Taasipane 14 - Ngudradreadrekadhane Ka Sisiu 魯凱語聖經

Malisilisi kai swa Iseraylri

¹ Ku mapapangale ki swa Iseraylri wataleare dadange si tubitubi.

² Kwini lalasu malisilisi ki Musi si Arungu iya kai, “Maesaesai pacai nai ikai Izipiti ikai calragulragu!

³ Ku Tamatama ani kiriimu iluku naiane mwa kavai ki kadaengane? Lri tara kipapacai nai, kai lalalake si labaibai nai lri tara kiravase. Lu siwlri nai mu Izipiti kaika mathaithariri?”

⁴ Kwini lalasu la maiyaiya kai, “Ala tangipapilri ku tangea ku kiacapili ani iluku mitane siwlri mwa Izipiti!”

⁵ Ku Musi si Arungu la ikai cucubungu ki mapapangale guruthungane idaedae,

⁶ ku lalake ki Nunge ka Yesua si lalake ki Yepuni ka Kalebe kikai tadrusa ka asepai la kwalri ku kidremedreme si thuriace ku laimai lini,

⁷ la kawriva ki mapapangale, “Kwini lrilriu nai ka kadaengane saniange ka mathariri turamuru ka kadaengane.

⁸ Lwiyasi ku Tamatama la kadalame mitane, lri iluku mitane mwa kavai, si baai mitane kavai mwalwalwaludru ku mireke si valu ka kadaengane.

⁹ Kunumi madha baebaebalre ki Tamatama, madha mukulukuludru ki umawmase ki swakai kavai. Lri pakadwaita pamalebe liniane. Ku Tamatama watapalra mitane; pamalebenga kwini ki palakebe liniane ka latwaumase lini. Lakamani kunumi madha mukuludru!”

¹⁰ Ai ku mapapangale wakukuludru liniane, pasana arakai ku lrenege papacai kwini ki tadrusa. Ai la kirimu, ku mapapangale la drele ku draredrare ki Tamatama athingalane ibelenge ki Alrivilrivi ka balrawbau.

Wainulri pasikai ki mapapangale ku Musi

¹¹ Ku Tamatama kawariva ki Musi, “Kikai laumawmase lu piakai kalrase nakwane lri tara thainwana? Kai lalasu lu mia kai, kai sudralru nakwane lalri tarathainwana? Adravane ikaiyaku liniane pia ku pinangu Twaumasane ka puku, laka sakamiana kai kasalru nakwane.

¹² Lri pulebeaku ku swalrubu si amudu liniane, ai lri cegecegaku muswane atama ki vaeva ka kuni; ku kunisu lrika masapupukwane ki kuni lini!”

¹³ Ai, ku Musi kawariva ki Tamatama, “Arakaisu ku maadrau ku pukusu sangiluku kikai ki laumawmase kidaili Izipiti. Lu kilalra ku swa Izipiti ku tapangimianesu marasikai kikai ki mapapangale,

¹⁴ kwini lalasu lri pelaela ki swakai kaika laumawmase. Ki kai laumawmase kai kialalranga ku pangukai muswane ka Tamatama ka watapalrasu naiane. Ku ememesu lu ibelenge naiane, pathingalanesu athingalane naiane. Luka vaiyane, yakaisu ki ulrudru ka ememe sangiluku naiane; lukamaungu, yakaisu ki ulrudru ka apwi sangiluku naiane.

¹⁵ Kikai asasane, lwiyasi papacaisu ki kawkawlusu, kwidra kialalranga ku naganesu ku lakuni lri iya kai,

¹⁶ kwini papacaisu ki kawkawlusu pikai calragulragu amani sa kaisu maka dulru sangiluku liniane mudaane kwini ki pukawnungasu baai liniane ka kadaengane.

¹⁷ Lakamani, kikai kiatubiaku muswane ka Tamatamali pathingalana ku saniange ku pukusu, si pangimia kwini pukawnungasu. Naamiasu kikai,

¹⁸ ‘Amaniaku ka Tamatama; kainaku ka maduai kaelaela. Swaete nakwane ku thalradhane; pacepaku ki pasalrivane si pasalriu. Ai, kainaku lri tukakadrwa ku pasalrivane ki yakai ku pasalrivane, lri tara ngwaladhaku ki pasalrivane ki marudrawdrange si pathavungu ki lagagane lini, pakela ki sakatulru sakasupate ki zidai ki lagagane.’

¹⁹ Tamatama, kiatubiaku singikaiya ku saniange ka kai maelaela ku sakialibake si pacepe ku pasalrivane kai ki laumawmase, mia ku takatwasane lini Izipiti ka tapacepanesu liniane.”

²⁰ Ku Tamatama la tubalre, “Lri pangimiaku kwini kitubisu pacepe liniane.

²¹ Ai, lri papiaku ki takapalralrawthane ka niakeli kiketekete; mia ki draredrareli suete ikai kai ki kadaengane ka tengatengane.

