Senai 4 - Ngudradreadrekadhane Ka Sisiu 魯凱語聖經

(Marudrarudrange ka sawvalai)

¹ Kadalameli, ala matharirisu! Kwi macasu mia ki maca ki tavagu, ikai lrilrikudru ki sangikakabungane walikalikathe kwi ledra ki dalamane. Kwi isiusu mia ki laicecelrenge ka kiu, twalai ka lregelrege Gileade itituku mulebe.

² Kwi valisisu mia ki nitaukaciacianane ka ubale, miakau nitaupabanabanavane si garucu ka nikiubawbalane ka kiu ku lrapungane, si tadradrusa katilibi, kadrwa ku navaevanga ku asakivalane.

³ Kwi bibianesu mia ki vaeva ka maduli ka calrisi ka makalrilau, lu avavagasu ku tharirane waisiu ki tuku ki umawmase. Kwi cimisu ikai lrilrikudru ki sangikakabungane madirele, mia ki nipau drusane ka nginanavate.

⁴ Kwi lresu mia ki abeelenge ka daane ki Davidi, malrimeteke kadringeelrese si kakecenge, ku nikelradhane ku silu mia ki alathare ki tathathatha ka lagaragarange.

⁵ Kwi thuthusu mia ki maecebe ka kiu, mia ki tukapia kitulalake ka lrulai ka salawngane si ikai ki mawbariangangalai kanekane ku ubulu.

⁶ Lri papiaku sasulravane ka lregelrege, mwa ki sangwalreme ka lrelrelrege, si mukalava ku vaivalrigi ki mialrealre, si aru kawlrawlrau ku dradrimitane.

⁷ Kadalameli, matharirisu turamuru! Kwi thariranesu kiatulreepenge!

⁸ Rakeraketeli ka ababai, bwala tupapalraili katwase lregelrege Lebanungu; tupapalraili twalai Lebanungu mulebe. Twaladha belenge lregelrege Amana, kainganadha twalai lregelrege Sinire si lregelrege Heremunge, ka amani kudra takilepengane ki raiyungu si lrikulau.

⁹ Kadalameli, ka rakeraketeli, ku tadrelane ki macasu, ku tangivelevelane ki silusu, wamalranga ravase ki kidremedremeli.

¹⁰ Kadalameli, ka rakeraketeli, kwi dalamanesu malimeme turamuru! Kwi dalamanesu sangusaesai ka malimememe ki mathariri ka bava; kwi twalai muswane sangulreme walribate sanaka sangwalreeme.

¹¹ Kadalameli, kwi bibianesu malimeme mia ki valu; kwi lridamesu yakai ku valu yakai ku mireke. Kwi tasangulremane ki laimaisu mia ki tasangulremane Lebanungu.

¹² Kadalameli, ka rakeraketeli, amanisu kudra vaeva ka nielebane ka babengelradhane, nipangithalringulane ravadre, si celrepe ki taberadhane.

¹³ Ikai ki mawivaivai ku laivai ngiaesadhane ku la tacebeane, yakai ku mawnginanavatane, la ikai ku mathariri ku lamadru; yakai ku bengelrai ka hunsingi, ku angatu ka nata,

¹⁴ Yakai ku panhunhwa, ku canpu, ku karangekange, yakai ku makaelaela ku sangwalreme ka angatu, sasulravane, aluise, si nitukucingalrane ka la sangwalreme patuelre.

¹⁵ Amanisu kudra berai ikai ki mawivaivai, ka walrialrialriau kai isadrasadra, ka twalai lregelrege Lebanungu mwaludru ka drakerale.

(Marudrarudrange ka ababai)

¹⁶ Tali dradha ka valrigi, pacuna si ngidrakale. Tali lrawdru ka valrigi, vaivalriga papia ki babengelradhaneli, lani suete ku sangulremane ki saseverane. Ku kadalameli ani mwa ki mawivaivaini, si kane ikai ki mawivaivai ku mathaithaariringa ku madru.