Ruma 8 - Ngudradreadrekadhane Ka Sisiu 魯凱語聖經

Yadringi ki Siri ku tapanianianiakane

¹ Kaiasasane, kudra lapanianianiake ikai adringi ki niake ki Yesu Kirisitu ku umawmase kai lri kitupasalriu.

² Asi lwiyane ku nikelretane tukakudhane ki Siri, amani ku lrika amaelreane ki umawmase ki Yesu Kirisitu si tarumara ku niake, pwalatadrenga mitane patwalai ki pasalrivane si apacadhane ka kakudhane.

³ Ku hulrice ki Musi ngwalai ku turamurane ku takaumawmasane ki umawmase la kai maka dulru pangimia, ai ku Twaumase ngiakakamani pangimia. Ku Twaumase siakawlu ki Lalakeini, lakamani ku paikai ku pasalrivane iniane mia mitane ka umawmase, pakai ku apelaelane tupasalrivane ku yakai adringi ki takaumawmasane ki umawmase ku pasalrivane, si ala mwalra ku pasalrivane.

⁴ Ku tapiane kai ki Twaumase pakai ku aputaluvaivadhane ku takitubiane ki hulrice ikai mitane ka la kai palululudu ki takaumawmasane, ka pasalalaladha ki Siri sikakathane ka umawmase.

⁵ Asi lwiyane, ku pasalaladha ki takaumawmasane ku kidremedremeini, papia ki ngwakai ki kinawmasane ku awngane; ku pasalaladha ki Siri ku umawmase, makalithi ku ngwakai ki Siri ku awngane.

⁶ Ku makalithi ki kinawmasane ki umawmase, ku angimiane lri pacai; ku makalithi ki Siri, lri malra ku niake si sulivatane.

⁷ Lakamani, ku pasalaladha ki takaumawmasane ku umawmase amani ku kiatubadha ki Twaumase; asi lwiyane kai pasalaladha ku kelrete tukakudhane ki Twaumase, si ku patengatengane lai lri kai maka dulru pasalalaladha.

⁸ Ku pasalaladha ki takaumawmasane ku umawmase kai lri maka kikiragai ki Twaumase.

⁹ Ala kunumi, alaiyasi ka patengane ikai adringi numiane ku Ri ki Twaumase, ku tapanianianiakane numi lri kai kiruthuku ki takaumawmasane, lrika Siri ku kiathathengete sikakathane. Ku kadrwa ku Ri ki Kirisitu ku umawmase kaika swakainga ki Kirisitu.

¹⁰ Ai, ku Kirisitu alaiyasi ikai adringi numiane, adravane pacai ngwalai ki pasalrivane kwini kinawmasane numi, ku Ri ki Twaumase lri papanianiake numiane, asi lwiyane ku Twaumase twamadringelresenga numiane.

¹¹ Ku Ri ki Twaumase pasiaelane ki Yesu patwalai ki wapacai; alaiyasi ikai adringi numiane kikai Ri, kikai amani ku pasiaela ki Kirisitu patwalai ki wapacai ka Twaumase, lri mialri pangukai kudra yakai adringi numiane ka Siri, si baai ku niake ki kwini ki kai lri kaburau ka kinawmasane numi.

¹² Lakamani, laretesane, akiameta, ai kaika akiame ki takaumawmasaneta, si lri kipadrekadrekase ki takaumawmasane ku tapanianianiakane.

¹³ Alaiyasi pasalaladhata ki takaumawmasaneta, lri tara pacai; alaiyasi satalu numi ki Siri si papacai ki pasalrivane, lri tara panianiake numi.

¹⁴ Sanaka kiarake ki Siri ku umawmase lalalake ki Twaumase makanaelre.

¹⁵ Asi lwiyane, ku baai ki Twaumase ku Ri kai lri tuduri numiane, si kirimu numi mukuludru iniane, lri malra numiane paalalalake ki Twaumase. Pangukai ki Siri, papiata ki Twaumase akwadrau iya kai, “Ama! Ka Tamali!”

¹⁶ Ku Ri ki Twaumase si abaketa mararamau pathingale ka amanita ku lalalake ki Twaumase.

¹⁷ Kudra lalalakengata ki Twaumase, lri kisupilrita kudra akaesadhane ka padulrudulru pasikai ki laumawmaseini ki Twaumase, lai lri kathadalranengata ki Kirisitu kisupilri ku pasikai ki Twaumase iniane; asi lwiyane, sana kivalata siamece ku sakwalrialri ki Kirisitu, lri kisupilrita ku lriguini.

Lrigu lubibilrili

¹⁸ Lu kidremedremaku, kaika apasiasipanenga kikai sakwalrialrita kaiasasane lu pakiramavane ki lrika apathingalane si baai mitane kudra lrigu lukabibilrili.

¹⁹ Sanaka kiabekace siadramadrama turamuru ku lrigu ki Twaumase ku atwaladhane ki lalalakeini utaluvaivai.

