Taasipane 18 - Ngudradreadrekadhane Ka Sisiu 魯凱語聖經

Akicapilane ki labarakalai si swa Lrivi ka laumawmase

¹ Ku Tamatama kawariva ki Arungu, “Kusu si lalalakesu, si swa Lrivi ka laumawmase lri tara siamece sanaka pasalrivane ku tasucipavane ki Alrivilrivi ka taikaikaiyane; ai kathanesu si lalalakesu kulri siamece ku pasalrivane ki tapasalrivane ki takicapilane ki barakalai.

² Iluka ki retesanesu ka swa Lrivi ka laumawmase kela kai, lani taelre muswane kipuawngane. Kusu si lalalakesu lu ikai numi ki Alrivilrivi ka balrawbau kipuawawngane, lri paralubu numiane.

³ Kwini lalasu lri papia muswane kicapili, ikai ki Alrivilrivi ka balrawbau kipuawawngane, ai madha palalalava sucipau ki Alrivilrivi ka taikaikaiyane si lamanemane ki tapatarumaramarane, amani lu pacai ka lalasu si kunumi.

⁴ Kwini lalasu lri taelre muswane kipuawngane, kicapili sanaka awngane ki Alrivilrivi ka balrawbau; ai kwini drumane ku kai swadalepe ka umawmase madha taelre liniane kipuawngane.

⁵ Kathanesu si lalalakesu kulri kicapili ki Alrivilrivi ka taikaikaiyane si awngane ki tapatarumaramarane. Lu mia kikai, kainaku lri kaelaelanga ki swa Iseraylri.

⁶ Patwaladhaku ki swa Iseraylri pilri ki laretesanesu ka swa Lrivi si baai numiane. Kwini lalasu lrika nakwanenga, lani maka ikai ki Alrivilrivi ka balrawbau kipuawngane.

⁷ Kathanesu si lalalakesu ka naika kiacapili ku awngane ki barakalai ki ngwakai ki tapatarumaramarane si Alrivilriviilrivinga ka taikaikaiyane. Kikai awngane numi, amani sa baadhaku numiane ku awngane ki barakalai. Ku drumane sana ngudadethe ki saniange ka lamanemane, lri tara kipapacai.”

Amalrane ki labarakalai

⁸ Ku Tamatama kawariva ki Arungu, “Lri malraku sanaka nipatarumarane nakwane tunipawkalrivilane ka acebe, kwini kaika nilamane pikai ki tapatarumaramarane ka sapatarumarane, lri baai muswane patuelre. Lri baadhaku kikai nipatarumarane muswane si lamwabaibalrithi, tuapalralrawthu ka drulru numi.

⁹ Ai ala kwini kaika nilamane pikai ki tapatarumaramarane ka sanianiangenga ka sapatarumarane, Taleke ka lrisi, Balrithane ki pasalrivane ka lrisi, si Samupasalrivanane ka lrisi patuelre kilakikai lrika numianenga. Sanaka nipatarumarane baai nakwane ka tinusaniange ka sapatarumarane lrika muswane si lagaganesu.

¹⁰ Kunumi lri tara ikai numi ki saniange ka taikaiyane kane kikai lamanemane, ai kathane ku sawvalai ka lri kane. Kikai lamanemane tinusaniangane.

¹¹ “Ku drumane, ku patarumara ki swa Iseraylri nakwane ku drumane ku sapatarumarane ka acebe mialri ka lrika numiane. Lri baadhaku muswane si lalakesu, tuapalralrawthanenga ka drulru numi. Ku wacekecekele numi ka tangea, ka mabula ikai ki lrisi, lri makitu kane.

¹² “Lri malraku kwini patarumara ki swa Iseraylri luka caili kwini aswalaalanga ka nikitalekane kwidra mathaithariringa baai numiane, yakai ku ulrive, bava si lataleke.

¹³ Kilakikai lrika numianenga. Ku wacekecekele numi makanaelre, kwidra mabula ikai ki lalrisi, lri makitu kane.

¹⁴ “Ikai ki swa Iseraylri sanaka kaika nipaelreane ku samalalangadhane si patarumara nakwane ka lamanemane, lrika numianenga.

¹⁵ “Kwini patarumara nakwane ki swa Iseraylri ku tinueapane si aswalaalanga kitulalake ka la nilapulapwane mialri ka numianenga; ai kunumi lri tara tarumara numi ku salangadhane balrithi ku takatinueapane, si tarumara ku salangadhane balrithi ki kaika mabula ka aswalaalanga ka nilapulapwane.

