Taasipane 11 - Ngudradreadrekadhane Ka Sisiu 魯凱語聖經

Ikai Tabira akwiya

¹ Ku mapapangale kiapadradresenge ku laakwalriane, la kirimu akwiya ki Tamatama. Ku Tamatama sa kilalra la kagirimucu, si pulebe ku apwi mwa liniane, la lama kwini ki tali cigiane ki tasuladhane.

² Ku mapapangale kiatubi ki Musi. Ku Musi la inulri ki Tamatama, ku apwi la kaedrepe.

³ Kwini kadaengane sia Tabira, asi lwiyane ku apwi ki Tamatama nayakai kwini lama liniane.

Ku Musi wapilri ku tamapitulu ku Marudrange

⁴ Yakai kwidra la sakamaelanane ka zuku ku twapapalra ki swa Iseraylri; kwini lalasu la murikai ku akaneane ki beate. Ku swa Iseraylri la mialri kirimunga kalisi kawriva, “Ana ikai ku beate ku akaneaneta nai kathariri turamuru!

⁵ Sa ikaita Izipiti, takanekaneeaneta ku kange, si kai arakai ku paisu langai. La ikaiyana ku lakiulri, sikwa, ciwcai, kucai, swange, kwini la malimeeme ka laakaneane.

⁶ Kikainga kadrwanga ku pukuta. Luka vaivai kathane ku mana, kadrwanga ku drumane ku kanekaneta!”

⁷ Ku tangimiamiane ki mana mia ki tatiitiki ka berathe, naungi burau amia ku taka lrapungane.

^8-9 Luka maungu la twapapalra ki lamu mururu makakai ki tasuladhane. Luka kaiyane ki mialrealre, ku mapapangale la mulatadre siludu, si malra sarubu la dukulru tulrawlragumane, ala aga, tupange. Ku sangulremanane miyaiya ki niarakaiyane ku lawlau ki ulrive ka pange.

¹⁰ Ku mapapangale twaredelane makitu acegecege ikai ki lrawlrawdru ki balrawbau si makitu kalisilisi. Ku Tamatama la kalisi; sakilalra ku Musi la kipakwalri turamuru ku kidremedremeini, asi lwiyane kwini mapapangale malisi ki Twaumase.

¹¹ Ku Musi la kawriva ki Tamatama, “Asu piya kai pakwalri ki sasiakawlusu? Asu piya kai kalrase nakwane? Asu pakicapili nakwane sangiluku kai ki mapapangale?

¹² La kainaku kamani ka wabekace liniane ka twalalake liniane, malra liniane pangimia ki daini kebere, pakela kwini ki tapuvaganesu ki cucungulane lini ka kadaengane?

¹³ Lri muinwaku silape malra ku beate si pakane liniane? Kikai lalasu kai, kai yacelrecelrebenga kiara kalisi ki sapia kane ki beate!

¹⁴ Lu tangeangeaku kainaku lri maka kadrenge marasikai liniane; kainaku wabeserenga!

¹⁵ Lwiyasi piasu kai nakwane, kiatubiaku muswane kakurwaili, papacadhaili, la nau kai pianga kai kiadiadiadili ki akitusinalrelremeane.”

¹⁶ Ku Tamatama kawariva ki Musi, “Kusu sarubwa ku tamapitulu ku kia musakesakene ku lamarudrange, si iluku liniane mu Alrivilrivi ka balrawbau cucubungu nakwane, si acegecege ithili muswane.

¹⁷ Lri mulebeaku, ikai kwini kawriva muswane. Lri malra kwini baaili muswane ka ri vala liniane, kwini lalasu lalri dulrunga paralubu kwini la kicapilisu; kaisu lri muringeangeanga baca kikai amece.

¹⁸ Kusu cuna ki mapapangale iya kai, ‘Kunumi ngibabula, tangipapadulru ku akaneane ku beate lwiya. Ku Tamatama kialalranga ku lisiane rivwane numi, apia kane nai ku beate iya, maesaesai ikai Izipiti amia numi. Ku Tamatama kwini lri baai numiane ku beate, kunumi la tara kanea.

¹⁹ Kai numi lri kane maka vavaale maka pwapusale, maka lrialrimale maka mangeangeale ku vai, adravane ka amaka mapusale ku vai.