²⁰ Asi lwiyane kai binekacane patuelre lu akabalrithi ka kadrwanga ku vai, kaika takidremedremane lini, takidremedremane ki Twaumase. Ai, kai nibekacane tasidramane,

²¹ yakai ku vai ku adulrwane katwase kitukudha ki sakerengane kudra ki lri kaburau, si tupapalra kisupilri kudra lrigu ka angilralraingane ki lalalake ki Twaumase.

²² Wathingaleta, pakela kaiasasane, patueelre kikai nibekacane kwalrialrialri dadange, miakau yacengecenge ka lri tulalake kiangeangeange.

²³ Kai ka kathane ku nibekacane ku miyaiya kikai, kuta ka la wamalranga ku baai ki Twaumase ku aswala kalreme ku madru, ka amani kudra tarwamaranga ku Siri ka umawmase, mialri pikidremedreme dadange, ukalavalava ki Twaumase ku asilalakane mitane, la lri ngilralraingingata.

²⁴ Asi lwiyane ngwalai ki sasiadradrama, la kipalribuluta. Alaiyasi maka dreleta kudra nisidramadramane, kaika patengatengane ka sasiadradrama. Aneane ku lri sidrama kudra drelengaini?

²⁵ Alaiyasi sidramata kudra kaika nimakadrelane, lri dulruta kiadili ukalava.

²⁶ Laka thadalrane, ku turamuraneta yakai ku Siri paraluralubu. Nakaita wathingale ku apangimiane inulri; ai ku Siri ngiakakamani arakai ku kaika amaka arakaikaiyane ku vaga dange pasikai mitane kitubi ki Twaumase.

²⁷ Kudra pakeela ki kidremedreme ki umawmase drele ka Twaumase wathingale ku takidremedremane ki Siri, asi lwiyane kai Siri singiakai ku takidremedremane ki Twaumase, si pasikai ki laumawmaseini kitubi.

²⁸ Wathingaleta, ku Twaumase si kudra la kialibake iniane ku umawmase, amani kudra dawluini singikai ku kidremedremeini, si taelre kawaungu, si sanaka maneemanenga ka awngane la ikaai ku akaesadhane.

²⁹ Asi lwiyane ku Twaumase wathingalenga liniane, si malranga paswala pilri liniane, lri apararamau liniane ki Lalakeini ku taukalrivilane ku takaumawmasane, ku lrika aikaiyane ki takaalra ka maretetese ithamadalane.

³⁰ Ku Twaumase paswalanga pilri kwini ki umawmase, la dawlu liniane; ku dawluini ku umawmase, peaelaela pasudalepe tumadringelrese ka umawmase; ku pelaelaini pasudalepe tumadringelrese ka umawmase, pakiasupilri liniane ku lrigu.

Ku sakialibake ki Twaumase patwalai ki Yesu pathingalane

³¹ Kudra miyaiyanga kikai, lri tumanaiyanata kawriva? Sana ikai talikai mitane ku Twaumase, aneane ku lri kiecebe mitane?

³² Adravane ka Lalakeini kai taulra, waalra iniane si baai mitane. Kudra miyaiyanga kikai, kai lri kirimu mialri vutha baai mitane sanaka maneemane?

³³ Aneane ku lri kukusu kudra pilringa ki Twaumase ku umawmase? Ku Twaumase peaelaelanga tukakadrwa ku pasalrivane lini!

³⁴ La lrika aneaneana ku lri tupasalrivane liniane? Kai ka Yesu Kirisitu, amani kwidra wapacainga, ku patengatengane, nai iyaku kai kamani amani kudra siaelanenga panianiake, kikai laka yakainga vanale ki Twaumase si ngitalikaikaiyane mitane kitubi ki Twaumase!

³⁵ Kudra miyaiyanga kikai, aneane ku lri dulru apauvagai mitane ki sakialibake ki Kirisitu? Akipakwalriane? Akiangeangane? Akikabebetethane? Silravane? Matikurwane? Sapapacai? Lrabu?

³⁶ Mararaamau ku taiyane ki Sisiu iya kai: Ngwalai muswane, waaungu nai kipikai ki apacadhane; kai umawmase twa aculwane ka kiu naiane.

³⁷ Kaika amani patuelre! Ikai kai ki ngimiyaiya kai patuelre, sataluta kudra ki kialibake mitane ka Yesu si sabelengenga!

³⁸ Asi lwiyane masalrwaku, sanaka manemane patuelre kadrwa ku lri dulru apauvagai mitane ki sakialibake ki Twaumase. Adravane ka apacadhane, ka apanianiakane; ka sasiakawlu subelebelenge, ka maelane ka ngwababelenge ka magagemegeme ku puku; kamani kaiasane, kamani lukabibilrili;

³⁹ ka abebeelengenga, ka yaswadriadringi; ikai kai ki lepawngane sanaka nibekacane patuelre, ku pangukai ki Twaumase ki Tamatama ka Kirisitu Yesu si baai mitane ku sakialibake anika manemanemane kadrwa ku lri maka dulru apauvagai.