Taasipane 21 - Ngudradreadrekadhane Ka Sisiu 魯凱語聖經

Pamalebe ki swa Kanange

¹ Ku yakai tali lrawdru ki swa Kanange ka talialalai ki swa Arade kialalra ku swa Iseraylri ka lri ngukakai kadalranane ka Atharime, la mwa kikaruburu liniane, la ravase ku tapiya ku laumawmase.

² Ku swa Iseraylri la papia ki Tamatama puvaga iya kai, “Alaiyasi paakacisu naiane kikai ki laumawmase, lrika kadrwa ku langadhane nai ku manemane, lri patarumara nai liniane si cekele lini muswane, si pakamudunga.”

³ Ku Tamatama la kilalra ku takitubiane lini, si malra ki swa Kanange pualrimane liniane. Ku swa Iseraylri la pakisalru demedeme amudu kwini ki lalasu si cekele lini, kwini kadaengane la ki pasi Hurema.

Nitusulravane ka lriwlu

⁴ Ku swa Iseraylri matwase ka lregelrege Hure, papia kwini sapapia laveke Suize ka kadalranane, pakai ku akatwasane ngulralrilringulu kwini talikai ki Idume. Sa ikai kwini kadalranane, ku mapapangale la kawpungu;

⁵ kwi lalasu la kalisi ki Twaumase si Musi iya kai, “Manemane kai sangiluku naiane katwase Izipiti, ani pacai amia naiane ikai kai ki kadrwa ku akaneane kadrwa ku acilai ka calragulragu? Kai nai maka walrelrenga kikai kai malimemenga ka laakaneane!”

⁶ Ku Tamatama la pamwa ki siduduku ka sulrau mwadringi ki mapapangale; la tapangale ku swa Iseraylri ku kiakace si pacai.

⁷ Ku mapapangale la kela kikawriva ki Musi, “Malisi nai ki Tamatama la kalisi muswane, pasalriu nai. Kikai ala kitubia ki Tamatama, ani pakatwase naiane kai ki lasulrau.” Ku Musi la pasikai ki mapapangale kitubi.

⁸ Ku Tamatama la cunu ki Musi darepa ku vaeva ku lriwlu ka sulrau, si kelradha pwa ki ulrudru, lani drele kwini kiakace ki siduduku ka sulrau ku umawmase sana tangerarane drele kai ki sulrau lri panianiake.

⁹ Ku Musi la darepe tuvaeva ku lriwlu ka sulrau, la kelrai pwa ki ulrudru. Ku kiakace ki siduduku ka sulrau ku umawmase sa tangerarane drele ki lriwlu ka sulrau la kirimu udripi.

Twalai lregelrege Hurebe mwa ka vaalru Muabe

¹⁰ Ku swa Iseraylri la aru cucubungu, la ikai Abuthu tutasuladhane.

¹¹ Sa katwasenga Abuthu, kwini lalasu la ikai kwini kadaengane ki swa Muabe tali talrawane, kwini yacalragulragu ka nacekele ki swa Abarime tutasuladhane,

¹² ala mwa kwini vaalru Zarede tutasuladhane.

¹³ Kwini lalasu la aru cucubungu ku kadalranane lini, la ikai calragulragu tali dradha ki kadravane Arenunge tutasuladhane; kikai calragulragu wadaruru ki cekele ki swa Muabe. (Kikai vaalru Arenungu amani ku pagisane ki swa Muabe si swa Amuri.)

¹⁴ Lakamani, ku Tapacasane ki Takikaruburuburane ki Tamatama matikai “... swa talikai Supa ka Wahebe, vaalru Arenunge,

¹⁵ wadaruru ki cekele ka Are si darurwana kela ka sisiane ki pagisane ki Muabe.”

¹⁶ Kwini lalasu la twalai kwini la mwa kwidra taingea ka kadaengane ka sia Bire (ku pacugane dralremedreme). Ku Tamatama yakai kwini kawriva ki Musi, “Lu sarubwa ki mapapangale, lri baadhaku ku acilai paungulu liniane.”

¹⁷ Kikwini kwidra, ku swa Iseraylri la senai ku amia kai ku senai, dralremedreme, lrapesadha ku acilai; Lri senai nai tulrisisi.

