Taasipane 27 - Ngudradreadrekadhane Ka Sisiu 魯凱語聖經

Labaibai ka lalalake ki Zilupehade

¹ Kai labaibai ka lalalake ki Zelupehade yakai kai Mahela, Nua, Hugela, Mileka si Tireza. Ku tama ki Zilupehade Hepere; ku tama ki Hepere Gileade; ku tama ki Gileade Makire, ku tama ki Macire Manase; ku tama ki Manase laka Yusepe.

² Kwini talrima ka lalalake ki Zelupehade wamwa ki lrawlrawdru ki Alrivilrivi ka balrawbau ki Tamatama, si acegecege icucubungu ki Musi si barakalai ka Ilriazare si latara masangililuku ki mapapangale, la kawriva liniane,

³ “Ku tama nai wapacai ikai calragulragu, kadrwa ku sawvalai ku lalakeini. La kai kielre kwini ki kiaecebe ki Tamatama ka Kura. Kwini pacaini, ngwalai ki pasalrivaneini.

⁴ Laibekace ngwalai ku takakadrwane ku sawvalai ku lalake ki ama, la lri patwalai ki swa Iseraylri supilri mwalra ku naganeini? Ala kiatubi nai ku abadhane numi ku taingeane ku cungulu ikai ki laretesane nai.”

⁵ Ku Musi la pelaela ki Tamatama kwini tangimiamiane ki lalisu.

⁶ Ku Tamatama la iya kai ki Musi,

⁷ “Nipacengecengane kwini murikai lini ki lalalake ki Zelupehade. Kusu la malra patwalai kwini ki kitudrulru ki laretesane ki tama lini vala baai liniane, lani mucungulu kwini lalisu patwalai ki tama lini.

⁸ Kusu pelaela ki swa Iseraylri, lwiyasi ikai ku umawmase ku wapacai, laka kadrwa ku sawvalai ku lalake, ku labaibai ku lalakeini lri maka dulru mucungulu kwini cunguluini.

⁹ Lwiyasi laka kadrwa ku lalake ku ababai, lri kaamani kwini sawvalai ka labetakaneini ku mwacungulu;

¹⁰ lwiyasi ka kadrwa ku labetakane ku sawvalai, lri kamani ku betakane ki tamaini ka sawvalai ku mwacungulu;

¹¹ lwiyasi laka kadrwa ku betakane ku sawvalai ku betakane ki tama ku sawvalai, lri kamani kwini padedethanenga ka retesane kulri ucungulu. Kikai lrika amani ku tinukakudhane ki swa Iseraylri. Tamatamaku; amiaku kikai drekase muswane.”

Ku Yesua kiapilri ka amani ka mwacungulu ki Musi

¹² Ku Tamatama kawariva ki Musi, “Kusu mwa ka lregelrege Abarime, la sadaili drele ku patarumarali ki swa Iseraylri ka kadaengane.

¹³ Lu maka drelengasu, lri paacaingasu, mia ki taka ka Arungu.

¹⁴ Asi lwiyane kunumi ka tadrusa wabaebalre numi ku drekaseli sa ikai numi calragulragu ka Zingi. Ku mapapangale makanaelre sa ikai Meriba kalisilisi nakwane, kaisu yacucubungu liniane pathingale ku saniange ka pukuli.” (Kikai Miriba yai calragulragu ka Zingi ka berai Kadese.)

¹⁵ Ku Musi la kitubi iya kai,

¹⁶ “Tamatama ka Twaumase, amanisu ku tatwaladhane ki sanaka niake. Ala sikawla ku tangea kulri sangiluku ki mapapangale,

¹⁷ lri maka sangiluku liniane kikaruburu, kai mapapangalesu lani kai mia ki kadrwa ku tarapagwagu ka lakiu.”

¹⁸ Ku Tamatama la kawriva ki Musi, “Kwini lalake ki Nunge ka Yesua amani ku sapukwane malrigili ka yakai ku Siri ka umawmase; answa ki awlruini.

¹⁹ Si dawla iniane si pacegecege icucubungu ikai ki barakalai ka Ilriazare si mapapangale makanaelre, picucubungu liniane, si ikai kwini pelaela pathingale ka lri kamaninga ku mwacungulu muswane.

²⁰ Baadha iniane kwini pukusu vala iniane, lani pasalaladha iniane ku mapapangale ki swa Iseraylri.

²¹ Lri kilalra ku vaga ki barakalai ka Ilriazare; ku Ilriazare lri arakai ku ‘Urime’ kithingale ku takidremedremaneli. Lu mia kikai, ku Ilriazare lri kamani ku wabulru ki sanaka tangivelevelane ki Yesua si swa Iseraylri ka mapapangale.”

²² Ku Musi la pasusu ku tadrekasane ki Tamatama si pangimia. La dawlu ki Yesua pacegecege picucubungu ki barakalai ka Ilriazare si mapapangale makanaelre,

²³ la singikai ku tadrekasane ki Tamatama, ansu pibelenge ki awlru ki Yesua, si pelaela pathingale ka lri kamaningaini ku mwacungulu iniane.