Silringau 4 - Ngudradreadrekadhane Ka Sisiu 魯凱語聖經

Sa amakinga ku Yerusalrime

¹ Ku nawalikaliikathe ku kakingiane ani kakadrwanga ku ledra! Ku lrenege ki daane ki Twaumase maabate ikai kadadalranane ki cekele.

² Ku layacengecenge ki swa Ziyungu lu drele nai maru kakingianenga, kaiasasanenga la kitu langudidilrungunga.

³ Ku tawpungu ubulane wathingaleana pathuthu lapu ki lakukulu, kai kawkawluli laka ngimiyaiya ki yaubulane ka tuniau ka malilisi ka kadrwa ku kilibakane.

⁴ Kwi lalasu pakasilrau pakakadhame si pacai ku lalrulai; ku lavavalake lu muriakaneane, kadrwa ku umawmase ku wabaai liniane.

⁵ Kudra natara kanekane ku mayakaikaai ku akaneane ku umawmase, kaiasasanenga kiara silravane si pacai ikai kadalranane ki cekele; kudra nakadrwa ku taulrane ku tacekecekelane ku umawmase, kaiasasanenga wamwanga tabulubulwane silasilape ku akaneane.

⁶ Ku takipathavungane ki kawkawluli, pakilrialringau ki laumawmase ki swa Sudume. Ku Twaumase sa amudu ki Sudume, yasasane padaalru.

⁷ Ku latalialalaita sakwa ka mabwabula ka malrawlrapungu ki pasabu ki mireke; kwi lalasu sakwa kagarange, la ngicaeme ku tacebeane.

⁸ Kikai asasanenga kwi lalasu wapece ikai ki kadadalranane cekele, kadrwa ku umawmase ku wathingale; ku lringau lini maicecelrenge ki lrangele, lrangicinga sikakathane ku wacabu ki culrale, ku riladhane mianga ki angatu.

⁹ Ku wapacai ikai ki tamakakaruburane, mathaithariri ki kiara silravane pacai ka umawmase; asi lwiyane kwini bibilrili lri kiulucu ki silravane ala pacai.

¹⁰ Ku kipadradresenge ki kawkawluli ku amatikurwane matiaukuludru turamuru, ku makilialibake ka tina wamalra ki lalakeini aga tuakaneane si kane!

¹¹ Ku Tamatama wagugu pakaelre ku girimucaneini, kelrakelrabe ku lisiane, walama Ziyungu si paadratane.

¹² Kai kawmasane kadrwa ku umawmase ku masalru, adravane ka talialalai ki lakuni kai masalru: Ku aneaneane ku tarakikaruburu kulri dulru mudaane ki lrawlrawdru cekele Yerusalrime.

¹³ Ai kudra ngimiyaiya kikai ngiamia; asi lwiyane ku yuginsiaini si barakalai pasalriu, yakai ki cekele papacai ki kadrwa ku pasalrivane ka umawmase.

¹⁴ Kudra la tarasangililuku ka tabebelengeini mia ki mukimukici ka yakadalranane ki cekele masasawlriwlriwlri; kwi lalasu malrinini ki kinawmasane ku kudrulru ka erai, kadrwa ku umawmase ku walreme kielre liniane.

¹⁵ Ku laumawmase papia liniane tawtau: Katwasa, kusu ka kukudrulrane ka lamanemane! Madha dedethe nakwane! Ngwalai kikai kwi lalasu la katwatwatuasenga acaicaicali, kadrwa ku natangeeanga ku kuni ku mwabangalre tarumara liniane.

¹⁶ Ku Tamatama kai makalithinga liniane; amanini ka pakatwase pasawvagavagai liniane. Ku Twaumase kai twakucingalrenga ki barakalai nai; la kai kilibakenga ki tarasangililuku naiane.

¹⁷ Mwakalava nai ku wakela palribulu, laka kadrwa ku wakelakela ku paralubu; laka tasidramaane nai ki kadrwa ku puku paralubu ka kuni nai.

¹⁸ Ku badha maececebe saladha naiane, la kai nai lreme ikai ki kadalranane ki cekele dadavace. Ku vai nai kiasalrunga! Wakelanga ku alikaiyane nai!

¹⁹ Ku wasaladhaladha naiane ku umawmase mariaridare ki ngiapalapalai ka takanga; kwi lalasu yakai lregelrege saladha lri pwalra naiane, yakai calragulragu lepenge ukalavalava naiane.

²⁰ Kwi lalasu pwalra ki pilri ki Tamatama si cegecege atalialalai, maru pwaalranga si iluku ku niake nai, ka amani kudra talialalai ka satalutalu nai kalri palribulu naiane kalrabuthu ki talialalai ki magarange ka badha.

²¹ Yakaikai Uze ka swa Idume, kunumi ngilralrainga si pakaelre ulrakalrakai kiraragai! Ku amatikurwane numi lri padaalrunga si kela, lai lri mialri numi ka vilralralrakane kiaruburubwane.

²² Ku Ziyungu maka wasawlringa ku balrithane ki pasalrivane; ku Tamatama kai lri palralrawthu paacaicali naiane. Ai, swa Idume, ku Tamatama lri pathavungu muswane; lri putaluvaivai ku tapasalrivanesu.