Taasipane 26 - Ngudradreadrekadhane Ka Sisiu 魯凱語聖經

Saka kingipusale ku taasipane ki umawmase

¹ Sa idrengere ku swalrubu, ku Tamatama kawariva ki Musi si lalake ki Arungu ka Ilriazare,

² “Kunumi asipa kwini laumawmase ki swa Iseraylri makanaelre, si sudaane singibila asipi, la malra kwidra ki walribatenga ki taramapusale ku cailini, ku wadulru kikaruburu ku sawvalai pakipacase.”

^3-4 Ku Musi si Ilriazare la malra sarubu kwini ki yakai kwini ki caili ku umawmase. Kwini lalasu la isarubu ikai dratane Muabe ki babiabila kadravane Yuredange ka balrealreanane Yeriku. Ku singikai Izipiti ku swa Iseraylri ku umawmase yakai ku:

⁵ Swa Riwbingi (Kai Riwbingi takatakanga ka lalake ki Yakubu), paelre ki zuku ki Hanuke, Palu,

⁶ Hezerunge, si Karemi ka lamaretetese;

⁷ ku nipakipacasane ku umawmase patuelrelringa yakai ku 43,730.

⁸ Ku mwabaibalrithi ki Palu yakai ku Ilriabe,

⁹ si lalake ki Ilriabe ka Nemule, Dathane, Abirame. (Kai Dathane si Abirame pilri ki mapapangale; kwini lalasu kiaeceecebe ki Musi si Arungu, si kielrelre tupapalra ki Kura, si baebalre ki Tamatama.

¹⁰ Kai kadaengane la manunganga si thamukulu liniane. Sa lama kwini ki 250 ku umawmase, kwini lalasu twapapalra ki papalra ki Kura si pacai, si ka amani ku sapaukuludrane ki mapapangale.

¹¹ Ai kwini lalalake ki Kura kai wapacai.)

¹² Swa Simiune: Amani kai zuku ki Nemule, Yamingi, Yakingi,

¹³ Zera, Saule ka lamaretetese;

¹⁴ ku kiapacase yakai ku 22,200.

¹⁵ Swa Gade, amani kai Zipunu, Hagi, Suni,

¹⁶ Uzeni, Ilri,

¹⁷ Arude si Areli ka lamaretetese.

¹⁸ Ku kiapacase yakai ku 40,500.

^19-21 Swa Yuda, amani kai zuku ki Sela, Pereze, Zera, Hezerunge si Hamure ka lamaretetese. (Tadrusa ka lalake ki Yuda ka Ire si Unange wapacainga ikai Kanange.)

²² Kikai kiapacase ki lamaretetese ku umawmase ta 76,500.

²³ Swa Isakare, amani kai zuku ki Tula, Pua,

²⁴ Yasube si Simerunge ka lamaretetese.

²⁵ Ku kiapacase ta 64,300.

²⁶ Ku zuku ki Zibulungu, amani kai Serede, Ilune si Yahele ka lamaretetese.

²⁷ Kikai kiapacase ta 60,500.

²⁸ Ku zuku ki Yusepe, amani kai lalakeini ka Manase si Iparaime la mau drusa ka zuku.

²⁹ Ku zuku ki Manase, ku Manase twalalake ki Makire, ku Makire twalalake ki Gileade.

³⁰ Ku Gileade amani ku tasingikaiyane ki Zire, Heleke,

³¹ Aseriele, Sekeme,

³² Semida si Hepere ka cucungulane ki lamaretetese.

³³ Ku lalake ki Zelupehade ka Hepere kadrwa ku sawvalai, kathane ku labaibai; ku nagane lini amani kai Mahela, Nua, Hugela, Mileka si Tireza.

³⁴ Kikai lamaretetese ku kiapacase yakai ku ta 52,700.

³⁵ Swa Iparaime, amani kai maretetese ka Suthela, Bekere si Tahane,

³⁶ si ikaiyana kai mwabaibalrithi ki Suthela ka wa Iranane.

