Taasipane 17 - Ngudradreadrekadhane Ka Sisiu 魯凱語聖經

Ukudru ki Arungu

¹ Ku Tamatama kawariva ki Musi,

² “Cuna ki swa Iseraylri ani baai muswane ku 12 ku ukudru, patwalai kwini ki tarasangililuku ki lazuku si paka vaevaeva, la pacase ku nagane lini kwini ki ukudru.

³ La pacasa ku nagane ki Arungu pikai kwini ki ukudru ki swa Lrivi. Savavaeva kwini tarasangililuku ki lazuku.

⁴ Malra kikai 12 ka ukudru pwa ki Alrivilrivi ka balrawbau, si picucubungu ki Langiane, ka amani ku tamadradresenganeli muswane.

⁵ Kwidra pilrili ka umawmase ku ukudruini lri rigarigi. Lu mia kikai, Lri kainaku pakalilisinga ki swa Iseraylri, kai lri thurunga kiecebe numiane.”

⁶ Ku Musi la cunu kwini ki tarasangililuku ki lazuku ki swa Iseraylri si baai iniane paka vaeva ku ukudru, elrelre laka 12; ku ukudru ki Arungu la pataelre kwini ukudru ki drumane.

⁷ Ku Musi la malra kwini la ukudru pudaane ki Alrivilrivi ka balrawbau, si picucubungu ki Langiane ki Tamatama.

⁸ Saka samakapusale, ku Musi la mudaane ki Alrivilrivi ka balrawbau, la drele kwini swakaiyane ki zuku ki Lrivi ka ukudru ki Arungu la rigariginga, si pupunga, la ngipaipainga, pumadru kalreme ku alumundu!

⁹ Ku Musi la malra kwini la ukudru padrele ki swa Iseraylri; la makitu drelenga. Kwini la tarasangililuku la malra kwini ukudru lini iluku siwlri.

¹⁰ Ku Tamatama la kawriva ki Musi, “Malra kwini ukudru ki Arungu sawlri picucubungu ki Langiane, apikaiyane pudringai kikai ukudru, tusapakipapawlringavane ki wabaebalre ka swa Iseraylri: Lwiyasi la pacungulu kalilisi, lri tara pacai.”

¹¹ Ku Musi la singikai ku drekase ki Tamatama pangimia.

¹² Ku swa Iseraylri la kawriva ki Musi, “Kiasalrunga nai!

¹³ Sanaka ngwadadethe ki Alrivilrivi ka balrawbau lri pacai. Lu mia kwini, wapacainga nai makanaelre!”