Silringau 2 - Ngudradreadrekadhane Ka Sisiu 魯凱語聖經

Ku Tamatama pathavungu ki Yerusalrime

¹ Ku Tamatama yakai ki lisiane, la kabungu ku dradrimitane Ziyungu. Mwalra ku ngiesadhanane ki swa Iseraylri; yakai ki takalisiananeini ka vai, adravane ka daaneini wacilri.

² Ku Tamatama wamudu ki sanaka cekele ki Yuda, kadrwa ku kurwane si taulra. Ikai ki girimucaneini waburuku patuelre ku salakebane ki cekele ku raedre ka kepale. Pakiarubwane ki kuni si latarasangililuku.

³ Ikai ki girimucaneini mabebetethe ku puku ki swa Iseraylri; lu kela ku badha kikaruburu, kai paralubu. Mia ki kelrabe ka apwi amudu mitane, walamanga patueelre.

⁴ Ku Twaumase papia mitane bilakace ku bu si pwa ku lraili, mia ki walraili ki badha. Papacai ki kadalameta ka umawmase; si papia ki Yerusalrime patuelre putaluvaivai ku girimucaneini.

⁵ Ku Tamatama mia ki badha kabebetethe ki swa Iseraylri; acinilrianenga ku kepale ki swa Iseraylri si daane ki talialalai; wadrima ku atubiane karaleale ki laumawmase ki swa Yuda.

⁶ Ku Twaumase pakababurukunga kwidra tayelrelrelreaneta si sukusukubu ka daane ki Twaumase; ku Tamatama ikai Ziyungu paliakainga ku tatulrisisisiane si Taisadrasadrane ka vai. Yakai ki girimucaneini cilri ki talialalai si barakalai.

⁷ Ku Tamatama wacilri ki tapatarumaramaraneini, si Alrivilrivi ka taikaikaiyane; ku Tamatama palraingi ki badha kabebetethe ku raedre ngithalringulu ki daane ki talialalai. Ikai ki daane ki Tamatama, kwi lalasu mia ki twalrisisisi kirararagai kangariangi.

⁸ Ku Tamatama malrithethe ku aburukane ku raedre ki cekele Ziyungu; arakai ku lekete ka calrisi lekete, lri drele thingale ku takamudaneini. Lri pakarededele ki abeelenge ka daane si ngiathalringulu ka raedre paukadrulu.

⁹ Ku lrawlrawdru ki cekele kiadralreke ki sangukaburukane; ku tadrukudrukurane ki lrawlrawdru matatithiri. Ku latalialalai kiapakatwase acaicali. Kadrwa ku umawmase ku wabulrubulru ku hulrice; ku yuginsia kai maka tarwamaranga ku twalai ki Tamatama ku maburusi.

¹⁰ Ku latarudrawdrange ki swa Ziyungu wanene ikai cakena, la iceelrebe ka kadrwa ku lingau. Kwi lalasu sialaimai ku kaimadhane, la sabulu ku thuvugu pwa ki awlru; ku latawvailelekete ki swa Yerusalrime masulringa guruthungane si gurapangane ikai cakena.

¹¹ Kai macali ngwalai ku tatubiane si kai maka drelenga; kai abakeli kiangeange turamuru! Ngwaladhaku ki sakacekeleli ku takikabebetethane si tubi turamuru; ku lavavalake si lalrulai yakai ki kadalranane ki cekele retese tubakebake.

¹² Papia ki latina lini kitubi: Yainu ku akaneane? Yainu ku aungulane? Kwi lalasu mia ki madula tubakebake ikadalranane, si kibibi ki tina ngiabaalai nguniakane.

¹³ Yerusalrime, lri dulrwaku tumanaiya? Lri tumanaku dulru sasa muswane? Aneane ku ngimiyaiya muswane kipadradresenge ku miyaiya kai ku amatikurwane? Ku amatikurwanesu mia ki laveke ka kadrwa ku babiabila; yakai ku manemane ku asidramanesu?

¹⁴ Ku yuginsiasu atavuvulrucane sikakathane ku thingale; ku maburusi lini kaika patengatengane. Kwi lalasu lu sikiu kai pwataluvaivaivai ku pasalrivanesu, ku iyaiya lini madraedraedraangelre patuelre; kwi lalasu pakagarange muswane ku kaika angitatupelane.

¹⁵ Ku lawalribalribate ku umawmase twadreadrekase lu drele muswane makanaelre; kwi lalasu wavetevete ku awlru si ulralrakai ku takamudane ki Yerusalrime, si iya kai: Kikai amani kudra kiatulrepenge ka cekele? Amani kai kudra senasenai drengedrengere ki kiacaebe ki belenge ka cekele?

¹⁶ Sanaka baadha twasinalrelreme muswane makanaelre; kwi lalasu apararitaiti ku lisiane muswane. Kwi lalasu mwalralrakai iya kai: Alata kabebetethe iniane! Kudra mukalavalavata ku vai wakelanga!

¹⁷ Ku Tamatama ngiamianga ku nau pia iyaiyaini; ku Twaumase singiakainga ku tapakipapawlringavaneini mitane ku siaswalane, wamudu mitane kadrwa ku taulrane. Pakaci ki badhata, la pangwalai ku taamakianeta si kiraragai kwi lalasu.

¹⁸ Yerusalrime, ku raedre ki cekelesu ani papia ki Tamatama kitubi! Ku lresesu ki vaiyane ki maungu ani mia ki kadravane mwalwalwaludru! Asu ka tatubitubiane kai kasipelrepelrenge!

¹⁹ Ngidrakala! Luka maungu lri ngidrakalesu, lu balribalrithi ku awngane papia ki Tamatama karaleale, papia kwi kidremedreme kitubi ku akakurwaneini ki lalalakesu; ku lalalake ngwalai ki silravane retese tubakebake ikai ki kadadalranane ki cekele.

²⁰ Drela, Tamatama, drela ki pakwalrialrialrisu ka laumawmase! Ku ababai wakane ki kadalameini ka lrulai! Ku labarakalai layuginsia yakai ki daane ki Twaumase kipapacai!

²¹ Ku tarudrawdrange si langukathathabarane thadalrane ikai ki kadalranane cekele tubakebake pacai; ku layacengecenge ka sawvalai si ababai kiara dramu ki badha pacai. Yakaisu ki lisiane ka vai papacai liniane, ka kadrwa ku natikianenga ku kalithane.

²² Wadawlusu ki badha si pangithalringulu nakwane kirararagai, ku matiaukukuludru ngiathalringulu nakwane; ikai ki takalisianesu ka vai, kadrwa ku umawmase kulri dulru mubere. Kwi lalasu papacai ki lapuli ka kathalraili ka lalalake.