Taasipane 20 - Ngudradreadrekadhane Ka Sisiu 魯凱語聖經

La takipadradresengane sa ikai Kadise

¹ Kwini aswalaalanga ki dramare, ku mapapangale ki swa Iseraylri wakelanga kavai calragulragu talikai Zingi, la ikai Kadise cegecege ku tasuladhane lini. Ku Miriame wapacai ikai kwini, la dralreke pikai kwini.

² Kwini tapikaiyane lini tutasuladhane laka kadrwa ku acilai, ku mapapangale la isarubu mwa ki Musi si Arungu,

³ la kalisi iya kai, “Ku paswalala ku sakacekele nai ka swa Iseraylri nawapacai ikai cucubungu ki Alrivilrivi ka balrawbau ki Tamatama; maesaesai nai tupaalranga liniane pacai.

⁴ Asu iluku naiane pwakai ki calragulragu? Lri taelre nai ki la nilapulapwane pacai ikaikaai?

⁵ Asu ililuku naiane katwase Izipiti, si mwa kai ki kadrwa ku namanemanenga ka kadaengane? Kikai kadrwa ku lataleke, kadrwa ku icizike, budu si nginanavate; adravane ka awngulane ka acilai laka kadrwa!”

⁶ Ku Musi si Arungu la kidaili ki mapapangale, si acegecege ikai lrawlrawdru ki Alrivilrivi ka balrawbau. Tara guruthungane idaedae; ku draredrare ki Tamatama la adrelane liniane.

⁷ Ku Tamatama kawariva ki Musi,

⁸ “Malra kwini yacucubungu ki Langiane ku ukudru. Kusu si Arungu sarubwa ki mapapangale, icucubungu liniane si papia ki alrisapesape kawriva, ku acilai lri twalai ki alrisapesape ngibwale berai si mwalwaludru. Lu mia kikai, lri dulrusu paungulu ki mapapangale si la nilapulapwane kwini twalai ki alrisapesape mwaludru ka acilai.”

⁹ Ku Musi singiakai ku drekase ki Tamatama la mwa malra kwini ukudru.

¹⁰ Ku Musi si Arungu la sarubu ki mapapangale mucucubungu ki alrisapesape. Ku Musi la kawriva, “Kunumi ka lawabaebalre kilalra! Lri kawriva nai ki alrisapesape pamwaludru ku acilai si paungulu numiane?”

¹¹ Ku Musi la ciliki ku ukudru, sititi ki alrisapesape sangu pusale, la kainganai ku tarwadrau ku acilai. Ku mapapangale si la nilapulapwane la makitu ungulunga.

¹² Ai, ku Tamatama la kaelaela ki Musi si Arungu, iya kai, “Asi lwiyane kadrwa ku salrwane numi icucubungu ki swa Iseraylri pathingale ku saniange ku pukuli, kunumi kai numi lri maka sangiluku liniane mudaane kwini ki puvagali ka abadhane numiane ka kadaengane.”

¹³ Kikai amani ku takipadradresengane lini ikai Miriba; ku swa Iseraylri yakai kavai kalilisi ki Tamatama, ku Tamatama la ikai kwini papia liniane pathingalane ku sanianganeini.

Kai palraingi palribate ki swa Iseraylri ku talialalai ki swa Idume

¹⁴ Ku Musi patwalai Kadise sikawlu ku laumawmase mwa kikawriva ki talialalai ki swa Idume, kwini lalasu la kawriva ki talialalai ki swa Idume, “Ku retesanesu ka swa Iseraylri yakai ku akikawrivane muswane. Wathingalesu ku makucingalre ku kipadradresenge nai.

¹⁵ Ku tapangimiane ki cucungulane nai mwa ka Izipiti; la ikai nai kavai kaulai turamuru. Ku swa Izipiti la tudreadrekase ki cucungulane nai si kunai,

¹⁶ la kitubi nai ki Tamatama ku akipalribulane. Ku Tamatama la kilalra ku takitubiane nai, la sikawlu ki sasiakawlu subelebelenge malra sangiluku naiane katwase Izipiti. Kikainga la kelanga nai ki babiabila ki cekelesu Kadise,

¹⁷ kiatubi nai ala palrainga naiane pangukakai ki kadaenganesu. Kunai si la lapulapu nai kai lri kidaili ki kadalranane, si mwa ki angangade ki babudwane; kai nai lri ungulu ku acilai ki dralremedreme numi. Lri ngukakai nai ki maadrau ka kadalranane sikathane, leecege ngukakai ki kadaenganesu.”

¹⁸ Ai, ku talialalai ki swa Idume la tubalre, “Kainaku lri palraingi numiane ngukakai ki kadaenganeli! Lwiyasi kela numi, lri pamwaku ku kwapingi telenge si kikaruburu numiane.”

¹⁹ Ku swa Iseraylri la tubalre, “Lri ngukakai nai ki takadravane ki kadalranane! Lwiyasi kunai ku lapulapu nai la ungulu ku acilaisu, lri baai nai ku paisu. Lri ngukakai nai lribate sikathane.”

²⁰ Ku talialalai ki swa Idume la kawrivanga, “Kai ka nipalraingane!” La pamwa ku tagagarange ku kwapingi si kikaruburu ki swa Iseraylri.

²¹ Ngwalai sakai palraingi ki swa Iseraylri ku talialalai ki swa Idume pangukakai ki kadaenganeini, ku swa Iseraylri la ngibangulu papia ki talidrumane ka sivale ka kadalranane.

Wapacai ku Arungu

²² Ku mapapangale ki swa Iseraylri makanaelre katwase Kadise, la kela lregelrege Hure;

²³ Kikai lregelrege yakai ki pagisane ki Idume. Ku Tamatama la ikai kwini kawriva ki Musi si Arungu iya kai,

²⁴ “Kai Arungu kai lri maka mudaane kwini ki puvagali baai ki swa Iseraylri ka kadaengane; kikai lri pacai, amani sa ikai numi ka Miriba ka tadrusa baebalre ku drekaseli.

²⁵ Kusu iluka ki Arungu si lalakeini ka Ilriazare mwa lregelrege Hure,

²⁶ Ikai kwini mwalra kwini barakaladhane ka laimai ki Arungu, si pasilaimai ki Ilriazare. Ku Arungu lalri ikai kwini pacai.”

²⁷ Ku Musi la singikai ku drekase ki Tamatama pangimia. Kwini lalasu la icucubungu ki mapapangale mwa lregelrege Hure.

²⁸ Ku Musi la mwalra kwini silaimai ki Arungu ku laimai ki barakalai, la malra pasilaimai ki Ilriazare. Ku Arungu la pacai ikai kalididu lregelrege. Ku Musi si Ilriazare la mulebe ki lregelrege.

²⁹ Ku mapapangale makanaelre wathingale ka wapacainga ku Arungu la pasikai iniane tara matulrulu ka vai kalreme.