Ruma 2 - Ngudradreadrekadhane Ka Sisiu 魯凱語聖經

Tasaibangane ki Twaumase

¹ Retesane, lu raeratengesu ki palrapalra, adravane ka aneanesu, kaika amaka pacepane. Lu raeratengesu ki palrapalra, la ka mialrisu piyaiya, ngiatatu pasalrivanengasu.

² Wathingaleta, ku Twaumase lu saibange ki paiya kikai ku umawmase yai kai pasalriu.

³ Ai, retesane, kwini malrasu si arakai raeratenge ki palrapalra kwini lamaneemanenga ala amani ku piapiasu! Lu kidremedremesu lri dulrusu maka ubere ku sasaibangane ki Twaumase?

⁴ Siadrekasesu ku thalradhaneini, ku pacepaneini, si kiadilaneini? Nai thingalesu ku Twaumase mathalrai, asi lwiyane ani ngitatupela amia muswane!

⁵ Ai, makawlukulunga kakelrathe turamuru kwi kidremedremesu, arwa dawlulringasu ku makaakalra ku elathane, ikai ki elathane si dringelresane ka sasaibangane ki Twaumase lu kelanga kudra vai lrika mateelrelrege ku akipathavungane.

⁶ Asi lwiyane ku Twaumase lri singikai ku kakwakudhaneini sanaka aneanenga pangibilri iniane.

⁷ Yakai kai la tapangimiane ku kidremedreme pia ku mathariri, si kisamula kisilape ku twalai ki Twaumase ku kiwsakenane, ku lrigu, si kai lri kalisinga ka niake; ku miyaiya kai ku umawmase, ku Twaumase lri baai liniane ku palralrawthu ka niake.

⁸ Kudra la ngiapapakaesai, kai tarwamara ku patengane ka sabulrwane, la tupapaalralringa ki kai mwalecege ka umawmase. Ku elathane ki Twaumase si sapathavungane lri ulebe makakai liniane.

⁹ Sanaka paiyaiya ku ngialisiane ku umawmase makanaelre lri kai maka ubere ki amatikurwane si akwalriane, lri aswala ku swa Yuda, ala lrika sakamaelanane ka umawmase.

¹⁰ Ai, ku paiyaiya ku mathariri ka umawmase makanaelre, ku Twaumase lri baai liniane ku akiwsakenane, ku lrigu, si sulivatane, lri aswala ki swa Yuda, ala lrika sakamaelanane ka umawmase.

¹¹ Asi lwiyane kai apakaelaela ki umawmase ku Twaumase.

¹² Ku sakamaelanane ka umawmase kadrwa ku hulrice ki Musi, lu pasalriu lai kai lri kiarakai ku hulrice saibange, kai swa Yuda yakai ku hulrice, lu pasalriu lai lri singikai ki hulrice kisaibange.

¹³ Asi lwiyane kudra lri kai kitupasalrivane ki Twaumase ku umawmase kaika amani kudra kialalalalra ku hulrice sikakathane. Amani kudra pangiamia ki hulrice ka umawmase.

¹⁴ Ku kadrwa ku hulrice ka sakamaelanane ka umawmase, alaiyasi ngikakamani pia ku mamamwa ki hulrice, kwini lalasu adravane ka kadrwa ku hulrice amaninga lini kudra hulrice.

¹⁵ Kudra kakwakudhane lini pathingalanenga ku drekase ki hulrice ala ka wapacase pikai ki kidremedreme lini ka sapelaelane ala ka pacengecenge kikai; asi lwiyane ku takidremedremane lini yakai lu ngikakaelaela, yakai lu ngipapalakebe kawriva.

¹⁶ Lakamani, lu singikaiyane kai pelaelaelali kai hukuingi, ikai ki apalikaiyane ka vai, ku Twaumase lri pangukai ki Yesu Kirisitu, si papia ki kaika makathingaleta ka kidremedreme ki umawmase saibange.

Swa Yuda si Hulrice

¹⁷ Ala, laka ngitwatumanesu? Kusu ngiatatu swa Yudasu, si satalu ki hulrice, la ngilralrigusu ku takipawkalrivilanesu ku tamacacapilane ki Twaumase.

¹⁸ Kiapatwalrawngasu ki hulrice, si thingale ku pia kwini iya ki Twaumase muswane, la dulru thingale ku pacengecenge si ini.

¹⁹ Kusu ngiatatu taraililukusu ki mukimukici, ka ledra ki dradrimitane,

²⁰ ka tarabulrubulru ki makulrungu, si ka sinsi ki yacengecenge. La iyanasu kai kidremedreme, amani sa ikai muswane ku hulrice ki Musi, la magagemegemesu ku thingalane si patengane ka sabulrwane.

²¹ Wabulrusu ki palrapalra, asu kai ngibabulru? Wabulrusu ki palrapalra madha kupawpa iya, la kupawpasu?

²² Madha padralra amiasu, la padraalrasu? Mavalracevacesu ki samiamiange, la kupawpasu ku yakai daane ki biu ku lamanemane?

²³ Ngiakalrilrigusu ku taikaiyane ku hulrice ki Twaumase muswane, kaisu mabebetethe ku hulrice ki Twaumase si pakiarubwane iniane?

²⁴ Ku Sisiu amia kai, “Ngwalai numiane ka swa Yuda, ku nagane ki Twaumase kiatusinalrelreme ki sakamaelanane ka umawmase.”

²⁵ Alaiyasi paluludusu ki hulrice, ku takigelregelranesu tulrisi yakai ku pacugane; lu baebalresu ki hulrice, ku takigelregelranesu tulrisi kadrwanga ku pacugane.

²⁶ Luka ngimiyaiya kai, ku kai kiagelregelre tulrisi ku umawmase alaiyasi paluludu ku drekase ki hulrice, ku Twaumase kai ka lrika pasudalepenga iniane ka kiatulrisinga ka kiagelregelrenga?

²⁷ Kunumi ka swa Yuda lri kitupasalrivane numi ki sakamaelane ka umawmase, asi lwiyane adravane ikai numiane ku hungu ka hulrice, si ka kiatulrisinga kigelregelre, ai kudra mabebetethe numi ki hulrice; kai lalasu adravane ka kai kiatulrisi kigelregelre ku kinawmasane, ai kudra pangiamiamia ki hulrice.

²⁸ Ku patengatengane, laka aneanelringa ku patengatengane ka swa Yuda, patengane ka kiatulrisi kigelregelre ka umawmase? Kai ka amani kudra pangwa kawmasane aswa Yuda ka umawmase, si kitulrisi kigelregelre ku kinawmasane.

²⁹ Ku tengatengane ka swa Yuda patwalai ki kidremedreme pathagili; lu balrithane kawriva kikai, kudra kidremedremeini kiatulrisi kigelregelre, ka kaungu ki Ri ki Twaumase, kaika pangwakai ki hulrice ka hungu. Kudra miyaiya kikai ku umawmase ku akidrengedrengerane kai lri twalai ki umawmase kainganai, lri twalai ki Twaumase kainganai.