Ruma 3 - Ngudradreadrekadhane Ka Sisiu 魯凱語聖經

¹ Luka ngimiyaiya kai, kai swa Yuda yakai ku manemane ku akasilrialribatane ki sakamaelanane ka umawmase? Ku kiagelregelre ka lrisi yakai ku manemane ku paluludane?

² Ku patengatengane yakai papia kidruanga. Ku aswalalanga, ku Twaumase wamalra ku vagaini baai patarumara ki swa Yuda.

³ Ikai liniane adravane ikai ku kai masalrunga, ku Twaumase lri ngwalai kai si kaika patengatengane?

⁴ Kaika miyaiya kwini! Adravane kadraedrangelre kai umawmase, ku Twaumase patengatengane, mia ku taiyane ki Sisiu iya kai: Lu avavagasu, kadrwa ku atakaiyane tulisi, lu ki kukususu, lri tara akacisu.

⁵ Alaiyasi kikai kaika uleceganeta la dulru pathingalane ku dringelresane ki Twaumase, lri tumanaiya kawriva? Lu pathavungu ku Twaumase mitane, amanini ka kaika madringelrese? (Singiakaiyaku ku takidremedremane ki umawmase kawriva.)

⁶ Kaika miyaiya kwini! Alaiyasi kaika madringelrese ku Twaumase, lri tumane dulru saibange ki yakawmasane?

⁷ Alaiyasi kai drangelraneli la dulru aru pathingalane ku takapatenganane ki Twaumase, si aru kilrigu, lri tumanaiya kawriva? Anaku kirimu kitupasalrivaneana?

⁸ Ani kai iya kai, “Ala takanganganga lani athingalane ku mathariri?” Yakai ku laumawmase ku amianga ku miyaiya kai ku vaga amia nakwane si kukusu; kwini lalasu lu kitupasalrivane yai pacengecenge.

Kadrwa ku mwalecege ku umawmase

⁹ Lumia kwini, kuta ka swa Yuda laka sanianiangeta ki sakamaelanane ka umawmase midra? Kadrwa ku miyaiya kikai! Peaelaelangaku, kai swa Yuda si sakamaelanane ka umawmase mararaamau ka kiaruthuku ki puku ki pasalrivane.

¹⁰ Mia ku taiyane kai ki Sisiu: Kadrwa ku umawmase ku madringelrese, adravane ka natangeanga kadrwa.

¹¹ Kadrwa ku malrigili ku umawmase, laka kadrwa ku namwarikaikaainga ki Twaumase.

¹² Sanaka umawmase sangwalrilrikudru katwase ki Twaumase, si karedededele katwase mwa ki makawli ka kadalranane; kadrwa ku umawmase ku paiyaiya ku mathariri ku kakudhane, adravane ka natangeanga kadrwa.

¹³ Kudra lrulrungu lini mia ki nimucaebane ka balriu; kudra lridame lini taratavuvuvulrucu lu kawriva patuelre; ku twalai ki ngudui lini utaluvaivai mararaamau ki duku ki sulrau;

¹⁴ ku ngudui lini swaete ku ngilisianane ka duku ka pusu.

¹⁵ Kwini lalasu maru ngiapalainga ku ridarane mwa kidruanga, kabebetethe papacapacai;

¹⁶ sanaka tamwane, athingalane asuru ku takabebetethane matiangeange.

¹⁷ Kwini lalasu la kai thingale ala ka yakai ku akasulivatane ka kadalranane;

¹⁸ kwini lalasu la kai thingale tausakene tamukuludru iya ki Twaumase.

¹⁹ Wathingaleta, ku drekase ki hulrice yai amanimani ki yatailebeane ki hulrice ka umawmase kawriva, pakai ki yakawmasane sanaka umawmase ku aguruthunganane itailebe ki asaibangane ki Twaumase, kudra kaika adulrwane ki umawmase ikaiyana ku atakaiyane avavaga.

²⁰ Asi lwiyane kadrwa ku umawmase ku wadulru satalu ku tapaluludane ki hulrice si icucubungu ki Twaumase kitumadringelrese; kai hulrice sapathingalane ki pasalrivaneini ki umawmase sikakathane.

Ku Twaumase wamalra ki umawmase pawlecege ku amakakadalrwane iniane

²¹ Ai kaiasasane, ku Twaumase pathingalanenga ku apangimiane ki umawmase si pacengecenge pamamwa ku tamakakadalrwaneini; kikai yai kadrwa ku tamacacapilane ki hulrice. Ku hulrice ki Musi si layuginsia amia kai akasi.

²² Ku Twaumase wamalra ki umawmase pakadawdalru iniane, ngwakai ku takasalrwane lini ki Yesu Kirisitu. Ku Twaumase twangimiyaiya kikai kwidra ki sanaka masaalru ki Kirisitu ku umawmase, kadrwa ku tapakaelaelane:

²³ Asi lwiyane sanaka umawmase pasaalriwnga makanaelre, akiamenga ku lrigu ki Twaumase.

²⁴ Ai, ku Twaumase wavutha baai ku migemi, pangwakai ki Yesu Kirisitu si palribulu liniane ala dulru makakadalru iniane.

²⁵ Ku Twaumase kai pathilipi ki Yesu, wamalra iniane tu Samupasalrivanane ka lrisi, pangwakai ki tapacadhaneini, ku umawmase la ngwalai ku sakiapawteatenga lini ki Yesu si kipacepe ku pasalrivane. Ku tapiane kai ki Twaumase pathingalane ku dringelresaneini.

²⁶ Asi lwiyane kiadili, pacepe ku tapasalrivane ki umawmase. Ai kaiasasane, la arakai ku tamwalrane ku pasalrivane pathingalane ku dringelresaneini. Lumiya kikai, ku Twaumase paathingalane ka amani ku madringelrese, si sanaka kiapawtenga ki Yesu ku umawmase la makitu makakadalrunga ki Twaumase.

²⁷ Manemaneana ku angilralrigwaneta? Kadrwa ku natikianenga! Laka ngwakai ki manemane? Amani sapaluludu ki hulrice? Kai ngiamia kwini! Ngwalai ki salrwane.

²⁸ Ku turingaringau nai yai: Ku adulrwane ki umawmase makadawdalru ki Twaumase ngwakai ki salrwane sikathane, kaika ngwakai ku tapaluludane ki hulrice.

²⁹ Ku Twaumase bekace ka Twaumase ki swa Yuda sikakathane? Kai ka maiyalri ka Twaumase ki sakamaelanane ka umawmase? Unu lai kisumali!

³⁰ Tangeangea ku Twaumase, ani patwalai ki salrwane amia ki swa Yuda, si kai sakamaelanane ka umawmase lamialri patwalai ki salrwane si makadawdalru iniane.

³¹ Lu iya kai kawriva, kai salrwaneta lri amudunga ku kakudhane ki hulrice ki Musi? Kai lrika ngiamia kwini! Ngiabaalrelringa, arwa pakapapedrengeta ki hulrice.