Senai 7 - Ngudradreadrekadhane Ka Sisiu 魯凱語聖經(Marudrarudrange ka sawvalai) 1 Mathaithaariringa ku tangivelevelane ka tawvailekete, kwi tasikeceane ki drapalesu ala mathaariri! Kwi tangimiane ki vagisisu darepe ki tarapapacase! 2 Kwi pekesu mia ki lrimemeteke ka kupu ki bava, nipasueteane ku mathariri ku bava. Kwi takilrisaisanesu mia ki ererece ka mugi, ngiathalringulu ku bariangalai. 3 Kwi maecebe kwi thuthusu mia ki tukapia kitulalake ka lrulai ka salawngane, mia ki drusa ka kiu. 4 Kwi lresu mia ki niara valisane ki zu ka palralramathane; kwi macasu mia ki baibaaiu cekele ka Hesebunge, ka wadeethe lrawlrawdru ki kiamatikaikai ka cekele. Kwi ngungwanesu mia ki daane ka abeelenge ka Lebanungu ku tharirane, acegeecege papia tali Damasekuse. 5 Kwi awlrusu madringeelrese mia ki lregelrege Karemele. Kwi tharirane ki isiusu mia ki calrisi ka makalrilau elelethe, pakathalrebeethebe ki kidremedreme ki talialalai. 6 Matharirisu turamuru, matidadalame! Kwi dalamanesu pakabusuku ki umawmase! 7 Kwi tacebeane ki kinawmasanesu mia ki abare; kwi maecebe kwi thuthusu mia ki la pawracungu ka budu. 8 Lri ubelengaku ki abare si malra ku madru. Lu drelaku, kwi maecebe kwi thuthusu mia ki la pawracungu ka budu; kwi niakesu mia ki pinku sangulreme; 9 lu umasu mia ki amani kudra mathaithaariringa ka bava. Kikai mathariri ka bava ani mwaludru mwa ki bibiane si valisi ki kadalameli, mwaludru suete ikai ki ngudwi. (Marudrarudrange ka ababai) 10 Inianenga naku ki kadalameli; ku kadalameli madalame akuli nakwane. 11 Kadalameli, bwala, takatwase muubulane, si ikai ki tikiyane ka cekele sulai. 12 Sana ledra lri ngidrakaleta, si mwa ki babudubudu, drele ki budu lu rigariginga lutumane, drele ki budu lu ngipaipainga lutumane, ku nginanavate lu ngipaipainga lutumane; ikai kwini, kai dalamaneli lri baadhaku patarumara muswane. 13 Lri sabalrisu ku sapakagaragarangane ka madru; ku makaelaeela ku mathariri ka madru ki angatu lri abate pikai ki lrawlrawdru ki daaneta. Kadalameli, adravane ka supilri ka bavane, pasiakaaiyaku muswane pudringai. |