka sangwalreme ka Apwi ka lrisi.

³ Kikai lebenga amani ku lrika atara patarumarane ki Tamatama ka Apwi ka lrisi, ki vaivai ku Lama ka lrisi lri patarumara ku drusa ku taracailinga, kadrwa ku takatwatumanane ka lrulai ka balase ka kiu,

⁴ luka mialrealre patarumara ku vaeva, luka miauawbu patarumara ku vaeva,

⁵ kwini ki vaeva pakaredela patarumara ku vaeva ka kukingi ka lrevege ka milrikinku si vaeva ka kunsenge ku lawlau ki ulrive ka Taleke ka lrisi.

⁶ Kikai apivaivaiyane ka Lama ka lrisi, ku aswalalanga yai yakai Sinai lregelrege patarumara. Kwidra nipatarumarane amani ku kiragai ki Tamatama ka sangwalreme ka Apwi ka lrisi.

⁷ Ala kikwini nipakaredelane ki aswalala ka kiu patarumara ka Paralikiliki ka lrisi, lri malrasu ku vaeva ka kunsenge ku bava si ubu pikai ki belenge ki tatulrisilrisiane.

⁸ Luka miauawbu lu patarumara ku sakadrusa ku kiu, lrika thadalrane ku tapiane patarumara ki mialrealre, lri pakaredele ki Taleke si Paralikiliki ka lrisi patarumara, tusangwalreme ka Apwi ka lrisi, lani kiragai ku Tamatama.

Apatarumarane tulrisi ikai ki Taisadrasadrane ka vai

⁹ Ikai ki Taisadrasadrane ka vai, patarumara pakadrusa ku taracailinga, ku kadrwa ku takatwatumanane ku lrulai ka balase ka kiu, drusa ka kukingi ku malaelamenge ka milrikinku ka nipaelreane ki lawlau ki ulrive ka Taleke ka lrisi si Lama ka lrisi, si Paralikiliki ka lrisi.

¹⁰ Kaika kathane kwini apivaivaiyane ka Lama ka lrisi si Paralikiliki ka lrisi, sanaka Taisadrasadrane ka vai lri patarumara kikai taisadrasadrane ka Lama ka lrisi.

Sapatarumarane tulrisi ki aswalaalanga ka vai

¹¹ Ki dramadraamare ki aswalaalanga ki vai lri patarumara ku Lama ka lrisi baai ki Tamatama, drusa ku lrulai ka sawvalai ka lwange, vaeva ka balase ka nikiubawbalane ka kiu, pitu ku taracailinga ku lrulai ka balase ka kiu kadrwa ku takatwatumanane patuelre.

¹² Lri arakai ku Taleke ka lrisi apamamwa ki Lama ka lrisi, ku vaeva ku sawvalai ka lwange lri pamamwa ku tulru ka kukingi ku nilreveganenga apaelre ku lawlau ki ulrive si malaelamenge ka milrikinku si patarumara; ku vaeva ku balase ka nikiubawbalane ka kiu lri apamamwa ki drusa ka kukingi ka niapaelreane ku lawlau ki ulrive si malaelamenge ka milrikinku si pakaredele patarumara;

¹³ ku vaeva ka lrulai ka balase ka kiu lri apamamwa ki vaeva ka kukingi ka niapaelreanenga ki lawlau ki ulrive si malaelamenge ka milrikinku la patarumara. Lri lama patarumara kikai sangwalreme ka Lama ka lrisi, lai lri kiragai ku Tamatama.

¹⁴ Lai lri arakai ku Paralikiliki ka lrisi apamamwa ki Lama ka lrisi; ku vaeva ka lrulai ka sawvalai ka lwange lri apamamwa ki drusa ka kunsenge ku bava; ku vaeva ku balase ka nikiubawbalane ka kiu lri apamamwa ki vaeva si apararamau ka kunsenge ku bava; ku vaeva ku lrulai ka balase ka kiu lri apamamwa ku vaeva ka kunsenge ku bava. Kikai yai amani ku apatarumarane ki aswalalanga ka vai ka kakudhane ki Lama ka lrisi, ki tinara cailane lri pia ki dramadramare.

