Silringau 1 - Ngudradreadrekadhane Ka Sisiu 魯凱語聖經

Tatubiane kiangeange ku kidremedreme ki swa Yerusalrime

¹ Kunadruma ku tatakalrane ki umawmase ka cekele, kaiasasanenga matisesepele isarare ikai kwini. Ku nakiausakesakene ki yakawmasane, kaiasasanenga mia ki walibakane ka ababai ku sepelane. Kunadruma ku kiatutaelrelre ki talialalai ka lasiu, kikainga aduringa ka sasiakawlu.

² Kwi alisu wataleare tubi, lresenga ki lringau. Kunadruma ku lakatalragiane, kikainga kadrwa ku natangeeanga ku wakela sasa iniane. Ku matatutalragini kialangainga iniane, abadhanga iniane makanaelre.

³ Ku laumawmase ki swa Yuda matiakuru ka duri, kiavutha kipakatwase ki cekele. Kwi lalasu acaicali mwa ki maelane ka cekele, kadrwa ku amwane ikai sutelrai ku kadaengane. Kwi lalasu kiangithalringulu ki badha, kadrwa ku angukaiyane mubere.

⁴ Ku samamwa Ziyungu ku kadalranane matiasepele; kadrwa ku umawmase ku matwase mwa tulrisisi. Ku wasenasenai ikai ki daane ki Twaumase watubitubi; ku labarakalai adanganenga sikakathane. Ku lrawlrawdru ki cekele matikecelre; ku Ziyungu watubitubi ku kidremedreme.

⁵ Ku badhaini atawkinga; ku puku ki lalasu waruthukunga iniane. Asi lwiyane kwi alisu makalra ku pasalrivane, ku Tamatama pakwalri iniane; ku lalalakeini kiaravase ki badha puadaili.

⁶ Ku lrigu ki Yerusalrime ngialribatenga. Ku tarasangililuku iniane mia ki salawngane, ngwalai ki silravane si aru turamuru; kwi lalasu mwabere ku tasaladhane ki taraalwalupu, la pakaelrenga ku puku.

⁷ Aubulanenga si acinilrianenga matisepele ka Yerusalrime, lu ngulrialringavane ku nangiradhekanane. Kai alisu sa ikai ki alrima ki badha, kadrwa ku umawmase kulri paralubu iniane. Ku pamaki iniane ku umawmase wadrele iniane, si ulralrakai ku taamakianeini.

⁸ Ku tangiradhekananeini kadrwanga; kai alisu vialralralrakane, si kitudreadreadrekase ki umawmase. Adanganenga sikakathane ki alisu, ikai ki inwane kai wathuru utaluvaivai adrelane. Kai Yerusalrime maadrau turamuru ku pasalrivane, kudrulrunga ki kinawmasane.

⁹ Ku kudrulru ki alisu wasaelanga suete ki laimai si kunu, la kai thengete ku lrika angimianeini. Kai alisu masuburunga patuelre; kadrwa ku umawmase kulri sasa iniane. Sa akaci ku badhaini kai alisu kiatubi ki Tamatama ku akikakurwane.

¹⁰ Ku badha waravase ku tacekecekelaneini patuelre; kwi alisu wadrele liniane sa mudaane ki daane ki Twaumase ka amani kwidra pakaicilri ki Tamatama ki sakamaelanane ka umawmase mwa mudaane.

¹¹ Ku laumawmase wadadange, la mwa kidruanga silasilape ku akaneane; kwi lalasu arakai ku makucingalre ku lawbubulu balrithi ki akaneane, ku lrika apanianiakaneana lini. Ku kinauacekelane kiatubi: Tamatama, paswalebea drele; drelaili kai tangimiamianeli ka matisalregesege!

¹² Kwi alisu sanaka walribalribate ka umawmase kiatubi: Drela kai tangimiamianeli! Kadrwana ku umawmase ku ngimiyaiya nakwane ku sakwalrialri; kikai yai sa kalisilisi ku Tamatama wadrima baai nakwane kikai akwalriane.

¹³ Ku Tamatama patwalai belenge pulebe ku apwi, si lama ki laculraleli. Pwalravathe, la tubakebakaku ikai cakena. Wacilringa nakwane, la pakwalri turamuru nakwane awngu ki vai.

¹⁴ Ku Tamatama takiraraketane ku tapasalrivaneli patuelre, la malra elrelre, si kelrai pwa ki lreli, la kidrepetaku ka kadruanga ku puku. Ku Tamatama wamalra nakwane si baai ki badha; kadrwa ku pukuli kiecebe.

¹⁵ Ku Tamatama mwalralrakai ki lagaragarangeli makanaelre; pakainganai ku tapangale ka kwapingi si pamaki ki tagagagarangeli ka kwapingi. Ku Tamatama wadredre ki laumawmaseli, mararaamau lu dredre ki budu.

¹⁶ Ngwaladhaku kilakikai si tubi, kai maka yadrengere kai lrese. Kadrwa ku umawmase kulri sasa nakwane; kadrwa ku umawmase kulri dulru baai nakwane ku garangane ku kidremedreme. Ku badha akacinga nakwane; kai laumawmaseli kadruanga ku manemane lini.

¹⁷ Watalaku ku alrima ku akiparalubane, ai kadrwa ku umawmase ku mwabangalre paralubu nakwane. Ku Tamatama wadawlu ki badha, la twalai kidruanga kainganai lritungu kikaruburu nakwane; kwi lalasu twakukudrulrane ka lamanemane nakwane.

¹⁸ Ai, madringelrese ku Tamatama, asi lwiyane wabaebalreaku ku drekaseini. Ikai kidruanga ka laumawmase, kilalra; drela kai takwalrialrianeli. Ku layacengecengeli ka lasawvalai ka laababai kiaravasenga!

¹⁹ Kiatubiaku ku akiparalubane ki latutalragili, ai kwi lalasu kai paralubu. Ngwalai ku asilapane ku akaneane, si pacungulwana panianiake, ku labarakalai si latarasangililuku wapacai ikai kadalranane ki cekele.

²⁰ Tamatama, drela kai sakwalrialrili! Drela kai takwalriane ki abakeli! Kai kidremedremeli ngwalai ki pasalrivane si tubi kasuburu. Ikai kadalranane ki cekele yakai ku mapapacapacai, ikai ki daane yakai ku wapacai.

²¹ Kilalra kai dangeli; kadrwa ku umawmase kulri sasa nakwane. Ku badha ngwalai ku tapapianesu nakwane pulebe ku amatikurwane si kiraragai. Ku pukawnungasu ku vai ani kela; ku badha ani mia nakwane kwalri.

²² Asu kaelaela ku ngilisianane lini; pathavunga liniane, mia ku tapasalrivaneli si pathavungusu nakwane. Yakaiyaku ki atubiane si dadange; kai kidremedremeli kadrwa ku talikaiyane ki sakwalrialri.