Taasipane 16 - Ngudradreadrekadhane Ka Sisiu 魯凱語聖經

Tabaebalreane ki Kura, Dathane si Abirame

^1-2 Ku Kura ka lalake ki Izehare swakai Kuhathe ka ricingi ki swa Lrivi; wabaebalre ki Musi. Si karedele kwini ki tadrusa ka lalake ki Ilriabe ka zuku ki Riwbingi ka sia Dathane si Abirame, si Unge ka lalake ki Pilithe, si drumane ka ta 250 ku nipilriane patwalai ki mapapangale, ka sanaganane ka tarasangililuku.

³ Yasarubu ikai cucubungu ki Musi si Arungu, la iya kai liniane, “Pasialribate numi paramuru! Kai mapapangale Twaumasane; ku Tamatama watapalra mitane. Anu ngitatwabeelenge, si lribate ki mapapangale ki Tamatama?”

⁴ Sa kilalra ku Musi kikai vaga la guruthungane ikai daedae sukubu.

⁵ Ala kawriva ki Kura si kwini ki lapapalraini, “Lwiya luka mialrealre, ku Tamatama lri pelaela mitane, la ku aneane ku swakai iniane; lri dawlu kwini ki umawmaseini, kwini ki pilrini; ikai ki tapatarumaramarane adethe iniane.

^6-7 Lwiya luka mialrealre, kusu si kwini lapapalrasu iluka ku tapikaiyane ki taliane, la pikai ku lrangele si taliane, malra iluku mwa ki tapatarumaramarane. Ala tadredrele, ikai mitane luka aneane ku pilri ki Tamatama. Kunumi ka swa Lrivi pasialribate numi turamuru!”

⁸ Ku Musi la pacungulu kawriva ki Kura, “Kunumi ka swa Lrivi, kilalra!

⁹ Ku Twaumase ki swa Iseraylri wapilri numiane patwalai ki mapapangale, la maka dulru numi ngudadeethe iniane, ikai ki Alrivilrivi ka balrawbau ki Tamatama kipuawngane, si lapulapu la marasikaikai ki mapapangale. Lu kidremedreme numi kikai tikiane ka awngane?

¹⁰ Wabaai numiane si drumane ka swa Lrivi kikai lrigu, la kidredreedremeana numi ku tamalra kikai awngane ki barakalai iyaiya?

¹¹ La kalisi numi ki Arungu, ku tangimiamiane, kunumi si la thadalradalrane numi ala ka wabaebalre numi ki Tamatama!”

¹² Ku Musi la pamwa ku umawmase dawlu ki Dathane si Abirame, ai kwini lalasu la iya kai, “Kai nai lri mwa!

¹³ Wailukusu naiane katwase kavai mathariri ka kadaengane Izipiti, pakai ku apapacadhane naiane pikai calragulragu, kikai kaiyana makakelrete? Si nau atamatama kaekadrenge iya naiane?

¹⁴ Kaisu maka wailuku naiane mwa ki mwalwalwaludru ku mireke si valu ka kadaengane, la kaisu baai naiane ku kadaengane si babudwane tutacekecekelane nai. Walrilrilrigilisu naiane, kai nai lri mwa!”

¹⁵ Ku Musi la kalisi. Si iya kai ki Tamatama, “Kiatubiaku muswane madha tarumaramara kikai patarumara kai ki laumawmase. Kadrwa ku tatulisianeli liniane; adravane ka tikiyane ka ruba kadrwa ku tamalraneli.”

¹⁶ Ku Musi la kawriva ki Kura, “Lwiya kusu si kwini ta 250 kwini twapapalra muswane lri mwa ki Alrivilrivi ka balrawbau ki Tamatama makanaelre; Ku Arungu mialri ka lri mwa kwini.

¹⁷ Kunumi ka tangeea mailuka ku tatalianane, si pasuete ku taliane, la pikai ki tapatarumaramarane.”

¹⁸ Kwini lalasu la makitu iluku ku tatalianane, la pasuete ku lrangele si taliane, la taelre ki Musi si Arungu acegecege ikai lrawlrawdru ki Alrivilrivi ka balrawbau.

¹⁹ Ku Kura la sarubu ki mapapangale si icucubungu ki lrawlrawdru ki Alrivilrivi ka balrawbau, la acegecege cucubungu ki Musi si Arungu. Ala kiriimu, ku draredrare ki Tamatama athingalane liniane.

²⁰ Ku Tamatama la kawriva ki Musi si Arungu,

²¹ “Kunumi acegecega, si adaila kikai ki laumawmase; lri pakakaaiyaku amudu liniane.”

²² Ai, ku Musi si Arungu waguruthungane idaedae, si iya kai, “Twaumase, amanisu ku tasingikaiyane sanaka niake. Lu pasalriu ku tangeea, lri pacepesu kaelaela nguelre kai ki mapapangale?”

²³ Ku Tamatama kawariva ki Musi,

²⁴ “Pelaela ki mapapangale, kidaila ki balrawbau ki Kura, Dathane si Abirame iya liniane.”

²⁵ Ku Musi si lamarudrange ki swa Iseraylri la karedele mwa ki Dathane si Abirame.

²⁶ La iya kai ki mapapangale, “Kunumi kidaila kikai ki balrawbau ki tanganganga, madha sucipacipau ki lamanemane lini. Lwiyasi kai numi kilalra, kunumi lri ngwalai numi kikai pasalrivane lini si kipaelre liniane kiamudu.”

