Senai 5 - Ngudradreadrekadhane Ka Sisiu 魯凱語聖經

(Marudrarudrange ka sawvalai)

¹ Kadalameli, ka rakeraketeli, mwadanaku ki mawivaivaili, si malra ku sasulravane si sangulrelreme, la kane ku valu, la ungulu ku bava si mirekeli. Lasiasilangane, kanea, ungula, pakeela ku takabusukane numi ikai ki dalamane!

(Laababai ki swa Yerusalrime) Mwasaka supate ka senai (Marudrarudrange ka ababai)

² Adravane apecaku yai, masimeameace kai kidremedremeli; wasipiaku si kidrele ki kadalameli yakai latadre lrawlrawdru bangebangebange. Kadalameli, pamudaanaili, kadalameli, ka tavaguli. Swaete ki awlruli kai lamu; ikai ki maungu kiapakadapenge ki kulrulrungu kai isiuli.

(Marudrarudrange ka sawvalai) (Marudrarudrange ka ababai)

³ Mwalaimainga naku, lri tumanaku ngidrakaalenga si silaimai? Tawadrapalenga naku, lri tumanaku pakakudrulrunga?

⁴ Kwi kadalameli pangwakai ki takangacacane ki lrawlrawdru pudaane ku alrima, ngwalai ku tadethaneini, waitituku kai kidremedremeli.

⁵ Sa lri muelebaku si paudaane iniane; sa ecengaku ki taececengane ki lrawlrawdru, kai alrimali asese ku sasulravane, ki dadiputhane la adidi ku tulu ki sasulravane.

⁶ Pasiakaiyaku ki kadalameli muelebe ku lrawlrawdru, ai matwaseenga. Apia kilalraku ku lingauini! La silapaku iniane, ai kainaku maka kiadringai; wadawlaku iniane, ai kainaku maka kialalra lu tubalre.

⁷ Ku taradrangalrungalru ki cekele sa dadadavace sakamaungu kiapadradresenge nakwane; kwi lalasu walrumai nakwane, la pakadula nakwane; kudra wadrangalrungalru ki kepale ki cekele waribici si malra ku palimemelreli.

⁸ Laababai ki swa Yerusalrime, palraingaili. Alaiyasi kipadradresenge numi ki kadalameli, pelaelaanga iniane, ngwaladhaku ki barengerane si kacaeme apece.

(Laababai ki swa Yerusalrime)

⁹ Kusu ka mathaithaariringa ki sanaka ababai, kwi kadalamesu mathaithariri ki palrapalra? Manemane ku tamukalrivilaneini, si lri palraingi nai kwi takitubianesu?

(Marudrarudrange ka ababai)

¹⁰ Kwi kadalameli, mathariri, la ngicaeme ku tacebeane, kadrwa ku walribate sanaka umawmase.

¹¹ Mia ki kingi kwi awlruini; ku isiuini mia ki bikabiki, mia ki talralreba ku icelrengane.

¹² Ku macaini mia ki tavagu ka yakai babiabila ki vaalru, arakai ku mireke mubanau, acegecege ikai babiabila ki vaalru.

¹³ Ku cimini maecebe mia ki babengelradhane ka matingulwalwadhane, paswaeete lredreke ku sangwalreme ka ubulu. Ku bibianeini mia ki labariangalai, kiapakadapengenga ki tulu ki sasulravane.

¹⁴ Ku alrimaini mararaamau, siakalathe ku tinukucingalrane ka lrenege. Ku kinawmasaneini mia ki valisi ki zu ku sasulapane, la cabu arakai ku salesese ka tinukucingalrane ka lrenege.

¹⁵ Ku drapaleini mia ki lrawlrapungu ka lrenege ka ulrudru, cegecege pikai ki taetale ka kakingiane. Ku tangivelevelaneini mia ki lregelrege Lebanungu matisalru, mia ki maeelrenge ka cedare ka angatu.

¹⁶ Ku ngudwini sangwalreme matiuma; pakabusuku ki umawmase! Laababai ki swa Yerusalrime, kwi lasu amani ku kadalameli, ka palrali.