Ruthe 4 - Ngudradreadrekadhane Ka Sisiu 魯凱語聖經

Ku Buaze siataelrelre ki Ruthe

¹ Ku Buaze la mwa ki taelelebane ki cekele ki taisaruburubwane, la nene ikai kwini. La kai tarathainu, kudra matikaikaini kwidra padethane ka retesane ki Ilrimileke la ngukakaikai kwini lribate, ku Buaze la akwadrau sunagane iniane iya kai, “Bwala mwakai nene!” Kwini lasu la kainganai si nene.

² Ku Buaze la dawlu kwidra ki tamangeale ka marudrange ki cekele, si panene liniane ikai kwini. Sa nenenga sutelrai makanaelre,

³ la kawriva kwini ki padethane ka retesane, “Ku Naumi wakelanga twalai Muabe, ka nau kilangai iyaiya kwidra kadaengane ki retesaneta ka Ilrimileke;

⁴ lu kidremedremaku lri tara ka wathingalesu kikai. Lwiyasi sawlrisu langai, picucubunga ki mapapangale si lamarudrange langai; lwiyasi kaisu murikai, la pudriadringadha pelaela, asi lwiyane lrika aswalalangasu, ala lri mwa nakwane.” Kwini lasu la kawriva, “Lri sawlriaku langai.”

⁵ Ku Buaze la kawriva, “Mathariri, lwiyasi la langaisu ki Naumi kwini kadaengane, lri mialrisu sitaelrelre ki walibakane ka Ruthe ka swa Muabe; lu mia kwini, kwini kadaengane lri asuru ikai ki nagane ki wapacainga.”

⁶ Kwini lasu la tubalre, “Lwiyasi ka miyaiya kai, lri cilriaku ku kindrili ku alangadhane kwini kadaengane; adravane ka walangadhaku, ku lalakeli kai lri maka dulru mucungulu. Langadha kamani, kainaku lri langainga.”

⁷ Sakamani kwidra, kai swa Iseraylri yakai ku tinukakudhanane lini lu malangalangai ku latacekecekelane. Ku kialangai lri mukece si baai ki walangai, kwini lalasu arakai ku ngimiyaiya kai pelaela ka malrabulrabuthunga ku amalalangadhane.

⁸ Lakamani kwidra, kwini padethane ka retesane sa kawriva ki Buaze, “Langadha kamani iya!” Kwini lasu la mwalra ku keceini si baai ki Buaze.

⁹ Ku Buaze la kawriva kwini ki yakai irubu ka lamarudrange si sanaka yakai kwini ku laumawmase iya kai, “Kaikameane kunumi makanaelre amani numi ku lri siwmi pathingale ku tadrelane numi; walangainga naku patwalai ki Naumi kikai tacekecekelane ki Ilrimileke si lalakeini ka Kilriungu si Mahalungu.

¹⁰ Ku drumane, ku walibakane ka taelrelre ki Mahalungu ka swa Muabe ka Ruthe mialri ka lrika taelrelrengali. Lu ngimia kai, kwidra tacekecekelane demedeme lri maka kipasuru pikai ki nagane kwidra ki wapacainga, si kwini nagane ki wacekecekeleini mialri ka thadaalraneana pasuru ikai ki cekele si zuku lini. Kaikameane, kunumi makanaelre amaninga numi makanaelre ku lri siwmi pathingale ku drele numi.”

¹¹ Kwini lamarudrange si drumane ku umawmase la makitu iya kai, “Unu, amani nai ku lri siwmi pathingale ku drele nai. Ku Tamatama ani baai ku apasangukalrane tulalake ki taelrelresu, mia ki Rakile si Lria tutacekecekelane ki Yakubu si cegecege tu swa Iseraylri. Asu kamani ku ngiradhekane ikai ki swa Iparathe, kimatikaikai ku nagane ikai Bithelrihime.

¹² Ku Tamatama ani pangukai kai ki yacengecenge ka ababai baai muswane ku lagagane, kwini ki tacekecekelanesu mararaamau ku tangiradhekanane ki Pereze ka tulalake ki Yuda si Tamare.”

Buaze si lamwabaibalrithi iniane

¹³ Ku Buaze la sitaelrelrenga ki Ruthe, si tadrusa apece iniane. Ku Tamatama la subulrubulru baai ki alisu. Kwini alisu la katawbaliri, si tulalake ku sawvalai.

¹⁴ Ku lalabaibai cekele la iya kai ki Naumi, “Tadrengedrengere ki Tamatama! Wabaai muswane ku padethane ku retesanesu sirapale muswane. Kikai lrulai ani kimatikaikai ikai ki swa Iseraylri makanaelre.

¹⁵ Ku taelrelre ki lalakesu kialibake muswane; kwidra pasikaini muswane, makakaalrana ku tapangimiane ki tapitu ku sawvalai ku lalake. Kikai la baai tulalake ku tangea ku aganesu; kikai agane lri iluku ku bavane ku pukusu, lai lri ngiesadhane kai takatarudrawdranganesu.”

¹⁶ Ku Naumi la tarumara kwini ki lrulai, kebere ibibi iniane, si lapu iniane.

¹⁷ Kwini pasiagisi lini ku labaibai la sunagane kwini ki lrulai pasi Ubide. Kwini lalisu la makarengerengece katwase pathingale ki sanaka aneane, iya kai, “Ku Naumi, kiabaai ka vaeva ku agane!” Ku Ubide amani ku tama ki Yesi; ku Yesi amani kwidra tama ki talialalai ka Davidi.

^18-22 Twalai ki Pereze daruru ki Davidi kudra laretesane lini miyaiya kai ku tamasakaikaiyane: Pereze, Hezerunge, Rame, Aminadabe, Nahasunge, Salemune, Buaze, Ubide, Yesi, Davidi.