Taasipane 25 - Ngudradreadrekadhane Ka Sisiu 魯凱語聖經

Yakai Piure ku swa Iseraylri

¹ Ku swa Iseraylri sa sulai ikai ka vaalru Sitime, yakai ku umawmase ku paswadringai ki swakai kwini ki Muabe ka lababai.

^2-3 Kwini labaibai wadawlu liniane si kibalrulu ki tasukusukubane ki twaumase ki swa kai Muabe. Ku swa Iseraylri la kane kwidra sangusukubane ki twaumase lini, si sukubu kwini ki twaumase ki swakai Biure ka Baale. Lakamani, ku kaelaela ki Tamatama liniane,

⁴ la kawriva ki Musi, “Kusu singikaiya ku vagali, pwa papacai kwini latarasangililuku ki swa Iseraylri, lri kainaku pelanga kaelaela ki mapapangale.”

⁵ Ku Musi la kawriva kwini ki tara saibange iya kai, “Kunumi ka tangeea pwa papacai kwini ki swa talikai numi ku wasukubu ki Baale ka umawmase.”

⁶ Yakai ku tangea ku swa Iseraylri pia cucubungu ki Musi si mapapangale, mailuku ku tangea ku ababai ki swa Midiange mudaane ki balrawbau; ikai kwini, kwini lalasu yacengecenge ikai lrawlrawdru ki Alrivilrivi ka balrawbau ki Tamatama makitu tubitubi.

⁷ Ku agane ki barakalai ka Arungu, lalake ki Ilriazare ka Pinehase la drele, la acegecege, kidaili ki mapapangale. Kwini lasu la malra ku vaeva ku idiri,

⁸ si kabibilrili kwini ki lasu si kwini ki ababai mudaane ki balrawbau, la arakai kwini idiri pwa culrulu liniane. Sa mia kikai, kwidra twalisi ki swa Iseraylri ku swalrubu ala kirimu idrengere kabasau;

⁹ ai kwidra ngwakai ki swalrubu si pacainga ku laumawmase ta 24,000.

¹⁰ Ku Tamatama la kawriva ki Musi,

¹¹ “Ngwalai ku tapangimiane ki Pinehase, kainaku lri papianga ki swa Iseraylri kaelaelathe. Kathaane ku asukubane nakwane ki umawmase, kai lri maka sukubu ki drumane ka latwaumase, lakamani ku kainaku ikai ki takaelaelathaneli amudu liniane.

¹² Kusu pelaela iniane, lri makaketeketaku iniane ku lrika apalralrawlrawthane.

¹³ Kwini lasu si lamwabaibalrithi lrika palralrawthu abarakalai; asi lwiyane kwi lasu kai palraingi kwidra sanaka kiaecebe nakwane ka latwaumase, la pakipacepe kwini la pasalrivane ki mapapangale.”

¹⁴ Kwini palra ki swa Midiange ka ababai palraini kipapacai ka swa Iseraylri ku naganeini sia Zimeri, ka lalake ki Salu, ka tamatama ki swakai ki zuku ki Simiune ka tangea ka wacekecekele.

¹⁵ Kwini swa Midiange ka ababai sia Kuzebi; ku tamaini sia Zure ka tarasangililuku ki vaeva ka zuku ki swa Midiange.

¹⁶ Ku Tamatama wadrekase ki Musi,

¹⁷ “Lu mwa kikaruburu ki swa Midiange, pwa amudu liniane;

¹⁸ asi lwiyane amani sa arakai ku salrigilane si tulisi numiane ikai kavai Piure, si la mialri ka ngwalai kwini ki ababai ka Kuzebi ka kiapapacai kwidra sa icengecenge ku swalrubu ikai kavai Piure.”