¹⁶ Kwini vavalake lu tara dramarenga lri kisawlri, singikai ki takelretane ki Alrivilrivi ka taikaikaiyane baai ku lrima ka gingi ka paisu.

¹⁷ Ai ku aswalalanga ku lwange, nikiubawbalane ka kiu si kiu madha sawlriwlringa langai; ki lakwini lri kitulreepengenga ka nakwane, tusapatarumarane. Kusu malra kwini erai lini si ubu pubelenge ki tapatarumaramarane, si lama kwini lamace lini, tusangwalreme ka Apwi ka lrisi patarumara nakwane ka Tamatama.

¹⁸ Ku beate lini lrika numiane, kathadalrane kwini nipawkalrivilane ka sapatarumarane ka tali tuku si tali vanale ka vagisi lrika numianenga.

¹⁹ “Lri malra kwini patarumara ki swa Iseraylri nakwane sanaka nipawkalrivilane baai muswane si lalalakesu, tupalralrawthunga ka drulru numi. Kikai amani ku nicegecegane ka kaika apangicilriane ka samakaketeketaneli muswane si lamwabaibalrithi muswane.”

²⁰ Ku Tamatama kawariva ki Arungu, “Kusu madha tarumaramara patwalai ki swa Iseraylri kwidra sanaka apawcungulane ki lagaganesu ku tacekecekelane, madha kitudrudrulru kwini ki kadaengane lini. Tamatamaku; amaniaku ku drulrusu, ka tacekecekelanesu.”

Akibaadhane ki swa Lrivi ku lamanemane

²¹ Ku Tamatama kawariva, “Wamalranga naku ku patarumara ki swa Iseraylri nakwane ku vaeva ki nipau mangealane si baai ki swa Lrivi. Kikai amani ku balrithane ki takadrekadrengane lini ki Alrivilrivi ka balrawbau.

²² Ku drumane ku swa Iseraylri madha mwamwanga dethe ki Alrivilrivi ka balrawbau, amani lu pasalriu si kipapacai.

²³ Twalai kaiasasane, kathane ku swa Lrivi kulri kadrenge ki Alrivilrivi ka balrawbau, kicapili sanaka awngane ki Alrivilrivi ka balrawbau. Kikai lrika apasuswane numi palralrawthunga ka kakudhane. Ku swa Lrivi ikai ki swa Iseraylri kai lri maka pikai ku lrika palralrawthu ku tacekecekelane.

²⁴ Asi lwiyane kwini wamalranga naku kwini vaevane ki nipau mangealane ka acebe patarumara nakwane ki swa Iseraylri si baai liniane. Lakamani ku kawrivali liniane, kwini lalasu kai lri maka pikainga ku palralrawthu ku tacekecekelane.”

Abaadhane ka vaevane ki nipau mangealane ki swa Lrivi

²⁵ Ku Tamatama wadrekase ki Musi

²⁶ cuna ki swa Lrivi iya kai, “Lu tarumaranga numi kwini baai ki Tamatama numiane kwini patarumara ki swa Iseraylri sanaka vaevane ki nipau mangealane, malra ku vaevane ki nipau mangealane tunipawkalrivilane ka acebe, si patarumara ki Tamatama.

²⁷ Kikai nipawkalrivilane ka acebe mararaamau kwini ki tarapautaleke lu malra ku nikitalekane si bavane ka bava ku patarumara lini.

²⁸ Lu mia kikai, kunumi mialriya patwalai ki swa Iseraylri kudra ki nimalrane ka vaevane ki nipau mangealane, ka amani kudra Tamatamane ka nipawkalrivilane ka acebe si peelanga patarumara. Kunumi malra kikai nipawkalrivilane ka acebe si baai ki barakalai ka Arungu,

²⁹ patwaladha ki kitaleke numi malra kwidra mathaithariringa.

³⁰ Lu malra numi kudra takamathaithariranenga si patarumaranga, kai lri katumane paasuru ku drumane. Mia ki tara kauawngu lu maka patarumaranga pwatedra ku drumane.

³¹ Kunumi si wacekecekele numi kai lri susu ku taikaiyane si kane kwini la tedrane, asi lwiyane kwini amani ku takaungane numi ki vaivai ikai ki Alrivilrivi ka balrawbau.

³² Lu maka patarumaranga numi kwini takatharirane baai ki Tamatama, ala kane kwini tedranenga kadrwa ku pasalrivane; ai lu kaiyana patarumara kwidra taka tharirane si kane sanaka patarumara, amani ku wakudrulru ki tinu saniangane ki swa Iseraylri, lri tara kipapacai.”