Taasipane 22 - Ngudradreadrekadhane Ka Sisiu 魯凱語聖經

Wadawlu ki Balame ku talialalai ki Muabe

¹ Ku swa Iseraylri la katwasana aru cucubungu ku kadadalranane lini, si ikai dratane Muabe ki tali talrawane kadravane Yuredange, ka balrealreanane Yeriku tutasuladhane.

² Ku Balake ka talialalai ki swa Muabe ka lalake ki Zipure kialalra ku tapangimiane ki swa Amuri ki swa Iseraylri,

³ la thingale ku umawmase lini ka mapangale, kwini lasu si mapapangaleini la makitu mukuludru.

⁴ Ku swa Muabe la kawriva ki latarasangililuku ki swa Midiange iya kai, “Kikai laumawmase kai lri tara thainu si amudu kikai lamanemaneta demedeme, mia ki lwange lu kane ki yaubulane ka ubulu.” Talialalai ki Balake

⁵ siakawlu mwa kikawriva ki Balame ka lalake ki Biure; ku Balame yakai ki taikaiyane ki swa Amau, adeethe ki kadravane Yuparati ka Pithure. Kwini kiasikawlu la pelaela iniane ku vaga ki Balake, “Yakai ku taingea ka zuku ka twalai Izipiti, wasarau ikai ki druanga ku mapapangale, lri kela malra ki kadaengane nai.

⁶ Ku umawmase laka tapapangale naiane, lakamani bwala kela naiane, si pasikai naiane pusu liniane. Alau lri dulru nai pamalebe liniane, si pakatwase liniane kai ki kadaengane kai. Wathingalaku, lu subulrubulrusu, lri kaesai ku mapapangale; lu pususu, kwini lalasu lri matikuru.”

⁷ Ku latarasangililuku ki swa Muabe si swa Midiange wailuku ku sakithingathingalane tulrisi si mwa ki Balame, la pelaela ku kidremedreme ki Balake iniane.

⁸ Ku Balame la iya kai liniane, “Kunumi suladha ikai kai, lwiya lri pelaelaku numiane ku taiyane ki Tamatama nakwane.” Ku latarasangililuku ki swa Muabe la asuru sulai ikai ki Balame.

⁹ La kela ku Twaumase mwa ki Balame, kivaga iniane, “Kikai taelre muswane sulai kai laumawmase laneane?”

¹⁰ La tubalre ku Balame, “Ku talialalai ki Muabe ka Balake siakawlu liniane kela pelaela nakwane,

¹¹ kwidra twalai Izipiti mulatadre ku taingea ka zuku, wasarau ikai ki druanga. Ani pasikai nakwane amia pusu liniane, la nai pamalebe liniane, si pakatwase liniane.”

¹² Ku Twaumase la kawriva ki Balame, “Madha tupalrapalra kai ki laumawmase mwa, la madha pusupusu ki swa Iseraylri, asi lwiyane swabulrubulrwaku liniane.”

¹³ Saka samakapusale ki mialrealre, ku Balame la mwa kikawriva ki sasiakawlu ki Balake, iya kai, “Lu siwlria, ku Tamatama kai palraingi nakwane tupalra numiane.”

¹⁴ Kwini lalasu la katwase siwlri kikawriva ki Balake, si pelaela liniane ku Balame kai twapalra liniane kainganai iya.

¹⁵ Ku Balake la sikaaulunga ku mabeebelenge ki siaswalane mwa.

¹⁶ Kwini lalasu la mwa kikawriva ki Balame, si pelaela iniane ku kidremedreme ki Balake, “Madha ngupakaikai ki manemanenga si kai kainganai!

¹⁷ Lri tara tuadravaku pakalreva kiaseasene muswane, adravane tumana iyasu lri tara pangimiaku. Bwala pasikaiyaili pusu kai ki laumawmase.”

¹⁸ Ai ku Balame la iya kai, “Adravane ku Balake malra pakanaelre ku yakai ki daane ki talialalai ku kingi ku gingi si baai nakwane, kainaku lri maka ikai ki tikiyane ka awngane si baebalre ku drekase ki Tamatama ka Twaumaseli.

¹⁹ Ai kunumi suladha ikai kai, mia kwidra ki siaswalane, la nau thingale lu ikaiyana ku drumane ku vagaini nakwane ki Tamatama.”

²⁰ Kwini sakamaungu, ku Twaumase wakela ki Balame, si kawriva iniane, “Lwiyasi kikai laumawmase ka wakela kitubi muswane tupapalra liniane, kipadulrwa si tupalra liniane, ai singikaiya ku vagali pangimia.”

