Senai 1 - Ngudradreadrekadhane Ka Sisiu 魯凱語聖經

¹ Ku senai ki Sulumungu yai, mathaithariringa ki sanaka senai.

Aswalalanga ka senai (Marudrarudrange ka ababai)

² Asu arakai ku bibianesu uma nakwane; ku dalamanesu malimememe ki sangwalreme ka bava.

³ Ku kinawmasanesu sangwalralreeme; ku naganesu wasarau sangulralreme, kadrwa ku ababai ku kailri kadalame muswane.

⁴ Asu ililuku nakwane, lata mubere; atalialaladhaili, si ililuku nakwane mudaane mwa ki tapeapecanesu. Tataelre kirararagai, La ungungulu kirararagai, mubanabanau ikai ki dalamane ka vaalru. Tharupane makitu kadalame muswane sanaka ababai!

⁵ Laababai ki swa Yerusalrime, unu maicelrengaku, ai mathariraku, mia ki balrawbau Kidare, mia ki make ikai ki daane ki Sulumungu.

⁶ Madha ngwalalai ki kulau ki kinawmasaneli si sidrekase nakwane, vai ka pakaicelrenge nakwane. Ku labetakaneli papia nakwane kalisi, si paikai nakwane ki babudubudu kauawngu, laka kadruanga ku zikangeli marasikai ki mawivaivaili.

⁷ Kadalameli, ala pelaelaili, yainusu pagwagwagu ki kiu? Luka mwalringedele yainu ku taisadrane ki kiu? Lri tumanaku ikaikaai ki lavavalake ka taraagwagu ki lakiu tangeangeea masasawlriwlriwlri, si silasilape muswane?

(Marudrarudrange ka sawvalai)

⁸ Mathaithaariringa ka ababai, bekacesu kai thingale kwini taikaiyane? Tupapalra ku tangukaiyane ki lakiu katwase, ikaiya thili ki balrawbau ki taragawagu, lani kane ku ubulu kwi lakiusu.

⁹ Kadalameli, wathalrebeethebesu ki sawvalai, mia ki tina ka yakai ki latarakikaruburu ka rigi ki talialalai ki swa Izipiti.

¹⁰ Kwi maecebe kwi bisau ka isiusu ala mathaariri, mia ki sakirerethane ka ngiathalringulu ki lre.

¹¹ Ai, lri pasikai nai muswane pia ku sisilu ka kingi, pasikai muswane paibu ki la sangiragelanane ka gingi.

(Marudrarudrange ka ababai)

¹² Lu nene ngiakanekaneane ku talialalaili, Kai sangulrelreme ka acilaili salraelre sangulreme.

¹³ Kai kadalameli kai watelrai mwa ki tukuli sutalu; Kai lasu mia ki akuvaeva ki lumase ka sasulravane ku tasangulremane.

¹⁴ Kai kadalameli mia ki pawracungu ka paela, ka ngiapaipai ikai ki babudubudu ki Ingizidi.

(Marudrarudrange ka sawvalai)

¹⁵ Kadalameli, matharirilringasu! Kwini macasu mia ki maca ki tavagu, kwi macasu walikalikathe kwi ledra ka dalamane!

(Marudrarudrange ka ababai)

¹⁶ Kadadaalamengali, ala mathaaririsu, matingulwalwadhane! Ala tatutapeapecane kai ki masalese ka ububulane,

¹⁷ la tubulri ki daane kai cedare ka angatu, si tubaliali kai baali ka alrenge ka angatu.