²⁰ Kunumi lri tara dramare numi kanekane ku beate, pakeela ku ngiabwale ki ngungwane numi ku beate, si lri kalraasenga numi. Kikai lri tara ngimia; asi lwiyane kwini malrase numi kwini ki yakai numiane ka Tamatama, si akwiya iniane, nai kai nai katwase Izipiti iya.’ ”

²¹ Ku Musi kawariva ki Tamatama, “Kai sangilukuli kai mapapangale tamanemele ka kudrai ku pangalane, la iyasu kai, lri baadhaku ku atara dramarane kane ku beate?

²² Yakai ku apawkelretane culu ku lwange ku kiu si pangulwadhane liniane? Adravane lu ngulreane ku lakange ki laveke kiau lulri makakelrete kane!”

²³ Ku Tamatama la tubalre, “Ku pukuli yakai ku talikaikaiyane? Kikai lri drelesu kai kawrivarivali lulri ngimia lutumane!”

²⁴ Ku Musi la mwa latadre, la pelaela patuelre kwini kawriva ki Tamatama. La sarubu ku tamapitulu ku lamarudrange, si paacegecege liniane ngithalringulu ki Alrivilrivi ka balrawbau.

²⁵ Ku Tamatama yakai ki ememe mulebe, si kawriva ki Musi, la malra kwini baaini ki Musi ka Ri vala kwini ki tamapitulu ka lamarudrange. Kwini Ri sa mulebe mwa ki kinawmasane lini, kwini lalasu la makitu ngimia ki yuginsia kikandu si kawriva, ai kaika tarathainu.

²⁶ La ikai ku tadrusa ku marudrange ka Ilridade si Midade la asurwana ikai ki tasuladhane, kai wamwa ki Alrivilrivi ka balrawbau, ikai kwini ki tasuladhane, ku Ri la mulebe mwa liniane, kwini lalasu la ngimia ki yuginsia kikandu si kawriva.

²⁷ Yakai ku tangea ku langukathabarane walrabwale mwa ki Musi, si pelaela kwini tapiane ki Ilridade si Midade ikai kwini ki tasuladhane.

²⁸ Ikai kwini, ku lalake ki Nunge ka Yesua la kawriva. Kai Yesua singika vavalake ka amani ku tara paraluralubu ki Musi. La kawriva ki Musi, “Tamatamali ruthuka liniane.”

²⁹ Ku Musi la tubalre, “ngwakaisu ki amuesadhaneli si pathalra? Palraingaku ku Tamatama la malra kikai Ri si vala sanaka kawkawluini, lani mia ki yuginsia makanaelre karaleale!”

³⁰ Ku Musi si tamapitulu ka lamarudrange ki swa Iseraylri la katwase siwlri mwa ki tasuladhane lini.

Ku Tamatama pwalebe ku thalingiebere

³¹ La kirimu, ku Tamatama la pavalrigi, ku twaredelane ku tharingiebele la twalai belenge ki laveke kainganai ngipalai, si ngulaleebe kai lribate ki 1 mituru ku abelengane. La idrengere ikai ki tasuladhane si ngiathalringulu, wasarau ikai ki druanga, yatali talrawane sapakalriwgu lrawdru dradha, macucucungulu ka lrailrailraagi.

³² Ku mapapangale la turakete taleare makitu pwalralra kwini ki tharingiebele; sakakaiyane laka thadaalrane turakete pwalralra, ku tangeangea ikai kau kudrulu ki kukingi ku pwalraini. Kwini lalasu la malra kwini thalingiebere pavai pikai ki tasuladhane.

³³ Sa kakalrana kwini akaneane lini ku beate, ku Tamatama la kaelaela liniane, si pulebe ku swalrubu mwa liniane.

³⁴ Kwini kadaengane sia Kiberuthe Hatava, “La mialri ka sia Ravane ka tadralredralrekane”, asi lwiyane amani sa pikai kwini dralreke ki apilrelrede ki beate ka laumawmase.

³⁵ Twalai kwini ki kadaengane, ku mapapangale la taluela mwa ka Hazeruthe, si ikai kwini cegecege ku tasuladhane.