¹⁵ Kaika kathane ku apatarumarane kivaivai ku Lama ka lrisi si Paralikiliki ka lrisi, lri patarumara ku vaeva ku balase ka kiu tu Balrithane ki pasalrivane ka lrisi patarumara ki Tamatama.

Apatarumarane ki Tamwalrane ku sapawsemakane ka lrisi

¹⁶ Ki samaka 14 ki vai ki aswalalanga ki dramare, lri ngulringau ku Takilragavane ka lrisi ki Tamatama.

¹⁷ Lri twalai ki samaka 15 ki vai pathagili edeede makapitulu lri ikai ku tayelrelreane sukubu; kai ki nimaka pitulane ka vai, kanea sikakathane ku kaika nipawsemakane ka pange.

¹⁸ Ki aswalalanga ka vai ka tayelrelreane numi sukubu, madha piapia ku awngane numi lukavaivai.

¹⁹ Lri patarumara ku Lama ka lrisi tusangwalreme ka Apwi ka lrisi, lani kiragai ku Tamatama. Lri patarumara ku lrulai ka sawvalai ka lwange, vaeva ka balase ka nikiubawbalane ka kiu, pitu ka taracailinga ka lrulai ka balase ka kiu, ka kadrwa ku takatumanane patuelre.

²⁰ Lai lri mialri patarumara ku malaelamenge ka milrikinku si apaelre ki lawlau ki ulrive ka Taleke ka lrisi; ku vaeva ka sawvalai ka lwange apamamwa, ku tulru ka kukingi si malaelamenge ka milrikinku si patarumara; ku vaeva ku balase ka nikiubawbalane ka kiu apamamwa ku drusa ka kukingi ku malaelamenge ka milrikinku si patarumara.

²¹ Ku vaeva ku lrulai ka balase ka kiu apamamwa ku vaeva ka kukingi ka malaelamenge ka milrikinku si patarumara;

²² lai lri patarumara ku vaeva ku balase ka kiu tu Balrithane ki pasalrivane ka lrisi, la pasikai ki mapapangale tulrisisi ku akabulane.

²³ Kaika kathane ku apiane ki vaivai ku Lama ka lrisi, lri patarumara kilakikai lrisi.

²⁴ Laka thadalrane, kaika kathane ku apiane ki vaivai ku Lama ka lrisi si Paralikiliki ka lrisi, edeede ki minaka pitulane, ki vaivai lri patarumara ku kiragai ki Tamatama ka sangwalreme ka Apwi ka lrisi,

²⁵ ikai ki samakapitulu lri yelrelre sukubu, kailri maka pia ku nikauawngane ki vaivai.

Apatarumarane ki Kalakitalekane ka lrisi

²⁶ Kwini ki Takitaletalekane ka lrisi, la arakai ku kameanane ku taleke tu Taleke ka lrisi si patarumara ki Tamatama, lri yelrelre numi si sukubu, madha kauawngu ku nikauawngane ki vaivai.

²⁷ Lri patarumara numi ku sangwalreme ka Lama ka lrisi, lani kiragai ku Tamatama. Lri patarumara ku drusa ku lrulai ka sawvalai ka lwange, vaeva ka balase ka nikiubawbalane ka kiu, pitu ku taracailinga ka lrulai ka balase ka kiu, ka kadrwaku takatwatumanane.

²⁸ La mialria patarumara ku malaelamenge ka milrikinku apaelre ki lawlau ki ulrive ka Taleke ka lrisi; ku vaeva ka sawvalai ka lwange lri pamamwa ku tulru ka kukingi ka malaelamenge ka milrikinku si patarumara; ku balase ka nikiubawbalane ka kiu lri apamamwa ki drusa ka kukingi ka malaelamenge ka milrikinku si patarumara;

²⁹ ku vaeva ku lrulai ka balase ka kiu, lri pamamwa ku vaeva ka kukingi ku malaelamenge ka milrikinku si patarumara.

³⁰ La mialria patarumara ku vaeva ku balase ka kiu, tu Balrithane ki pasalrivane ka lrisi, si pasikai ki mapapangale tulrisisi ku akabulane.

³¹ Kaika kathane kilakikai lrisi si Paralikiliki ka lrisi, kwidra apiane ki vaivai ka Lama ka lrisi si Taleke ka lrisi lri tuthadaalrane patarumaramara.