¹⁸ Kikai amani ku latalialalai ku arakai ku ukudru lini lruku ku dralremedreme, ka amani ku tarasangililuku ki mapapangale ka arakai ku ukudru lruku ka dralremedreme. Kwini lalasu twalai calragulragu taluela mwa ka Matana,

¹⁹ ala twalai kwini mwa ka Nahalrile, ala mwa ka Bamuthe,

²⁰ ala twalai Bamuthe mwa ka vaalru kadaengane ki swa Muabe, kwini tasakaikaiyane madu drele masiasirare ki calragulragu ka kalididu lregelrege Pisega.

Pamalebe ki talialalai ki swa Amuri si talialalai ki swa Basane

²¹ Ku swa Iseraylri pamwa ku kiasikawlu drele ki talialalai ki swa Amuri ka Sihunge, iya kai,

²² “Ala palrainga naiane ku angukakaiyane ki pagiagisane ki kadaengane numi. Kunai si la lapulapu nai kai lri kidaili ki kadalranane, si mwa ki angangade ki babudwane; kai nai lri ungulu ku taaciladhanane numi. Lri tusalribatane nai si kathane, lecege ngukakai ki kadaengane numi.”

²³ Ai ku talialalai ka Sihunge kai palraingi ki swa Iseraylri pangukai ki kadaengane lini. La dawlu sarubu ki lakwapingi mwa ka calragulragu, ikai kwini Yahaze kikaruburu ki swa Iseraylri.

²⁴ Ai ku swa Iseraylri papacai iniane si lakwapingini, la ravase ku kadaengane lini, twalai vaalru Arenunge papia dradha daruru ka Yabuke, kwini yai pagiagisane ki swa Amune, asi lwiyane kwini swa Amune makeecenge ku saalradrane ka kepale ki cekele lini.

²⁵ Ku swa Iseraylri la ravase malra sanaka cekele ki swa Amuri, paelre ka Hesebunge si ngiathalringulu ka lacekele; la ikai kwini ku swa Iseraylri.

²⁶ Kwini Hesebunge amani ku kacekelane ki talialalai ka Sihunge ki swa Amuri; kwini Sihunge nakiakaruburu ki talialalai ki Muabe, si ravase nguelre ku kadaenganeini, padaruru ka kadravane Arenunge.

²⁷ Lakamani ku senai ki tara tusenai iya kai, Bwala mwakai Hesebunge ki cekele ki talialalai ka Sihunge! Lri dredrele nai lulri pela tucekele.

²⁸ Asi lwiyane yakai ku apwi ku twalai cekele Hesebunge, yakai ku kelrabe ku twalai ki cekele ki Sihunge, si amudu ki cekele Are ki swa Muabe, la thamukulu kwini tali dradha lregelrege talikai Arenunge.

²⁹ Swa Muabe, lri matikuru numi! Ku wasukusukubu ki Kemuse ku umawmase, lri kaamudu numi! Kikai twaumase amani ku pauabere ki sawvalai numi, ku labaibai numi la kiravase ki talialalai ka Amuri.

³⁰ Kaiasasanenga ku mwabaibalrithi lini kiamudu, twalai Hesebunge daruru ka Dibune, twalai Nasime kela ka ngwadadeethe ka Midiba kavai Nupa.

³¹ Ku swa Iseraylri yakai kwini ki kadaengane ki swa Amuri.

³² Ku Musi la sikawlu ki umawmase lrilriu ka cekele Yazere; ku swa Iseraylri waravase ka Yazere si ngiathalringulu ka lacekele, si pakatwase kwini ki yakai kwini ka swa Amuri.

³³ Ku swa Iseraylri la ngibangulu siwlri, papia kadalranane ki Basane. Ku talialalai ki swa Basane ka Uge la kela mailuku ki lakwapingini makanaelre mwa Ideri kikaruburu liniane.

³⁴ Ku Tamatama la kawriva ki Musi, “Madha mukuludru. Lri malraku iniane, si mapapangaleini si kadaenganeini baai pwa ki alrima numi. Kunadruma ku tapangimiane numi ki swa Hesebunge ka Sihunge ka talialalai ki swa Amuri, kikainga lri mialri numi tungimia ki talialalai ka Basane.”

³⁵ Ku swa Iseraylri la papacai ki Uge si lalalakeini, si mapapangaleini makanaelre, kadrwa ku nipasurane ku natangeanga, la ravase ki kadaenganeini.