Ruthe 1 - Ngudradreadrekadhane Ka Sisiu 魯凱語聖經

Ku tai Ilrimileke talwaela mwa Muabe

^1-2 Sakanadruma, saka amaniana kwidra latamagarange ku kiacapicapili ki swa Iseraylri, ikai kikwini la kipadradresenge ki kalasilravane. La ikai ku swa Iparathe ka zuku, ka sia Ilrimileke, laka naiyakai Bithelrihime ka Yuda; kwini lasu la mailuku ki labaibaini ka Naumi si tadrusa ka sawvalai ka lalakeini ka Mahalungu si Kilriungu, la karedele mwa ka cekele Muabe, padawdalruana ikai kwini. Kwini lalasu sa ikai kwini kwidra,

³ ku Ilrimileke la pacai, si suru ki Naumi si lalakeini ka tadrusa ka sawvalai,

⁴ kikai lamataka la tara karudrange ki swa Muabe ka Urepa si Ruthe. Sa taramangealenga ka caili,

⁵ kai Mahalungu si Kilriungu la mialri pacai, la suru ki Naumi, kakadrwanga ku taelrelre si lalake.

Ku Naumi si Ruthe siaulri mu Bithelrihime

⁶ Ku Naumi sa ikaikaiyana Muabe, la kilalra ku Tamatama makalithi sirapale ki kawkawluini, ala ngukalra ku kitaleke lini, la padulru ku akaredelane ki tadrusa ka kiathareve katwase Muabe siwlri mwa ki takitulalakane ka cekeleini.

⁷ Kwini lalisu la karedele katwase siwlri mwa Yuda, ai sa ikadadalranane,

⁸ ku Naumi la kawriva kwini ki tadrusa ka kiathareve iya kai, “Kunumi lu katwasanga siwlri mwa ki takitulalakane numi! Ku Tamatama ani arakai ku thalradhane marasikai numiane, pangimia ku takilibakane numi pasikai nakwane si kwidra ki la wapacainga.

⁹ Ku Tamatama lani baai numiane ka tadrusa ku lrika apelane numi karudrange, si tara ikai ku takitharevane numi.” Ku Naumi la uma kipusau liniane. Kwini lamali la miakwidra tungawngau tubi,

¹⁰ la kawriva ki Naumi, “Ini! Lri tupalra nai muswane siwlri mwa ki zukusu.”

¹¹ Ku Naumi la kawriva, “Lalalakeli, kunumi lu katwasanga kamani! Asitupapalra nakwane? Lri dulrwana naku tulalake si pasitaelrelre numiane?

¹² Lu mutavanana! Lalalakeli, ala lu! Pasuludrungaku turamuru, ka kailri maka pelanga karudrange. Adravane ka matiakipukadawana ku tikiyane, si dulrwana karudrange kai maungu, la dulru tulalake ku sawvalai,

¹³ lri palraingi numi adradrau liniane pakela ki maadrau? Lri maka dulru numi mukalavalava si kai mwa ki drumane karudrange? Ini! Lalalakeli, kikai kaika adulrwane piakai. Ku Tamatama pathavungu nakwane; kuaalriaku kidremedreme numiane.”

¹⁴ Kwini lamatiatina la kirimunga makitu tubi. Ku Urepa ala uma ki tinaini ka Naumi kipusau, si katwase siwlri mwa ki sakacekeleini; ai ku Ruthe kai walreme katwase.

¹⁵ Ku Naumi la kawriva iniane, “Ruthe, ka tharevesu matwasenga siwlri mwa ki zukuini si twaumaseini. Lu mialrisu lu katwasa tupalra iniane!”

¹⁶ Ai ku Ruthe amia kai, “Madha pakatwatwase nakwane muswane. Patupapalraili muswane! Lu muinusu, lri muinuaku; lu ikaisu inu, lri ikaiyaku inu; ku minzukusu amani ku minzukuli; ku Twaumasesu Twaumaseli.

¹⁷ Lu pacaisu ikai inu, lri mialriaku ikai kwini pacai, si kidralreke. Ikai kwini kathane ku apacadhane, kadrwa ku namanemanenga kulri maka dulru malra apasasivagai mitane! Alaiyasi balreaku ku takiketeketaneli, ani ka Tamatama ku pangiacaeme pathavungu nakwane!”

¹⁸ Ku Naumi sadrele ki Ruthe kakeecenge ku takidremedremaneini ku atupalrane iniane, la kai kirimunga ruthuku iniane.

¹⁹ Kwini lamatina la pacungulu kwini kadalranane lini, la daruru Bithelrihime, sa kela kwini lamatina, ku sakatucekelane la makitu kiraragai turamuru. Ku lalabaibai makitua karaleale kawriva, “Ka alisu tengane ka Naumi?”

²⁰ Ku Naumi la kawriva, “Naumi madha iya nakwane, Mara iyaili kamani! Asi lwiyane ku wadulru sanaka manemane ka Twaumase pakwalri kai tapanianianiakaneli.

²¹ Sa katwatwasaku mulatadre pakaesaesai nakwane, sa siwlringaku ku Tamatama la papaliwnaunainga nakwane. Ku Tamatama pathavungu nakwane; ku wadulru sanaka manemane ka Twaumase pakwalri nakwane. Manemane si Naumi iyana nakwane?”

²² Kikai ala amani ku tangilribatane twalai Muabe ki Naumi si kiathareve ka swa Muabe ka Ruthe. Kwini lamatina sa daruru Bithelrihime yacengecengenga pathagili ka kalakimugiane.