Taasipane 12 - Ngudradreadrekadhane Ka Sisiu 魯凱語聖經

Kia pathavungu ku Miriame

¹ Ku Musi marudrange mwa ki tangea ka swa Kuse; ku Miriame si Arungu ngwalai kikai si kawriariva ki Musi.

² Amia kai, “Bekace ku Tamatama ka kathane ki Musi ku tapangukaiyaneini kawriva? Lumialrini kaika pangwakai naiane kawriva?” Kikai vaga kai la kilalra ku Tamatama.

³ Ku Musi amani kwidra ngiasasangate ku takaumawmasane; mangisasasaangatenga ki sanaka umawmase kai kawmasane.

⁴ Ku Tamatama la kirimu kawriva ki Musi, Arungu, Miriame, “Kunumi ka tatulru kela mudaane ki Alrivilrivi ka balrawbau.” La makitu mwa kwini.

⁵ Ku Tamatama la mulebe ikai ki ulrudru ka ememe, si acegecege ikai lrawlrawdru ki Alrivilrivi ka balrawbau, la dawlu liniane, “Arungu, Miriame!” Kwini tadrusa la mulatadre acegecege.

⁶ Ku Tamatama la kawriva, “Kunumi kilalra nau kawriva! Sa ikai ku yuginsia numiane, yakaiyaku ki maburusi cunu liniane ku tangimiamianeli, si ikai ki sipi kawriva liniane.

⁷ Ai lu kawrivaku ki sasiakawluli ka Musi makaela; siakawlaku iniane pakadrenge sanaka swa Iseraylri ka kawkawluli.

⁸ Lakamani ku maicubunguli iniane kawriva, si pudriadringai; kai arakai ku anazu. Kwi lasu pakeela ku wadrele ku tangimiamianeli! Kunumi anu maka thuru takiecebe iya ki sasiakawluli ka Musi?”

⁹ Ku Tamatama la kaelaela liniane; lakamani sa katwase,

¹⁰ ku ememe sa twalai ki Alrivilrivi ka balrawbau talulaela, ku kinawmasane ki Miriame la karaibiu, akabalrithi mia ki pasabu ku lrapungane. Ku Arungu la drele iniane karaibiu,

¹¹ la iya kai ki Musi, “Tamatamali, madha ngwalai ku tangikulrungane nai pasalriu si kipathavungu.

¹² Madha pangimiamia ki Miriame ki kiatulalake si apararamaunga kaburaburawnga ka wapacai ka yabarangane.”

¹³ Ku Musi la kitubi ki Tamatama, “Twaumase, kiatubiaku sulrava iniane!”

¹⁴ Ku Tamatama la tubalre ki Musi, “Lwiyasi ku tamaini la sungalrai ki lringauini, kwini alisu lri tara kiadiliana ku amaka pitulane kiarubwane! Lakamani, malra iniane emenge pulatadre ki tasuladhane makapitulu.”

¹⁵ Ku Miriame la kiemenge pilatadre ki tasuladhane makapitulu; ku mapapangale lri mukalava iniane lu siwlringa lri musuburu ku tasuladhane lini.

¹⁶ Kwini lalasu matwase ka Hazeruthe, la kela calragulragu ka Parange si cegecege ku tasuladhane lini.