Senai 8 - Ngudradreadrekadhane Ka Sisiu 魯凱語聖經

¹ Anatumane la miasu ki betakaneli ka sawvalai, ka wathuthunga ku esebe ki thuthu ki ina; luka ngimiyaiya kikai, lu kipadradresengaku muswane ikai kadalranane ki cekele, la uma muswane, kadrwa ku aneane ku lri kawriariva.

² Lri ililukaku muswane mwa ki daane ki ina, lasu pelaela nakwane ku apangimianeli kadalame muswane. Lri paungulaku ku nipaibwane ku sangwalreme ka bava muswane, la paungulu muswane ku nitubavane ka nginanavate.

³ Kwi viri ka alrimasu paukudru ki awlruli; kwi vanale ka alrimasu la kebere nakwane.

⁴ Laababai ki swa Yerusalrime, palraingaili, maadha aceaceace naiane, maadha vangavangavange ki dalamane nai.

Mwasaka eneme ka senai (Laababai ki swa Yerusalrime)

⁵ Kavai mararake ki kadalameini si twalalai calragulragu udradhadradha kainganai yai aneane? Ikai tailebe ki pinku ka angatu, waaceacaku muswane. Ikai kwini, ku tinasu ngwalai muswane kiangeange; ikai kwini, ku tinasu twalalake muswane.

(Marudrarudrange ka ababai)

⁶ Ku kidremedremesu ani kakathanaku ku papiasu muelebe; ku alrimasu ani kakathanaku ku keberesu. Kai dalamane mararaamau ki apacadhane ku kecengane; ku makakadalamane mararaamau ki swadriadringi ku kawlukulane. Pakelrabe ku apwi, mararaamau ki madrareange ka apwi kelrakelrakelrabe.

⁷ Kai acilai kai lri maka edrepe ki dalamane, kai lriau lai kai maka makalriwgu. Alaiyasi ikai ku umawmase ku kiasanu arakai ku tacekecekelane balrithi ki dalamane, kwini lasu lri tara kisidreekase.

(Labetakane ka sawvalai ki marudrarudrange ka ababai)

⁸ Ikai naiyanane yakai ku tangeea ku agili ka ababai, ku thuthuini kaiyana mwakesa. Ku langukathabarane la kelakela upapalange, lai lri tumane nai?

⁹ Kwi alisu anaka vaeva ka balingibingi ka raedre, lri pikai nai belenge tupalralramathane arakai ku gingi; kwi alisu anaka vaeva ka lrawlrawdru, lri arakai nai ku cedare ka angatu ka baali thalringulu lakebe iniane.

(Marudrarudrange ka ababai)

¹⁰ Vaevaku ka balingibingi ka raedre, kai drusa ka thuthuli amani kudra yabelenge ka palralramathane. Kwi kadalameli wathingale, patwaladhaku iniane ku angulwadhaanane kaswalreke ku kidremedreme.

(Marudrarudrange ka sawvalai)

¹¹ Ku Sulumungu ikai Baale Hamungu yakai ku taluvale ku babudubudu, kwi lalasu la pakisaalru ki tarakawaungu; ku tangeea lri baai ku padulru ku kudrulu ka gingi.

¹² Ku kudrulu ka gingi lri papia ki Sulumungu, ku drusa ka idai ka gingi lri papia ki tarakawaungu; ai kunaku yakai ku nakwane ku babudubudu.

¹³ Kadalameli, nau patwalai ki babudubudu kilalra ku lingausu; kai papalrali mwakalavalava ku akilalrane lu kawrivasu.

(Marudrarudrange ka ababai)

¹⁴ Kadalameli, bwala kirarimwa, mia ki kiu, mia ki lrulai ka salawngane, kathaithaithariri kivavavange ikai ki lalregelrege ki la sangwalreme ka ububulane.