Silringau 5 - Ngudradreadrekadhane Ka Sisiu 魯凱語聖經

Kiatubi ku akikakalithane

¹ Tamatama, ngulringava ku takipadradresengane nai, si maka drele ku takitusinalremeane nai.

² Ku takauawngane nai yakainga ki alrima ki kaika thingale nai ka laumawmase; ku maelane ka kuni ka laumawmase wamwanga ki daane nai ikaikai.

³ Amaninga nai kudra kadrwa ku tama ka lapakulrulrulu; ku latina nai awalibakane.

⁴ Lu baai nai ku paisu waungulu nai ku acilai, adravane ka satwapudhane ka angatu mialri madu langai.

⁵ Mia nai ki lwange ki rigi kipakatwase, la sicaemanenga ki sakwalrialri, kai maka isadra.

⁶ Ngwalai ku akaneane ku aga, akiciacia nai papia ki swa Izipiti si swa Asiria.

⁷ Ku cucungulane nai pasalriu, kaiasasane la kai ikainga, la ngwalailringa nai ku pasalrivane lini si kipakwalrialri.

⁸ Kiaruthuku nai ki duri; kadrwa ku umawmase ku wadulru palribulu naiane patwalai ki alrima lini.

⁹ Ku papacapacai ki umawmase ku latanganganga swaete ubulane; ngwalai ku asilapane ku akaneane, palraainginga nai kidrangi.

¹⁰ Ngwalai nai ki silravane si karudame, kai lrangici mia ki taakakamane kaculu.

¹¹ Ku lataelrelre nai yakai Ziyungu lregelrege kitusinalreme; ku lalalake nai ka labaibai yakai ki lacekele Yuda kikabebetethe.

¹² Ku latarasangililuku naiane kiakerenge si kitakilili; ku latarudrawdrange nai kai kiausakene.

¹³ Ku lalangukathathabarane nai kiavutha mia ki duri pasilribulribu; ku lavavalake nai ngwalai ku tatukudrane ku angatu si tubakebake.

¹⁴ Ku latarudrawdrange kai wanenenenga ikai lrawlrawdru ki cekele; ku layacengecenge kai ngialebeleberenga kiraragai.

¹⁵ Ku akiragadhane twalainga ki kidremedreme nai kawlrau; ku atubiane ku kidremedreme mwabalrithinga ki adralradhane.

¹⁶ Ku pagamucu nai twalai ki awlru mucilri; pasalriwnga nai, kaiasasane la kikelanga nai ki amatikurwane.

¹⁷ Ngwalai nai kikai kai thingalenga ku apiane; ku lrese pakadrarumadrimi ki maca nai.

¹⁸ Asi lwiyane matiasepelenga Ziyungu lregelrege, ku kalailalri yakai ki taulrakavane masasawlriwlriwlri.

¹⁹ Ai, Tamatama, palralrawthusu magagemegeme ki puku; ku tarathudanesu palralrawthu ka kadrwa ku talikaiyane.

²⁰ Asu kawlainga cilri naiane? Luiganenga lai lri ngulringawsu naiane?

²¹ Tamatama, pangibangula siwlriwlri kai kidremedreme nai, si papia muswane. Pasiwlriwlria ku nasiaswalane ku lrigu nai!

²² Bekacesu ka palralraauthunga cilri naiane? Bekace kwi lisianesu kai alikaikaai?