Ruma 9 - Ngudradreadrekadhane Ka Sisiu 魯凱語聖經

Twaumase si pilrini ka umawmase

¹ Kikai kawrivarivali tengatengane ka vaga; swakaiyaku ki Kirisitu, kainaku madraedrangelre. Kikai takidremedremaneli ikai ki ledra ki Siri mialri pasudalepe nakwane ka kainaku wadraedrangelre:

² Matelrege kai kalithaneli, si kiangeange turamuru kai kidremedremeli!

³ Ngwalai ki sakacekeleli, ka karetesananeli, adravane kipuswaku ki Twaumase, si kiwvagai ki Kirisitu, lri ubangalraku.

⁴ Kwini lalasu swa Iseraylri, ka pinilriane ka umawmase ki Twaumase; la kisilalake ki Twaumase, si pakisupilri ku lriguini. Ku Twaumase la kiketekete liniane, la baai liniane ku hulrice; kwini lalasu la thingale ku apangimiane sukubu ki Twaumase, la tarumara ku palraingingaini.

⁵ Kwini lalasu mwabaibalrithi ki tamatama lini, singikai ku takaumawmasane, ku Kirisitu thadalrane lini ka vaeva ka zuku. Ku amani ka warathudu sanaka maneemane ka Twaumase anika palralrawthu kidrengedrengedrengere, amingi!

⁶ Maulrawnga ku pinalraingane ki Twaumase kainaku ka amia. Asi lwiyane, kai swa Iseraylri kaika pinilriane ka umawmase makanaelre;

⁷ ku mwabaibalrithi ki Aberahame kaika lalalake ki Twaumase makanaelre. Ku Twaumase napeaelaela ki Aberahame iya kai, “Kathane ku twalai ki Isake kitulalake ka amani ku mwabaibalrithi muswane.”

⁸ Kikai yai amia kai, kudra singikai ku tangimiamiane kitulalake, kaika Lalalake ki Twaumase amia, kathane ku twalai ki pinalraingane ki Twaumase kitulalake ka umawmase, amani ku lalalake ki Twaumase.

⁹ Asi lwiyane ku pinalraingane ki Twaumase amia kai, “Lu kelanga ku vai ku angimiane, lri kelaku ngusela, kai Sara lri tulalake ku vaeva ku sawvalai.”

¹⁰ Kaika miyaiya kai sikakathane, ku tadrusa ka lalake ki Rebeka tara twalai ki vaeva ka tama, kamani ku tulalake ki cucungulaneta ka Isake.

^11-12 Ai, pakai ku apathingalananeini ala ka tengatengane ka patwalai ki kidremedremeini pilri ku tangea ka lalake, ku Twaumase amia kai ki Rebeka, “Kudra takataka ka lalake lri asasiakawlu ki lalake ka agiagi.” Sa iyaiya kikai, kwini lalasu kaiyana kiatulalake, la kaiyana pia ku mathariri si ku malisi ku manemane; amani ku athingalane ala ka twalai ki kidremedremeini lu pilri ku Twaumase, kadrwa ku tamacacapilane ki tangivelevelane lini.

¹³ Mararaamau ku taiyane kai ki Sisiu, “Mathalradhaku ki Yakubu, ka silrialribate ki Isau.”

¹⁴ Lu ngimia kwini, la lri dulruta kai aparamaramau ku Twaumase iya? Lutumane kaita lri dulru.

¹⁵ Asi lwiyane ku Twaumase amianga kai ki Musi, “Nau kakalithi ki aneane lu iyaku lri kakaalithaku ki aneane; nau tukurwane ki aneane lu iyaku lri tukurwanaku ki aneane!”

¹⁶ Amani ku thingale madu ku tapilriane ki Twaumase, kai singiakai ku takidremedremane ki umawmase ku takisamulane, singiakai ku kalithaneini.

¹⁷ Ikai ki Sisiu, ku Twaumase amia kai ki talialalai ki swa Izipiti kawriva, “Ku pacegecegeli paatalialalai muswane, amani ku lrika aputaluvaivadhanesu ku pukuli, lani salraelre kawmasane kai naganeli.”