²² Kikai laumawmase lri tara kakadrwa ku natangeanga kulri maka panianianiake si mudaane kavai ki kadaengane. Kwini lalasu nawadrelenga ku draredrareli, la drelenga ku takaunganeli ku pinangu Twaumasane ka puku ikai Izipiti si calragulragu, ai laka sakamiiana apapelaelaela kituthiathingale nakwane, kai kilalra nakwane.

²³ Kai lalasu lu tumane kai lri maka mudaane kwini pukawnungali baai ki cucungulane lini ka kadaengane. Kwidra malrase nakwane ku umawmase, kadrwa ku natangeanga kulri maka mudaane kavai ki kadaengane.

²⁴ Ai ka sasiakawluli ka Kalebe makaela liniane; tatukucingalrane nakwane ka kidremedremeini, lakamani, lri sangilukaku iniane mwa kwini ki tamwaneini lrilriu ka kadaengane; ku mwabaibalrithi iniane lrika linianenga kwini kadaengane,

²⁵ kwini taikaiyane ki swa Amaleke si swa Kanange kaiasasane ka valrwalru; lwiya, kunumi lri siwlriwlri numi, papia kwini kadadalranane ki laveke Suize si mwa calragulragu.”

Ku Tamatama pathavungu ki swa Iseraylri

²⁶ Ku Tamatama kawariva ki Musi si Arungu,

²⁷ “Kikai ngialisiane ka umawmase lri tarathainwana kalilisi nakwane? Makakelretenga ku takilalraneli ku kalisilisi lini!

²⁸ Lu mwa pelaela liniane, ‘Lri papiaku ki takapalralrawthane ka niakeli kiketekete: Lri pangimiaku ku takitubiane numi marasikai numiane. Kunaku Tamatamaku; amiaku kikai pelaela.

²⁹ Lri tara makitu pacai numi; ku kinawmasane numi lri tubakebake ikai calragulragu. Asi lwiyane malisi numi nakwane, ikai numiane ku tara mapusalenga ku caili papubebelenge numiane ku umawmase, kadrwa ku natangeeanga kulri maka mudaane kavai ki kadaengane.

³⁰ Napalraingaku paikai numiane kavai; ai kathane ka Kalebe si Yesua, kadrwa ku natangeanga kulri maka mudaane.

³¹ Lri kiravase ku lalake nai amia numi, ai lri ilukaku liniane mudaane kwini kalrase numi ka kadaengane; kavai kadaengane lrika amani ku cekele lini.

³² Lri pacai numi ikai calragulragu,

³³ ku lalalake numi la lri ikai calragulragu acaicali taramasupatele ka caili, ngwalai kwini kaika takasalrwane numi si kipadradresenge ku akwalriane, pakeela ku tapacadhane numi kawtu.

³⁴ Kunumi lri siamece numi ku pasalrivane numi, si tarumara ku akwalriane taramasupatele ka caili, ika nitara cailane ku balrithane ki nimaka valane ki tamaka masupatelane numi ku vai lrilriu. Lu mia kikai, ala lri thingale numi ka kiaecebaku numiane.

³⁵ Kiaketeketaku si pangimia kai kiecebe numiane ka yaelreelre si kainganai kiecebe nakwane ka ngialisiane ka mapapangale. Kunumi ka tangeea lri makitu pacai numi ikai calragulragu. Kunaku Tamatamaku; amiaku kai pelaela.’ ”

^36-37 Ku sikawlu ki Musi pamwa lrilriu kavai kadaengane kwini lataralrilriu mailuku ku kaika tangimiamiane ku vaga kela pelaela, la dawlu ku akalisiane lini ki mapapangale ki Tamatama. Lakamani ku Tamatama pakia mwa liniane ku swalrubu kwini lalasu la pacai.

³⁸ Kwini ki ta 12 ka taralrilriu kathanenga ku Yesua si Kalebe ka waudripi.

Aswalaalanga ku tamwane mucekele Kanange

³⁹ Ku Musi la malra kwini vaga ki Tamatama pelaela ki swa Iseraylri makanaelre; kwini lalasu la tubi turamuru.

⁴⁰ Saka samakapusale ki mialrealre, la katwase mwa tali lregelrege kikaruburu. Kwini lalasu amia kai, “Kikai lri mwa nai ku puvaganga ki Tamatama naiane ka kadaengane; wathingale nai ala ka pasalriu nai.”

⁴¹ Ai ku Musi la kawriva, “Kikai anu mia kai kilalra ku vaga ki Tamatama? Lutumane kai numi lri pangiesai!

⁴² Madha mwamwa! Ku Tamatama kai lri tapalra numiane, ku badha lri pamalebe numiane.

⁴³ Lu kipadradresenge numi ki swa Amaleke si swa Kanange, lri tara kipapacai numi. Ku Tamatama kai lri tapalra numiane, ngwalai kwini takalrasane numi iniane, kai lri tupalra numiane.”

⁴⁴ Ku Langiane ki Tamatama si Musi kadrwa ku takatwasane kidaili ki tasuladhane, kwini lalasu laka sakamia kagalremegeme mulregelrege.

⁴⁵ Ku yakai kwini tali lregelrege ka swa Amaleke si swa Kanange la kiecebe liniane, si pamalebe liniane, la kurisi liniane pakela ka Hurema.