Ruthe 3 - Ngudradreadrekadhane Ka Sisiu 魯凱語聖經

Ku Naumi pasiakai ki Ruthe ku akitharevaneini

¹ Yakai saka minakavalane, ku Naumi la kawriva ki Ruthe, “Lalakeli, lri tara pasikaiyaku muswane silape ku lrika taelrelresu. Lani ikai ku tamwanesu kithareve.

² Ngwalringausu ki Buaze ala ka retesaneta? Nataelresu kwidra ki lalabaibai kipuawngane. Kilalra kai vagali, kai maungu kwini lasu lri mwa ki tapavaivaiyane si patapusu ku mugi.

³ Lu sikelrea, la pusangulrelremane, si ngiragelane ku mathaithariringa ku laimai, la mwa ki kavai ki tapavaivaiyane. Ai madha kithingathingale iniane ala ka yakaisu kwini, mukalava lu maka kanenga, si maka ungulunga.

⁴ La drela pudriadringai ku tasakaiyaneini apece; lu sakaerekenga, la mwa, cekale ku cawbu, la apece ithili ki tali drapaleini. Lri pelaela muswane ku apangimianesu.”

⁵ Ku Ruthe la tubalre, “Sanaka taiyanesu, lri pangimiaku.”

⁶ Ku Ruthe la mwa ki tapavaivaiyane, la pangimia kudra tapelaelane ki tinaini.

⁷ Sa maka kanenga ku Buaze, maka ungulunga, la kiraragai ku kidremedremeini, la mwa ki thili ki taabatane ki mugi apece. Ku Ruthe ngiabaalai mwa kwini, la cekale ku cawbu, si apece ikai talikai ki drapaleini.

⁸ Saka kabiceacelrakanenga, ku Buaze la kirimu alrigilrigi, sa ngibangulu, la kasamali sa ikai ku ababai ku wapece ikai ki tali drapaleini,

⁹ la iya kai, “Aneanesu?” Kwini alisu la iya kai, “Tawki, Rutheaku, ka sasiakawkawlusu. Amanisu ku padedethanenga ka retesaneli, yakai ku capilanesu sirapale nakwane. Ala malraili sitaelrelre, nau mwa muswane!”

¹⁰ Ku Buaze la kawriva, “Ku Tamatama ani kisenai muswane! Ku paswalala ku tukucingalrananesu ki tina ki taelrelresu, kikai laka aru ka tukuciacingalresu ki tacekecekelane ki nataelrelresu. Naika wasilapesu ku yacengecengana, adravane ka sapaiswane ka kaika sapaiswane, ai kaisu pangiamia kwini.

¹¹ Ruthe, madha kidremedreme! Adravane lu kitubisu nakwane ku manemane, lri tara pasikaiyaku muswane pangimia; asi lwiyane, kai sakatucekelane makanaelre makitwa thingale ala ka makalecegesu ka ababai.

¹² Kunaku tengane ka padethane ka retesanesu ka yakai ku capilane sirapale muswane, ai yakaiyana ku tangea ku padedethane nakwane.

¹³ Kai maungu asura ikai kai, lwiya lu mialrealre tadredrele kwini ki lasu lulri palraingi pangimia ku apiane ki takapadedethanenga ka retesane muswane. Lwiyasi kwi lasu la mubangalre, mathariri turamuru; lwiyasi kwi lasu la kai palraingi, lri kiketeketaku ki yabelenge ka Tamatama; lri tara pangimiaku kikai capilane. Kikai ala apecanga, la asuru ikai kai, pakela ki maliare.”

¹⁴ Ku Ruthe la apece ikai ki tali drapaleini. Ai sakaiyana kaliare, sa kai thingaleana iniane ku laumawmase, kwini alisu la ngidrakaleenga, asi lwiyane ku Buaze kai palraingi lu thingale ku drumane ala ka wamwa kwini ki tapavaivaiyane ku ababai.

¹⁵ Ku Buaze la kawriva ki alisu, “Mwalra kwi palimemelresu, la sapa pikai kai.” Kwini alisu la pangimia. Ku Buaze la gugu ku alau mapusale ka kukingi ku madradrau ka mugi pubelenge, la paralubu paangeale iniane, kwini alisu la katwase siwlringa mu cekele.

¹⁶ Kwini alisu sakelanga tavanane, ku tinaini la kivaga iniane, “Lalakeli, langitumane?” Ku Ruthe la pelaela ki tinaini ku tapangimiane ki Buaze pasikai iniane patueelre.

¹⁷ Ku Ruthe la kawriva, “Kwini lasu peaelaela nakwane, madha maliunaunai siwlri mwa muswane amia, lakamani ku baaini nakwane kikai makalra kai mugi.”

¹⁸ Ku Naumi la iya kai iniane, “Lalakeli, kusu madha kaupupungu, ani dredrelanga ku lrika angimiane kilakikai. Ku Buaze kaikameane lu kai patulrepenge kikai awngane kai lri isadra.”