³⁷ Kikai lamaretetese ku kiapacase yakai ku ta 32,500. Kikai amani ka taidrusane ka maretetese ka mwabaibalrithi ki Yusepe.

³⁸ Zuku ki Biniyamingi, amani kai Bila, Asebele, Ahirame,

³⁹ Sepupame si Hupame ka lamaretetese.

⁴⁰ La ikaiyana ku mwabaibalrithi ki Bila ka wa Aredeane si wa Naimangane.

⁴¹ Kikai lamaretetese ku kiapacase ku umawmase yakai ku ta 45,600.

⁴² Zuku ki Dange, yakai kai wa Suhame;

⁴³ ku kiapacase ku umawmase lu paelrelreane ta 64,400.

⁴⁴ Zuku ki Asere, amani kai zuku ki Imena, Isevi, Beria ka lamaretetese;

⁴⁵ la ikaiyana. Kai zuku ki Beria ka taidrusa ka Hebere si Malekile ka maretetese.

⁴⁶ Kai Asere yakai ku lalakeini ku ababai sia Sera.

⁴⁷ Kikai la lamaretetese ku kiapacase ku umawmase yakai ku ta 53,400.

⁴⁸ Zuku ki Napetali, amani kai lazuku ki Yahezele, Guni,

⁴⁹ Yezere, Seleme ka lamaretetese;

⁵⁰ ku kiapacase ku umawmase lini yakai ku ta 45,400.

⁵¹ Ku kiapacase ku umawmase ki swa Iseraylri yakai ku ta 601,730.

⁵² Ku Tamatama kawariva ki Musi,

⁵³ “Kusu singikaiya ku takathane ki umawmase lini apavavala ku kadaengane,

^54-56 tinu pakuzibika liniane la baai ku swadrau ku kadaengane ki takakalra ku umawmase, ku swatiki la baai ki tabebekele ka zuku.”

⁵⁷ Kai Zuku ki Lrivi yakai kai lamaretetese ka Geresune, Kuhathe si Mirari.

⁵⁸ Ku lamwabaibalrithi lini amani kai Lribini, Hiburungu, Maheli, Muse, Kura. Twalalake ki Amerame kai Kuhathe.

⁵⁹ Kai Amerame la karudrange mwa ki lalake ki Lrivi ka kiatulalake ikai Izipiti ka Yukebide. Kikai alisu la tulalake ku lalake ki Amerame ku tadrusa ku sawvalai ka sia Arungu si Musi, tangea ku ababai ka sia Miriame.

⁶⁰ Kai Arungu tasupate ku sawvalai ku lalake—Nadabe, Abihu, Ilriazare si Ithamare.

⁶¹ Kai Nadabe si Abihu wapacai sa patarumaramara ku languapwapwi baai ki Tamatama.

⁶² Kudra tara dramarenga ku takitulalakane ku sawvalai, ku swa Lrivi yakai ku ta 23,000. Kai lalasu kia pakitukudha ki drumane ki swa Iseraylri kipacase, asi lwiyane amani sa kakadrwa ku kidrulru lini ku cungulu ku kadaengane.

⁶³ Ku swa Iseraylri sa ikai dratane ka Muabe kwini babiabila kadravane Yuredange ka balrealreanane Yeriku, ku Musi si Ilriazare twalrepenge pakipacase ki laumawmase. Kikai la nipacasane kai laumawmase amani lini ka wapacase,

⁶⁴ ikai adringi kai kadrwa ku natangea ku tau asipi ki umawmase ku Musi si Arungu ikai Sinai calragulragu.

⁶⁵ Ku Tamatama namia kai, kikai lalasu lri makitu pacai ikai calragulragu; kathane kai lalake ki Yepuni ka Kalebe si lalake ki Nunge ka Yesua, ku drumane wapaacainga makanaelre.