Senai 3 - Ngudradreadrekadhane Ka Sisiu 魯凱語聖經

¹ Luka mauawaungu waapecaku ikai ki tapeapecane, si sipi kidrele ki kadalameli; wasilapaku iniane la kai maka kidringai.

² Lri ngidrakalaku si dadavace salraelre ki cekele, ngukakai ki madrau tikiyane ka lakadalranane; wasilasilapaku ki kadalameli, wasilapaku, la kainaku maka kidringai iniane.

³ Kudra wadrangalrungalru ki cekele si dadadavace kiapadradresenge nakwane, la kivagaku liniane, “Kai numi kiapadradresenge ki kadalameli?”

⁴ Sa katwasaku liniane, la kidringadhaku iniane. La malraku bilibili iniane, kai pakatwasenga iniane, pakeela ku taililukaneli iniane pudaane ki daane ki ina, si mwa ki takitulalakaneli ka taikaikaiyane.

⁵ Laababai ki swa Yerusalrime, palraingaili, papia ki kisisi si thadi kiketekete, kai numi lri aceace naiane, kai numi lri vangevange ki makakadalamane nai.

Mwasaka tulru ka senai (Marudrarudrange ka ababai)

⁶ Kudra twalai calragulragu kainganai mubelenge, mia ki ulrudru ka ememe, la arakai ku kilangai ki la tarasiwbawbai ka sangwalreme si sasulravane patuebelre yai, manemane?

⁷ Drela, kavai yai palridingi ki Sulumungu, tamanemele ka kwapingi drangalrungalru, yadreepele ka sanianiangenga ka lagaragarange ki swa Iseraylri.

⁸ Kwi lalasu yadreepele ka tara aralrabu; kwi lalasu tarakikaruburu. Waecenge ku marangisi ka dramu makanaelre, telenge kulri kela kikaruburu lukamaungu.

⁹ Ku Sulumungu ka talialalai arakai ku angatu Lebanungu, si ngitatu palridingi.

¹⁰ Ki taneneneane cucubungu ka ulrudru arakai ku gingi cabu, ku belenge arakai ku kingi papacase; ku taneneneane niara thilalatadhane ku kulau, ka kadalame arakai ki laababai ki swa Yerusalrime darepe.

¹¹ Laababai ki Ziyungu, bwala drela ki Sulumungu ka talialalai. Kwi lasu siapagamucu, takarudrarudranganeini ka vai, takirararagadhaneini ka vai, tinaini ka pasialawbubulu.