¹⁸ Lu iyane kai kawriva, ku Twaumase lu lri kakalithi ki aneane lri kakaalithi ki aneane; ani kakelrathe ku aneane lu iya lri kakelrathe ku aneane.

Elathane si kalithane ki Twaumase

¹⁹ Alau lri iyasu kai nakwane, “Luka ngimiyaiya kai, ku Twaumase lai lri tumane kaelaela ki umawmase? Aneane ku lri maka dulru kiecebe si kai tarumara ku takidremedremaneini?”

²⁰ Ai retesane, aneanesu, ka wathuru tubaebalre ki Twaumase? Kudra niarakaiyane ku dae tulawbubulu ala maka dulru kawriva ki wadarepe iniane iya kai, “Asu darepe tumiyaiya kai nakwane?”

²¹ Kai taratudilrudilrungu tara yakai ku puku malra ku dae si darepe pia ku nau pia iyaini; kwi lasu lri dulru arakai ku thadalrane ka dae si pia tudrusa, si ka tinukucingalrane ku vaeva, laka cacapangane ku vaeva.

²² Ku pia ki Twaumase mialri ka miyaiya kikai. Lri pathingalane ku elathaneini, lri padrelane ku pukuini. Ngwalai kikai, la arakai ku sakiadiadili si pacepe ku kaelaelaelaini, amani kwidra la nai kicwake ka takaiyane.

²³ Lai mialri papia mitane pathingalane kudra swaete ka lrigu. Amanita ku apapianeini kakalithi, si laka padulrudulruini ku lri tarumara ku lriguini ka umawmase.

²⁴ Asi lwiyane kuta kaika nipatwaladhane ki swa Yuda sikakathane, mialri ka nipatwaladhane ki sakamaelanane ka umawmase dawlu.

²⁵ Kikai yai pikaini ki Husia ka hungu ka taiyaneini kai: Kudra nakai ka laumawmaseli, “Umawmaseli kai” lri iyanga naku liniane; kudra nakai ka kadalameli ka kuni, “Kilibakeli” lri iyanga naku.

²⁶ Kunadruma naamianga naku kai liniane: Kunumi kai numi ka laumawmaseli; ai, ikai kwini kwi lalasu lri mialri kipasi: Lalalake ki palralrawthu panianiake ka Twaumase!

²⁷ Patharukai ki swa Iseraylri, ku Isaiya naamia kai pangutawtau liniane, “Adravane mia ki enai ki laveke ku pangalane ki swa Iseraylri, ai tabekele ku umawmase ku lri kipalribulu,

²⁸ asi lwiyane ku Tamatama lri kisamwamula si lri pangimia saibange ki sanaka umawmase.”

²⁹ Mararaamau kunadruma ku taiyane ki Isaiya kai, “Alaiyasi ku Tamatama ka abebeelengenga ki sanaka kwapingi lu kai pasikai mitane pasuru ku lamwabaibalrithi, nai ngimiangata ki swa Sudume si swa Gumura ku tangimiane lini.”

Swa Iseraylri si hukuingi

³⁰ Lumia kwini, lai lri tumanaiya nai kawriva? Kudra lasakamaelanane ka umawmase nakai kiasilasilape ku dringelresane ki Twaumase, la ngwalai ki salrwane si kamaninga ku madringelrese ka umawmase;

³¹ kai swa Iseraylri kiapasilasilape ku apangukaiyane ki hulrice si kitumadringelrese, la ngiabaalrelringa si kai maka padaruru ki naika apadarurane lini.

³² Asi lwiyane? Kwi lalasu amani sa kai satalu ki salrwane, satalu kamani ki tangivelevelane, ku tangimiane la tubakebake ikai belenge kudra ki “Sapawcucusane ka lrenege”.

³³ Mararaamau ku taiyane ki Sisiu kai: Drela! Piakainga naku ku vaeva ka sapawcucusane ka lrenege pikai Ziyungu, amani kudra patwabakebake liniane ka lrenege! Ai, ku satalu iniane ku umawmase kai lri kasulri.