Taasipane 10 - Ngudradreadrekadhane Ka Sisiu 魯凱語聖經

Gingi ka rapa

¹ Ku Tamatama kawariva ki Musi,

² “Kusu arakaiya ku gingi darepe tu drusa ku rapa, tusaarakaikaiyane dawlu ki mapapangale si samusubusuburane ki tasuladhane.

³ Kwini drusa ka rapa lu tara akulragi ngirapa, ku mapapangale lri isarubu ikai cucubungu ki lrawlrawdru ki Alrivilrivi ka balrawbau, ikai ngithalringulu muswane.

⁴ Lwiyasi ka vaeva ku gingi ku ngiarapa, kathane ku kiacapili ki lazuku ku lri isarubu mucucubungu muswane.

⁵ Lwiyasi la ngirapa tuedreekane si kirariimu, kwini sa talikai talrawane ka zuku lri musuburu ku tasuladhane.

⁶ Luka saka akupusale ngirapa tuedreekane, kwini sa tali lrawdru ka zuku lri musuburu ku tasuladhane. Lakamani, lu ngirapa akuedreke lri musuburu ku tasuladhane,

⁷ lu ngirapa akulragi wadawlu sarubu ki mapapangale.

⁸ Kikai drusa ka gingi ka rapa lrika amani ku ngwakai ki Arungu ka barakalai ka ngiarapa. “Kikai lebe kai kakudhane, lri pasusu numi pakeela ki mwabaibalrithi.

⁹ Lu ikai numi ki kadaengane numi kipadradresenge ku akikaruburane, pakai ku angipapalakebane, si kiecebe ki badha, lri arakai numi kikai drusa ka rapa si ngirapa pelaela ka makakaruburuburu. Kunaku ka Tamatama, ka Twaumase numi lri ngulringavaku numiane si paralubaku numiane, si palribulu numiane pakidaili ki badha.

¹⁰ Ikai ki takirararagadhane ka vai ki aswalaalanga ki vai ki dramare si drumane ka tatulrisisisiane, lu patarumaramara numi ku Lama ka lrisi si Sulivatane ka lrisi, ku numi ngirapa, la nau ngulringau si palribulu numiane, Tamatamaku ka Twaumase numi.”

Mwakadalranane si katwase ku swa Iseraylri

¹¹ Saka tara 2 ka caili ki saka 2 ka dramare ka 20 ki vai, ku takatwasane ki swa Iseraylri ka Izipiti, ku yabelenge ki Alrivilrivi ka balrawbau ki Tamatama ku kwakulavane ka ememe mwa belenge.

¹² Ku swa Iseraylri pathagili mwa ki kadalranane lini, si katwase kwini calragulragu Sinai. Ku kwakulavane ka ememe wakela calragulragu Parange, la idrengere ikai kwini.

¹³ Kwini lalasu pasusu ku drekase ki Tamatama ki Musi aru cucubungu,

¹⁴ lu aru cucubungu singiakaai ku tamasakaikaiyane. Ku aswalaalanga amani kwini swakai ki kalralradha ki Yuda, ku taingeane ka sakaredele arucucubungu. Ala ka lalake ki Aminadabe ka Nahasunge si sangiluku ki zuku ki swa Yuda;

¹⁵ lalake ki Zuare ka Nathaneile wasangiluku ki zuku ki Isakare,

¹⁶ lalake ki Hilungu ka Ilriabe wasangiluku ki zuku ki Zibulungu.

¹⁷ Samaka musuburunga ku Alrivilrivi ka balrawbau, amani ku zuku ki Geresune si Mirari ka wabulri kwini Alrivilrivi ka balrawbau si katwase.

¹⁸ Ku mwasakadrusa, kwini yakai ki kalralradha ki Riwbingi ka lri katwase, karededele ku sakaredelane katwase aru cucubungu. Ku lalake ki Sidiure ka Ilrizure wasangiluku ki zuku ki Riwbingi;

¹⁹ ku lalake ki Zurisadai ka Silumile wasangiluku ki zuku ki Simiune;

²⁰ ku lalake ki Diule ka Ilriasape wasangiluku ki zuku ki Gade.

²¹ Ala ka zuku ki Kuhathe ku matwase, si angeale ku saniange ka lawbubulu. Lu darurunga ki tasuladhane, ku Alrivilrivi ka balrawbau nicegeceganenga.

²² Ku mabibilrili katwase yai yakai ki kalralradha ki Iparaime, lai masakaikaai ku sakaredele katwase aru cucubungu. Ku lalake ki Amihude ka Ilrisama wasangiluku ki zuku ki Iparaime;

²³ ku lalake ki Pidazure ka Gamalile wasangiluku ki zuku ki manase;

²⁴ ku lalake ki Gidiuni ka Abidange wasangiluku ki zuku ki Biniyamingi.

²⁵ Ku abibiilrilinga katwase salrilrikudru palakebe amani ku yakai ki kalralradha ki Dange, la masakaikaai ku sakareedele aru cucubungu. Ku lalake ki Amisadai ka Ahiezere wasangiluku ki zuku ki Dange,

²⁶ ku lalake ki Ukerange ka Pagiele wasangiluku ki zuku ki Asere;

²⁷ ku lalake ki Inane ka Ahira wasangiluku ki zuku ki Napetali.

²⁸ Kikai amani ku tasuburanenga ki swa Iseraylri ku lri ka amasakaikaiyane aru cucubungu.

²⁹ Ku Musi la kawriva ki sakadaneini ka Huba ka lalake ki swa Midiange ka Yeteru, “Lri darurungata ki puvaga ki Tamatama baai mitane ka kadaengane. Ku Twaumase napwavaganga lri pangiradhekanaku ki swa Iseraylri, lakamani bwala tupapalra naiane, lri tara kipaelresu kisupilri ku angiradhekanane nai.”

³⁰ Ku Huba la kawriva, “Kainaku lri tupalra, lri siwlriaku mwa tavanane ki kadaananeli.”

³¹ Ku Musi la kawriva, “Madha katwatwase naiane. Wathingalesu kai calragulragu, ku lrika aikaiyane nai tutasuladhane, lrika amanisu ku wasangiluku si pelaelaela.

³² Lwiyasi tupapalrasu naiane, lri tara baai nai muswane kwidra patarumara naiane ki Tamatama sanaka akaesadhane taelreta kisupilri.”

Matwase mukadalranane ku swa Iseraylri

³³ Ku swa Iseraylri matwase kidaili ki saniange ka lregelrege Sinai, si aru cucubungu makatulrulu ku vai. Ku Langiane ki Tamatama sacucubungu liniane, pasikai liniane si silape ku tapakaiyane tutasuladhane.

³⁴ Kwini lalasu twalai ki taluvaale ka tasuladhane taluela mwa ki taluvale ka tasuladhane; lukavaiyane yakai ku kwakulavane ka ememe ki Tamatama ibelenge liniane.

³⁵ Lu katwase aru cucubungu ku Langiane, ku Musi kawariva, “Tamatama, kiatubi nai ngidrakala, pakatwase ki labadha, kwidra magirimucu muswane ani mawbebere!”

³⁶ Lu idrengere ku Langiane, ku Musi la kawriva, “Tamatama, kiatubi nai siwlria mwa ki tathathatha ka mapangale ka swa Iseraylri.”