Silringau 3 - Ngudradreadrekadhane Ka Sisiu 魯凱語聖經

Pathavungu, ngitatupela, siadrama

¹ Kiapathavungaku ki Twaumase, si kaadrau ku kilringawli ku sakwalrialri.

² Ku Twaumase wamalra nakwane pakatwase mwa ki dradrimitane, la aru ngukaikaaiaku ki dradrimitane.

³ Kai watelrai lrumai nakwane! Kakadrua ku taulrane.

⁴ Pangiabetelra ki lrangicili; wacelra ki culraleli.

⁵ La pangithalringulu nakwane raedre ku balingibingi, arakai ku kucingalrane sakwalrialri lringulu nakwane.

⁶ Si vutha nakwane paikai ki dradrimitane, mia ki wapacainga kawlai ka umawmase.

⁷ Ku Twaumase arakai ku kicikici kerenge nakwane; akiaemengenga naku, si kai maka muberenga.

⁸ Akwadravaku karaleale ku akipalribulane, ai, ku Twaumase kai kialalra.

⁹ Ku Twaumase arakai ku madrau ku lrenege telenge ki kadalrananeli, la piapiladhanaku dadavace kai maka adili.

¹⁰ Ku Twaumase mia ki cumai lepenge mukalava nakwane, mia ki raiyungu kainganai papia nakwane lredepe.

¹¹ La pakatwase nakwane ki madrau ka kadalranane, la malra nakwane baburau, si cilri puthili.

¹² Wabilakace ku bu si pwa ku lraili, la tudukipi nakwane si lrailraili.

¹³ Ku lrailini, watengadre mwa ki kinawmasaneli.

¹⁴ Ku laumawmase taulralralrakaadhane nakwane; amaninga naku kudra sawlralrakai ki laumawmase.

¹⁵ Ku Twaumase paswaete nakwane ku amatikurwane, la vutha nakwane paungulu ku mapalili ku bava.

¹⁶ Wasakidri cakena arakai kai lringawli, la arakai ku lrenege ridraidri si ngetele ki valisili.

¹⁷ Ku tacekecekelaneli kadrwa ku sulivatane, marimurunga naku luka manemane kwini sakiararagai.

¹⁸ Ku taikaiyaneli kawmasane kaika thaininunga ku vai, maretegenga ku sasiadradramali ki Tamatama.

¹⁹ Lu kidremedremaku ku sakwalrialri si taacaicalianeli, tenganelriinga ka mapalili kakedepalre ka yakai ku padavake ka sasulravane.

²⁰ Kainaku watelrai kidredreme kilakikai, kai kidremedremeli masakwakua si kakucingalre avavaga.

²¹ Ai, lu kidremedremaku ku drumane, ku sasiadradramali peaeelanga kudalai.

²² Ku thalradhane ki Tamatama kai lri karetege apalralrawthu, ku kalithaneini kai lri idrengere palralrawthu;

²³ mia ki malialiare ku alrivilrivane, mia ki walrawlrau ka vai ku takapatengatenganane.

²⁴ Ku Tamatama canidili patuelre; ku sasiadradramali piakainga naku iniane.

²⁵ Ku kiasilape iniane, ku masalru satalu iniane ku umawmase, ku Tamatama lri drima baai ku akaesadhane.

²⁶ Ngwalai kikai nai papiata sidrama iniane, kiadili ku kidremedreme mukalava ku sapalribulaneini.

²⁷ Sa icengecengeanata nai kicawcakwaneta angeale ku sakiadiadili ka tikungu.

²⁸ Lu kipadradresengeta ku sakwalrialri, nai neneta si kiaadili;

²⁹ nai guruthunganeta si pasalaladha, alau lri ikaaiyana ku asidramane.

³⁰ Adravane kilrumadhane kitusinalrelreme, nai kiadilita patuelre.

³¹ Ku Tamatama swaete ku sakialibake, kai lri kawlai cilri mitane.

³² Adravane pakwalri ki kidremedremeta, ai ku thalradhane mitane makeecenge kai lri akabalrithi.

³³ Kaika waranau ku apakwalriane mitane, pakawpungu mitane.