²¹ Saka samakapusale ki mialrealre, ku Balame la suragele ku tangukaiyaneini ki ruba, si tupalra ki tarasangililuku ki Muabe katwase mwa.

Balame si rubaini

²² Ku Twaumase kai kiaragai ki Balame tupapalra liniane. Ku Balame la ngukai ki ruba, la tadrusa ku sasiakawluini tupalra iniane ikadalranane, ku sasiakawlu ki Tamatama la ikai kadalranane telenge ki kadalrananeini.

²³ Ku ruba la drele ku sasiakawlu belenge ecenge ku dramu acegecege ikai kwini, la katwase kwini ki kadalranane, ngibangulu mwa ki angangade. Ku Balame la lrumai ki ruba, anisiulri mwa ki kadalranane iya.

²⁴ Ku sasiakawlu belenge la acegecege ikai ki drusa ka budu ki ngwatiiki ka kadalranane, maecebe ki kadalranane ku raedre.

²⁵ Ku ruba sadrele ki sasiakawlu belenge, la ngukakai ki taraeraedrane, gisagisi pakadula ku drapale ki Balame, ku Balame ala pelanga lrumai ki ruba.

²⁶ Ku sasiakawlu belenge la arwakai cucubungu, si acegecege ikai ki ngwatiiki ka kadalranane, kwini ki maecebe kadrwa ku amaka ngukaiyane lribate.

²⁷ Kikai, ku ruba sadrele ki sasiakawlu belenge la gurapangane. Ku Balame la kagirimucu kalisi, si arakai ku ukudru lrumai ki ruba.

²⁸ Kikwini, ku Tamatama la pakawriva ki ruba, ku ruba la iya kai ki Balame, “Watumanaku muswane? Asu sangu tulrulu lrumai nakwane?”

²⁹ Ku Balame la iya kai ki ruba, “Amani sa ranausu nakwane! Ana ecengaku ku lrabu, nai papacainga naku muswane!”

³⁰ La tubalre ku ruba, “Kainaku kamani ku singika lavavalakesu ngukaikai ka ruba? Ku tangilribatanenga paiyanga naku kai marasikai muswane?” Ku Balame la tubalre, “Ini!”

³¹ Ku Tamatama ala padrele ki Balame ki sasiakawlu belenge sa malra ku dramu si acegecege ikai kwini, ku Balame la guruthungane idaedae.

³² Ku sasiakawlu belenge la iya kai iniane, “Asu kirimu sangu tulrulu lrumai ki ruba? Wakelaku telenge ki kadalrananesu, asi lwiyane kaika amaka mwanesu.

³³ Kwini rubasu wadrele nakwane, la sangu tulrulu katwase mubere, lwiyasi kai katwase mubere, nai papacainga naku muswane, si naika amanini ku waudripi.”

³⁴ Ku Balame la iya kai ki sasiakawlu belenge, “Pasalrivaku; kainaku wathingale ala ka amanisu ka watelenge nakwane ikai kadalranane. Lwiyasi kaika amaka mwaneli, nau siwlri mubalriu.”

³⁵ Ai ku sasiakawlu belenge la iya kai, “Lu tupalra kikai ki laumawmase! Ai singikaiya ku taiyaneli muswane kawriva.” Ku Balame la katwase tupalra liniane.

Ku Balake kiadredresenge ki Balame

³⁶ Ku Balake sa kilalra ka wakela ku Balame, la katwase mwa ka cekele Are kidredresenge iniane; kikai cekele yakai kwini ki pagisane ki Muabe ka babiabila kadravane Arenunge.

³⁷ Ku Balake la iya kai iniane, “Satau pakatwasaku ku wamwa dawlu muswane matumane asu kai kela? Lu kidremedremesu kai lri maka pangulwadhane pakalreva nakwane amiasu nakwane?”

³⁸ La kawriva ku Balame, “Kikai kainaku ka wakelanga? Kaiasasane, manemane ku adulrwaneli? Kathane ku kawriva iya nakwane ki Twaumase ku aiyaneli.”

³⁹ Ku Balame la tupalra ki Balake mwa ka cekele Huzuthe.

⁴⁰ Ku Balake la culu ku lwange kiu, la baai ku beate ki Balame si kwini ki latarasangililuku ka twapalra iniane.

Aswalaalanga ka yugingi ki Balame

⁴¹ Saka makapusale ki mialrealre, ku Balake la iluku ki Balame mwa ka Bamuthe Baale; patwalai kwini ku Balame la twalai kwini si drele kwidra drumane ka swa Iseraylri.