Ruma 6 - Ngudradreadrekadhane Ka Sisiu 魯凱語聖經

Wapacai papia ki pasalrivane, la panianiake ikai ki Kirisitu

¹ Lu mia kwini, lai lri tumanaiyata kawriva? Lri pacunguluta panianianiake ikai ki pasalrivane, pakai ku lrika aru athingalane ngiradhekane ku migemi ki Twaumase?

² Ini, kai ngiamia kwini! Lu sakaiyane ki pasalrivane kawriva, wapacaingata. Ata kiriimu maka dulrwana pacungucungulu panianianiake ikai ki pasalrivane?

³ Lri tara thingale numi, lu kipabanauta maelreta ka vaevanga ki Yesu Kirisitu, ngimiyaiya kai ku kiapabanau twapapalra iniane pacai.

⁴ Ngukai ki kiapabanau, maredelengata iniane papia ki wapacai, si kipataelre kidralreke; kikai yai pakai ku lrika adulrwaneta ka bavane ku tapanianianiakane, mararaamau ki Tamaita ka yabelenge arakai ku lrigu ka pukuini si patwalai ki wapacai pasiela papanianiake ki Kirisitu.

⁵ Alaiyasi maelreta ki Kirisitu ka vaevanga, tupapalra ku tapacadhaneini, lri mialrita tupapalra ku tasielaneini.

⁶ Wathingaleta, kudra takasidrumananeta twapapalranga ki Kirisitu kipakedrekedre pwa ki ziwzika, pakai ku apakamudane ki pasalrivaneta, ku kaika adurianengata ki pasalrivane.

⁷ Asi lwiyane kai umawmase sana pacai kiadaili ki puku ki pasalrivane.

⁸ Alaiyasi tupapalrata ki Kirisitu pacai, masalruta, lri mialrita tupapalra ki Kirisitu panianiake.

⁹ Asi lwiyane wathingaleta ki Kirisitu ka siaelanenga twalai ki wapacai, kai lri pacainga; kai apacadhane lai kai lri ruthukunga iniane.

¹⁰ Ku tapacadhaneini, papia ki pasalrivane pacai, si kingivavale pamalebe ki pasalrivane; ku panianianiakeini kikai, pasiakai ki Twaumase panianiake.

¹¹ Laka thadalrane, lu twaladhane ki pasalrivane kawriva, alra ngitatu wapacainga: Ai ikai adringi ki niake ki Kirisitu Yesu, panianianiake numi pasikai ki Twaumase.

¹² Lakamani, madha pelanga pangilralraingi ki pasalrivane padrekadrekase kwini ki lri tara kaburau ka kinawmasane numi, si pasalaladha ki urikaiyane ki kinawmasane numi:

¹³ La mialri kwini kinawmasane numi madha amalebelebe ki pasalrivane, si madha ararukurukudrane ki ngialisiane. Ngibalrea kamani, ngipapatarumara baai ki Twaumase, mia kudra ki twalai ki wapacai si kipapanianiake ka umawmase, ngipapakanaelrea patarumara iniane, si alawbubulu ka takaiyane ki dringelresane.

¹⁴ Twalai kikai, kunumi madha kimarasikaikainga ki pasalrivane; asi lwiyane kai numi yatailebeanenga ki hulrice, yatailebeanenga numi ki migemi ki Twaumase.

Sasiakawlu ki dringelresane

¹⁵ Lu iyane kikai, amani sa kaita itailebeanenga ki hulrice, yakaingata tailebeane ki migemi ki Twaumase, si lai kai katumane lu pasalriuta? Lutumane kai lri ngimia kwini!

¹⁶ Lri tara thingale numi, lu aduri numi ki umawmase si pasalaladha ki tawki, amaninga numi ku duri iniane. Kikai amia kai, lu aduri numi ki pasalrivane, ku angimiane apacadhane; lu pasalaladha numi ki Twaumase, lai kitumadringelrese numi.

¹⁷ Maelanenga ki Twaumase! Adravane ka naaduri numi ki pasalrivane, kaiasasane saliakavaevanga numi ku kidremedreme pasalaladha kudra pelaelaela nai numiane kudra sabulrwane.

¹⁸ Kiapatwalainga numi ki pasalrivane kipulatadre, si asasiakawlunga ki dringelresane.

¹⁹ Mwakuludraku lu kai numi maka thingale ku kidremedremeli, lakamani kai arakaili kai maduai kai sapathalrilrikwane kawriva numiane. Kunadruma ngialralraingi numi ku urikaiyane ki kinawmasane numi, si pia ku malisi ka kakudhane, aduri ki pasalrivane. Kikai kunumi kitulrepenga ngipapatarumara, si asasiakawlu ki dringelresane, kamaninga ku mabula ka takaiyane.

²⁰ Saka duriana numi ki pasalrivane, kai numi kiaruthukwana ki dringelresane.

²¹ Kai matialrwalrumale iya numi kikai, ku natapiane numi kunadruma, laka manemane ku la malra numi ku akaesadhane? Apacadhane sikakathane!

²² Kaiasasane, kiapatwalainga numi ki pasalrivane kipulatadre, si asasiakawlunga ki Twaumase; lu pakaelre numi ku niake baai patarumara iniane, ku lrika amalrane yai palralrawthunga ka niake.

²³ Asi lwiyane ku balrithane ki pasalrivane yai apacadhane; ai ku vinuthane baai ki Twaumase mitane ku migemi yai, amani kudra amalraneta ku palralrawthu ka niake patwalai ki niake ki Tamatama ka Yesu Kirisitu.