²⁷ Kwini lalasu la katwase kidaili ki balrawbau ki Kura, Dathane si Abirame. Ku Dathane si Abirame la iluku ki labaibai si lalake lini mulatadre, si acegecege ikai ki lrawlrawdru ki balrawbau lini.

²⁸ Ku Musi la kawriva ki mapapangale, “Kikai lri thingalenga numi, ala ka amani ku Tamatama ka siakawlu nakwane pia kikai, kainaku ka amani ka nau pangimia kai liniane amia.

²⁹ Lwiyasi kikai laumawmase la kai katumane, kai kipathavungu, ku Tamatama kaika siakawlu nakwane.

³⁰ Ai, lwiyasi ku Tamatama la kirimu pia ku kaika nimatikaiyaneana ku manemane, la aegacane ku kadaengane, si malra thamukulu kikai ki laumawmase si lamanemane lini patuelre, la papanianianiiake liniane mucilri mwa swadriadringi, lri thingale numi kikai laumawmase ala ka wacilri ki Tamatama.”

³¹ Ku Musi samaka kawriva, kwidra tapudrapalane ki Dathane si Kura ku kadaengane la aegacane,

³² la malra liniane si wacekecekele lini, si latwapapalra ki Kura si lamanemane lini patuelre thamukulu.

³³ Kwini lalasu panianianiiake karedele ki lamanemane lini mucilri muswadriadringi. Kwini kadaengane la ikai belenge liniane siwlriane maelre, kwini lalasu la kai adrelanenga.

³⁴ Kwini yakai kwini ku la swa Iseraylri la makitu kilalra ku tubi lini karaleale lini, la katwase mawbebere makanaelre, si karaleale iya kai, “Kirarimwa mawbebere! Amani lu malra thamukulu mitane ka kadaengane!”

³⁵ La pacungulu ku Tamatama pwalebe ku apwi si lama amudu kwini ki pwatalialiane ka ta 250 ku laumawmase.

Tatalianane

³⁶ Ku Tamatama kawariva ki Musi,

³⁷ “Lu mwa pelaela ki Ilriazare ka lalake ki barakalai ka Arungu, lu mwa mwalra kavai sangu lamane ki kia lama kipapacai ka laumawmase ka bulavane ka tatalianane, la malra ka lrangele ki tatalianane sabulu pwa talidrumane, asi lwiyane kavai tatalianane tinumabulane.

³⁸ Sa kipatarumara pwa ki tapatarumaramarane ki Tamatama, amani ku takitumabulane. Lakamani kwidra amalrane kikai tatalianane ki lri tara kipapaacai ka pasalriu ka umawmase, si tangetange tulubiiri, tusacaecaebane ki tapatarumaramarane. Lri kamani ku sapakipapawlringavane ki swa Iseraylri.”

³⁹ Ku barakalai ka Ilriazare la malra kwini lriwlu ka tatalianane, tangetange tulubiiri, tusacaecaebane ki tapatarumaramarane.

⁴⁰ Kikai sapakipapawlringavane ki swa Iseraylri, lu kaika mwabaibalrithi ki Arungu kai lri maka mwa ki tapatarumaramarane si patarumara ki Tamatama; lu ikai ku pasalriu, lri kipangimia ki Kura si twapapalra iniane kiamudu. Kikai kakudhane singiakai ku tadrekasane ki Ilriazare ki Tamatama pangukai ki Musi pangimia.

Palribulu ki mapapangale ku Arungu

⁴¹ Saka samakapusale, ku mapapangale makanaelre malisi ki Musi si Arungu iya kai, “Papacai numi ki kawkawlu ki Tamatama.”

⁴² Kwini lalasu la isarubu si mwa kidrikisi ku vaga lini ki Musi si Arungu, la ngibangulu papia ki Alrivilrivi ka balrawbau, la makitu drele ku ememe sa kabungu ki Alrivilrivi ka balrawbau; ku draredrare ki Tamatama la mutaluvaivai.

⁴³ Ku Musi si Arungu la acegecege mucucubungu ki Alrivilrivi ka balrawbau;

⁴⁴ ku Tamatama kawariva ki Musi,

⁴⁵ “Kidaila kikai ki laumawmase. Lri pikaiyaku kikai amudu liniane!” Kwini tadrusa la guruthungane idaedae;

⁴⁶ ku Musi la kawriva ki Arungu, “Malra ka tataliananesu si mwa kai, la malra kwini yakai ki tapatarumaramarane ka lrangele puadringi, ala malra ku taliane pubelenge ki lrangele, la kisaswarau pwa kavai ki mapapangale, si pasikai liniane marasikai ku lrisi ki pakabula. Lu kirarimwa! Ku sakaelaelane ki Tamatama pathagithagilinga, wasarasarawnga ka swalrubu.”

⁴⁷ La pangimia ku vaga ki Musi ku Arungu, mailuku ku tatalianane mwa kwini ki yasarubu ka mapapangale. La drele saraunga ku swalrubu, la malra ku taliane pubelenge ki lrangele, si pasikai ki mapapangale marasikai ku lrisi ki pakabula.

⁴⁸ Ku swalrubu la idrengere. La acegecege ikabicelrakane ki panianianiake si wapacai ka laumawmase.

⁴⁹ Kai paelre asipi kwidra ngwalai ki tabalreane ki Kura si pacai ku laumawmase, kikai ku wapacai ta 14,700 ku umawmase.

⁵⁰ Sa idrengerenga ku swalrubu, ku Arungu la siwlri mwa ki Musi kavai lrawlrawdru ki Alrivilrivi ka balrawbau.