Senai 6 - Ngudradreadrekadhane Ka Sisiu 魯凱語聖經

(Laababai ki swa Yerusalrime)

¹ Kusu ka mathaithaariringa ki ababai, mwainu kudra kadalamesu? Ala pelaela naiane, luka ngwakakai inu ki kadalranane katwase, la nai paralubu muswane silape.

(Marudrarudrange ka ababai)

² Ku kadalameli wamwa ki babengelradhaneini, kwi babengelradhane yacengeecenge ngipaipai kwi hunsingi ka bengelrai. Kwi lasu yakai kwini pagwagwagu ki lakiu, si malramalra ku bariangalai.

³ Nakwane ki kadalameli, kunaku laka iniane; kwi lasu yakai ki mawbariangangalai pagwagwagu ki lakiu.

Mwasaka lrima ka senai (Marudrarudrange ka sawvalai)

⁴ Kadalameli, miasu ki Tireza ku tharirane! La miasu Yerusalrime veleevele ki kidremedreme ki umawmase! Miasu ki watilibi ka kalralradha athingaalane!

⁵ Ala padrwadruma, si kai drele nakwane; kwi macasu pakawpungu nakwane. Kwi isiusu mia ki laicecelrenge ka kiu. Ka twalai lregelrege Gileade ititituku mulrawlrawlrawdru.

⁶ Kwi valisisu mia ki nitaukaciacianane ka ubale, ku lrapungane mia ki nikiubawbalane ka kiu ka nitaupabanabanavane pakabula, maececebe katilibi, kadrwa ku navaevanga ku asakivalane.

⁷ Kwi lringausu ikai adringi ki sakabungane madirele, mia ki nipau drusane ka nginanavate.

⁸ Ku talialalai tamanemele ku taelrelreini la tamavalrulu ku labaibaini; ku yakaikai ki daane ki talialalai ku laababai kaika asiasipane.

⁹ Ai tangeangeea ku kadalameli; kwi alisu mia ki tavagu ku matidalamane. Kwi alisu vaeva ka kathalrai ki tinaini, ka kathalrai ki tinaini ka vaeva ka lalake. Ku laababai lu drele iniane wadrengedreengere iniane makanaelre; ku lataelrelre si lalabaibai ki talialalai mialri drengedreengere iniane makanaelre.

¹⁰ Kwini mia ki walrawlrau lu masiasirare drele yai aneane? Kwi alisu paledra ki umawmase, mia ki dramare ku tharirane! Mia ki vai ku ledrane! Mia ki watilibi ka kalralradha athingaalane!

¹¹ Mwalrawdraku mwa ki laalemundu ka angatu, lri siavavaku ku latatitiki ka laangatu ikai valrwalru ki lregelrege, ku rigarigi ki cebe ka budu, ku bengelrai ki nginanavate.

¹² La kirimwaku manugiligili; amanisu ka pautaluvaivai ku dalamane ki kidremedremeli, mia ki garagarange ka mwa belenge ki sakikaruburane ka palridingi si mukalavalava ku akikaruburane.

(Laababai ki swa Yerusalrime)

¹³ Itituka, ududulri, ka ababai ki Sulame, udulria, la nau siavava kwi tangivelevelanesu. Sa udulridulriaku ikai ki maecebe ki siavavava, anu drele nakwane?