Taasipane 13 - Ngudradreadrekadhane Ka Sisiu 魯凱語聖經

Lasepai

¹ Ku Tamatama kawariva ki Musi,

² “Kusu patwaladha ki tai 12 ka zuku pilri patangea ku tarasangililuku, si sikawlu liniane lrilriu mwa ka Kanange, kwini abadhaneli ki swa Iseraylri ka kadaengane.”

^3-15 Ku Musi kialalra ku drekase, la patwalai calragulragu Parange sikawlu pamwa ku ta 12 ku tarasangililuku. Ku nagane lini amani kai lebe: Zuku ki Riwbingi: Samwa ka lalake ki Zakure. Zuku ki Simiune: Sapate ka lalake ki Huri. Zuku ki Yuda: Kalebe ka lalake ki Yepuni. Zuku ki Isakare: Igale ka lalake ki Yusepe. Zuku ki Iparaime: Husia ka lalake ki Nunge. Zuku ki Biniyamingi: Paleti ka lalake ki Rapu. Zuku ki Zibulungu: Gadiele ka lalake ki Sudi. Zuku ki Manase: Gadi ka lalake ki Susi. Zuku ki Dange: Amiele ka lalake ki Gimali. Zuku ki Asere: Sethure ka lalake ki Mikaele. Zuku ki Napetali: Nahebi ka lalake ki Vupisi. Zuku ki Gade: Giule ka lalake ki Maki.

¹⁶ Kikai amani ku sikawlu ki Musi pamwa ka lataralrilriu. Ku Musi wamalra pela kwini nagane ki lalake ki Nunge ka Husia pasi Yesua.

¹⁷ Ku Musi sa pamwa liniane, wacunu liniane iya kai, “Twaladha kikai papia tali dradha, la mwa tali lrawdru ki kadaengane ki Kanange, ala katwase mwa ki tali lregelrege.

¹⁸ La dredrele kwini luka ngitwatumane ka cekele, lu tathainu ku yakai kwini ku umawmase, kwini laumawmase luka makecenge luka malrupi.

¹⁹ La drele kwini kadaengane luka mathariri luka malisi, ku umawmase luka yakai lrilringulu luka yakai ki nikepalane alradre ka cekele.

²⁰ La drele kwini dae luka malrange, lu ikai ku angatu ku angatungatu. Kunumi malra iluku ku lamadru ki angatu.” (Kikwini yacengecenge ka kalalremane ki budu.)

²¹ Kwini lalasu la katwase papia tali dradha, twalai lrawdru ki calragulragu ka Zingi katwase lrilriu pakela tali dradha adeethe ka Rihube ka salralriwgu Hamathe.

²² Kwini lalasu paswala mudaane tali lrawdru, ala mwa ka Hiburungu. Kwidra yakaikai kwini ku umawmase amani ku zuku ki Ahimane, Sesai si Talamai; kwini lalasu amani ku mwabaibalrithi ki tadradradrau ka Anake. (Kwini Hiburungu aswalala ki swa Zuane ka swa Izipiti kitu cekele ku nitara pitwane ka caili.)

²³ Kwini lalasu la kela ka vaalru Isekule, ikai kwini la thiabe nguvaeva ku ricingi ku budu, mwalaabece ku madru ka budu, lu mababaaca wadulru velevele. Kwini lalasu la mialri iluku ku langinanavate si icizike.

²⁴ Kwini kadaengane sia valrwalru ka Isekule, asi lwiyane amani sa thiabe ku swa Iseraylri ku makalra ku budu.

²⁵ Kwini lataralrilriu la taramasupatele ku vai ikai kwini lrilrilriu, ala siwlri kainganai.

²⁶ Mwa kwini Kadise ka calragulragu Parange, la pelaela ki Musi, Arungu si mapapangale ki swa Iseraylri kwini sanaka tadrelane lini, si padrele kwini mailuku lini kwini lamadru ki angatu.

²⁷ Kwini lalasu peaelaela ki Musi, “Walrilriu nai kwini ki talikai kavai ki kadaengane, la drele nai kwini mia ki mwalwalwaludru ku mireke si valu ka malrange ka kadaengane; kikai amani ku wacebe ikai kavai ka madru ki angatu.

²⁸ Ai ka swakai kavai ku laumawmase tagagarange turamuru; ku cekele lini laka taswadradrau takececenge. La dreleana nai ikai kavai kwidra lamwabaibalrithi ki tadradradrau ka Anake ka umawmase.

²⁹ Ku swa Amaleke yakai tali lrawdru; ku swa Hite, swa Yebuse si swa Amuri yakai tali lregelrege; ku swa Kanange yakai tali babiabila ki laveke Miditerania si babiabila kadravane Yuredange.”

³⁰ Ku Kalebe la sasa kwini ki la malisi ki Musi ku umawmase, iya kai, “Kikai naika wamwata drikisi kavai kadaengane; lri dulru kai pukuta sabelenge liniane.”

³¹ Ai, kwini tarwaelre ki Calebe kwini laumawmase la kawriva, “Ini, kadrwa ku adulrwane ku pukuta mwa kikaruburu liniane; sapupukwane mitane ka swakai kavai ka umawmase.”

³² Kwini lalasu la kirimunga malra kwini kaika tangimiamiane katwase pelaela ki swa Iseraylri pasarau. Kwini lalasu amia kai, “Kwini kitaletaleke ki swakai kavai kai lri makakelrete lapu ki swakai kavai ki laumawmase. Kwini drele nai sanaka umawmase yadrepele ka tadradrau.

³³ La drelelringa nai kwidra mwabaibalrithi ki tadradradrau ka Anake; lu ngikakidremedreme nai mararaamaunga nai ki apapawku ku tikianane, kwini lalasu lu drele, laka miyaiya nai kikai.”