³⁴ Ku yakai taememengane kwalrialrialri, ku Tamatama lri tara kakaalithi!

³⁵ Lu kikabebetethe kikai baai ki Abebeelengenga ka Twaumase ka kindri ki umawmase, ku Tamatama lri tara kakaalithi!

³⁶ Ku kiavutha kitupasalrivane si ikai tasaibaibangane, ku Tamatama lri tara kakaalithi!

³⁷ Lu kai drekase ku Tamatama, kadrwa ku umawmase kulri dulru pangimia ku manemane.

³⁸ Ku amatikurwane ku akaesadhane, twalai ki drekase ki abebeelengenga patuelre.

³⁹ Kai umawmase ngwalai ki pasalrivane si kipathavungu, tumane madu kalisi?

⁴⁰ Nai ngidradreleta ku kakwakudhane, si siwlriwlri mwa ki Tamatama.

⁴¹ Naika mwaelebeta kai kidremedreme, si papia ki yabelenge ka Twaumase kitubi:

⁴² Wabaebalre nai si pasalriu, la kaisu pacepe naiane.

⁴³ Yakaisu ki girimucane saladha naiane; kadrwa ku taulranesu papacai naiane.

⁴⁴ Arakaisu ku kulrulrungu kabungu, la kai maka daruru belenge ku inulri nai.

⁴⁵ Wamalrasu naiane tuacilriane ka ubulu ikai ki sanaka umawmase, si kicilri ki umawmase.

⁴⁶ Ku badha nai mwalralrakai naiane, si kai telrai tumeamelrace naiane.

⁴⁷ Kiapadradresenge nai ngilribate ki amatikurwane si kasuburu kamudu, la ikai ki kiwcane ki matiaukukuludru ngilribalribate ki vai.

⁴⁸ Ngwalai ku takipadradresedresengane kikabebetethe ki sakacekeleli, kai lreseli mia ki kadravane mwalwaludru.

⁴⁹ Kai lreseli mwalwaludru ngibawbalrulu, kai kareteretege ku amwaludrane,

⁵⁰ mwakalavalava ku akikakurwane ki Tamatama, twalai belenge masiasirare drele.

⁵¹ Lu drelaku ki lalabaibai ku takipadradresengane ikai ki cekele, kwalri angeange kai kidremedremeli.

⁵² Kwi badha wavutha kalisi nakwane, si pwalra nakwane, mia ki wasaladha pwalra ki adhadhame.

⁵³ Kwi lalasu patakunianiiake nakwane verevere pwa ki lrubange, la arakai ku lrenege celrepe ki lrawlrawdru.

⁵⁴ Ku acilai walrenelreenepenga nakwane; lu kidremedremaku, wakelanga ku apacadhaneli.

⁵⁵ Tamatama, twalai ki valrulrange adringi, kiatubiaku ku naganesu.

⁵⁶ Papiaku muswane kitubi, la kilalrangasu nakwane.

⁵⁷ Twabalrengasu nakwane, si pelaela nakwane madha kakiwcu iya.

⁵⁸ Tamatama, pasiakaisu nakwane kawriva ku takivuthaneli kitupasalrivane; palribulungasu ki niakeli.

⁵⁹ Wathingalesu ku takitulisianeli; kamania ku twaringaringau tukakadrwa ku pasalrivaneli.

⁶⁰ Wathingalesu ku tapangimiane kalisi nakwane ki badha, ku tapiane kisanu kabebetethe nakwane.

⁶¹ Tamatama, kialalrasu ku tatusinalremeane nakwane; la thingalesu ku kisanu piapia lini ku ngialisiane patuelre.

⁶² Kwi lalasu amaani ka vaga nakwane awngu ku vai, la madrekadrekadrekase ku apangimiane kabebetethe nakwane.

⁶³ Kwi lalasu twalai ki mialrealre pakela ki maungu, mwalralralrakai nakwane.

⁶⁴ Tamatama, pathavunga liniane; singikaiya ku kakwakudhane lini si bilri liniane.

⁶⁵ Puswa liniane, kwi lalasu lani kasulringa.

⁶⁶ Ikaiya ki girimucanesu saladha liniane, lani twalai ki kadaengane kamudu.