Ruthe 2 - Ngudradreadrekadhane Ka Sisiu 魯凱語聖經

Ku Ruthe yakai ki angangade ki Buaze kirawmale ku mugi

¹ Ku Naumi yakai ku taingea ku retetesaneini, ku nagane sia Buaze, sapaiswane si tara kiputaetalane ka umawmase, ka retetesane ki tawaneini ka Ilrimileke.

² Yakai saka minakavalane, ku swa Muabe ka ababai ka Ruthe la kawriva ki Naumi, “Nau mwa ki angangade, lu kakuru nakwane ku aneane, nau ikai lrilrikudru iniane kirawmale ku nipawrurwane ku mugi.” Ku Naumi la kawriva, “Lalakeli, ani lu mwa.”

³ Ku Ruthe la katwase mwa ki angangade, kabibibilrili ki kiamugimugi siludu ku nipawrurwane ku mugi. Kwini taikaiyane ki Ruthe kirawmawmale ka umawma ala ka umawma ki Buaze.

⁴ La kai tarathainu, ku Buaze la twalai Bithelrihime kela; la ara vaga pasudalru kwini ki lakiataletaleke iya kai, “Ku Tamatama yakai tapalra numiane!” Kwini lalasu la tubalre, “Ku Tamatama swabulrubulru muswane!”

⁵ Ku Buaze la kivaga kwini ki kulritu lini, “Kavai ababai lalake ki tai aneane?”

⁶ Kwini lasu la tubalre, “Amani kwidra twapapalra ki Naumi twalai Muabe kainganai ka sakamaelanane ka cekele ka ababai.

⁷ Kiatubi nakwane nau kabibilrili ki kiataletaleke kirawmale ku mugi. Kavai alisu sakaliare la pathagili kaungu, kikai tau isadrasadra, yakai ki balrawbau mulrilri isadra.”

⁸ Ku Buaze la mwa ki Ruthe kawriva, “Kilalraili, lalake, asitasumuanga ki angangade ki druma kirawmale ku mugi, asuranga ikai taelre kai ki tara kauawngu ka lalabaibai.

⁹ Drela lu mwinu kitaleke ku lasawvalai, tupapalra ki lalabaibai siludu, wacununga naku ki tara kauawngu nakwane kwini ki lasawvalai madha tusinalrelrelreme iya muswane. Lu kakadhamengasu, mwa kavai ki tangukaiyane mwalru ki acilai si ungulu kwini mwalru lini ku acilai.”

¹⁰ Ku Ruthe la guruthungane sukubu ki Buaze ikai daedae, iya kai, “Asu pasikainga nakwane turamuru? Pangimia kai tukalithane nakwane ka sakamaelanane ka kuni ka umawmase?”

¹¹ La kawriva ku Buaze, “Sa pacainga ku taelrelresu, ku sawsaesakenesu ki tina ki taelrelresu, kialalrangaku. Wathingalaku ku tapangimianesu katwase ki marudrawdrangesu si cekelesu, ku tapangimianesu ikaikai ki maelane ka laminzuku.

¹² Ku Tamatama ani pangibilri ku tapangimianesu. Ku Twaumase ki swa Iseraylri kwini ki satalutalusu ka Tamatama ani pakakalra patarumara muswane!”

¹³ Ku Ruthe la tubalre, “Tawki, kialibakelringasu nakwane! Adravane ka asasiakawlane muswane kainaku swadalepe, la pianasu kai kielre si sasa nakwane.”

¹⁴ Sa kanekane ku aga, ku Buaze la kawriva ki Ruthe, “Abwala, kanea kai pange ka mugi, si dapenge ki malriu ka budu si kane.” Ku Ruthe la kabalrulu kwini ki tarakitaleke, ku Buaze la baai iniane kudra laniakamane ku mugi, kwini alisu la kane kabucuku, la ikaiyana ku tedrane.

^15-16 Sa katwase kwini alisu si mwanga siludu ku mugi, ku Buaze la cunu ki lasasiakawluini, “Palrainga pasiludu iniane, adravane patwalai kwini ki nirubwanenga ku niketabane siludu ka alisu madha pakwalrialri iniane kawriva; adravane ka patwalai ki nirecenganenga sudru ku mugi pangisasingikaiya iniane; madha kaelaelaela iniane.”

¹⁷ Ku Ruthe la pia kwini ikai angangade siluludu ku mugi, pakeela ki miauawbu. Kwini alisu la malra kwini nisiludane ka mugi si theredre ikai ku akuvaeva ka cepenge.

¹⁸ Kwini alisu la malra kwini nivelatane iluku siwlri mucekele si padrele ki tina ki taelrelreini, la malra kwidra niputedrane ku aga si pakane ki tinaini.

¹⁹ Ku Naumi la kivaga iniane, “Kaikameane patwalaisu inu siludu nguthakai kai mugi? Wamwasu ki tai aneane ka angangade kaungu? Ku Twaumase anisubulrubulrunga kwini ki makalithi muswane!” Ku Ruthe la pelaela ki tina ki taelrelreini, “Wamwaku ki umawma ki Buaze kaungu.”

²⁰ Ku Naumi la iya kai, “Ku Tamatama anisubulrubulrunga ki Buaze! Ku Tamatama kadrwa ku takaelane papia ki panianianiakeana si wapacainga ka umawmase ku takidremedremane ku vaga ku thalradhane.” Ku Naumi la lalrwai pelaela iya kai, “Kwini lasu amani ku padethaneana ka lritudraneli, yakai ku capilaneini sirapale mitane.”

²¹ Ku Ruthe la kawriva, “Kwini lasu mwa kabibilrili ki kiataletaleke siludu ku mugi iya nakwane, pakeela ku tamaka kitalekane.”

²² Ku Naumi la kawriva ki Ruthe, “Unu, lalakeli, mathaithaariringa lu ikaisu ki tai Buaze taelre kwini ki lalabaibai kipuawngane; lwiyasi mwasu ki umawma ki palrapalrane, alau lri kitusinalremesu.”

²³ Ku Ruthe la taelre kwini ki tarakauawngu ki Buaze ka lalabaibai kirawmawmale ku mugi, pakela ku tamaka malrane ku tadradrau si tatitiki ka mugi. Ku Ruthe la pacungulu taelre ki tina ki taelrelreini.