Taasipane 1 - Ngudradreadrekadhane Ka Sisiu 魯凱語聖經

Aswalalanga ka taasipane ku umawmase ki swa Iseraylri

¹ Saka aswalalanga ka vai ki sakadrusa ka dramare ki sakadrusa ka caili ku takatwasane ka Izipiti ki swa Iseraylri, ku Tamatama yakai calragulragu ka Sinai idaane ki Alrivilrivi ka balrawbauini si kawriva ki Musi iya kai,

^2-3 “Kusu si Arungu kirimwa asipi ki umawmase ki swa Iseraylri, nguvavaeva ki zuku ki maretetese, si dadaanane drele pacase, malra pacase ku lanagane kwini ki taramapusalenga ku caili kulri dulru kikaruburu ka sawvalai.

⁴ Kunumi la patwaladha ki lazuku silape ku tangea ka tamatama kulri paralubu numiane.”

^5-16 Kikai lebe amani ku nipilriane ki lazuku ka kiacapili kulri pasikai kikai ki awngane: Zuku ki Riwbingi: Ilrizure ka lalake ki Sidiure. Zuku ki Simiune: Silumile ka lalake ki Zurisadai. Zuku ki Yuda: Nahasunge ka lalake ki Aminadabe. Zuku ki Isakare: Nathaneile ka lalake ki Zuare. Zuku ki Zibulungu: Ilriabe ka lalake ki Hilungu. Zuku ki Iparaime: Ilrisama ka lalake ki Amihude. Zuku ki Manase: Gamalile ka lalake ki Pidazure. Zuku ki Biniyamingi: Abidange ka lalake ki Gidiuni. Zuku ki Dange: Ahiezere ka lalake ki Amisadai. Zuku ki Asere: Pagiele ka lalake ki Ukerange. Zuku ki Gade: Ilriasape ka lalake ki Diule. Zuku ki Napetali: Ahira ka lalake ki Inane.

¹⁷ Ku Musi si Arungu kiaparalubu kikai ta 12 ka umawmase,

¹⁸ la ikai kwini ki aswalaalanga ki vai ka sakadrusa ka dramare sarubu nguelre ki mapapangale, la singikai ki sakamanemanane ka lamaretetese, ki ladadaanane pacase ki mapapangale. Sanaka taramapusalenga ku caili ku sawvalai makitu kipaasipi kipacase,

¹⁹ pangimia ku tadrekasane ki Tamatama. Ku Musi yakai calragulragu Sinai pacase ki mapapangale.

^20-46 Ku taramapusalenga ku caili papubebelenge ku lri dulru kikaruburu ku sawvalai, singikai ku tamasakaikaiyane ki maretetese, ki dadaanane, si nguvavaeva kipacase; laka sacucubungunga ku tinutakane ki Yakubu ka zuku ki Riwbingi. Ku nielreelreane ku umawmase ki lazuku amani kai yalebe: Zuku ki Riwbingi 46,500 Zuku ki Simiune 59,300 Zuku ki Gade 45,650 Zuku ki Yuda 74,600 Zuku ki Isakare 54,400 Zuku ki Zibulungu 57,400 Zuku ki Iparaime 40,500 Zuku ki Manase 32,200 Zuku ki Biniyamingi 35,400 Zuku ki Dange 62,700 Zuku ki Asere 41,500 Zuku ki Napetali 53,400 Paelreelre 603,550

⁴⁷ Ku swa Lrivi ka umawmase kai kiapaelre ki drumane ka zuku kipacase,

⁴⁸ asi lwiyane ku Tamatama nakawariva ki Musi,

⁴⁹ “Lu drelesu asipi ki wadulru kikaruburu ku umawmase, madha paelrelre ki zuku ki swa Lrivi.

⁵⁰ Kusu sikawla ki swa Lrivi ka umawmase lri marasikaikai ki tapikaiyane ki Langiane ka Alrivilrivi ka balrawbau si lalawbubulu; lri salri kikai lalawbubulu, ikai ki Alrivilrivi ka balrawbau marasikaikai. Ku balrawbau lini lri cegecege pangithalringulu ki Alrivilrivi ka balrawbau.

⁵¹ Lulri pataluela numi kai tasuladhane, kai swa Lrivi lri suburu kai Alrivilrivi ka balrawbau, ikai kwini ki bavane ka tasuladhane cegecege. Sanaka aneanenga ku ngwadadeethe ki Alrivilrivi ka balrawbau, lri tara kipapaacai.

⁵² Ku drumane ku swa Iseraylri lri cegecege ku tasuladhane, sanaka umawmase ikai kwini ki talikaini ka kalralradha, singikai kwini ki tairubwane ka kwapingi, lrika kemikeemi cegecege ku tasuladhane.

⁵³ Ai ku swa Lrivi lri ngithalringulu ki Alrivilrivi ka balrawbau cegecege ku tasuladhane si kadrenge amani lu ikai ku ngwadadeethe ki Alrivilrivi ka balrawbau, si pakagirimucu nakwane kaelaela lrumai ki mapapangale ki swa Iseraylri.”

⁵⁴ Ku swa Iseraylri singiakai ku tadrekasane ki Tamatama ki Musi ku vaga si pangimia.