Ruma 16 - Ngudradreadrekadhane Ka Sisiu 魯凱語聖經

Ku Pawru wasukubu ki lasinzia

¹ Lri siwkadhaku numiane ki retesaneta ka Huibi; yakai kai Cinkeria kiwkai kai alisu sicezi.

² Ngwaladha ki Tamatama si pasudalru iniane, kai alisu pakaelre ku kidremedremeini kaungu ku takasinziane. Anika manemane ku murikaini, paraluba iniane kwi alisu nakiasamula turamuru paralubu ki takaalra ka umawmase, adravanaku nakiaparalubaku iniane.

³ Aii amiamia iyaiyanga kudra ki pasiakaikai ki Yesu Kirisitu ka Pirisecila si Akuila;

⁴ kwi ladrusa palraingi kisanu pacai pasikai nakwane. Kainaku ka kathane ku kiaseasene liniane, kai sakamaelanane ka lakiwkai mialri kiaseaseasene liniane.

⁵ Aii iyaiyanga ki yakai ki daane lini yelrelre ka kiwkai. Aii iyaiyanga ki kadalameli ka talragili ka Ipainituse; kwi lasu ikai Asia aswalalanga kisusu ki Kirisitu.

⁶ La kiaseasena ki amani ku pasiakaikai numiane kwalri kaungu ka Malria.

⁷ Aii iyaiyanga ki napalrali kiemenge ka sakacekele ka swa Yuda ka Anedruniku si Yunia. Ikai ki lanisikawlane kiamatikaikai, laka aswalala nakwane kisusu ki Kirisitu.

⁸ Aii iyaiyanga ki kadalameli ka talragili ikai ki Tamatama ka Amipiliatu;

⁹ aii iyaiyanga ki pasiakaikai kaungu ki Kirisitu ka Urebanu si kadalameli ka talragi ka Setaku.

¹⁰ Aii iyaiyanga ki Apelese ka ngialribatenga ki akikituthiathingalane, laka takapatengatenganane ku kidremedreme papia ki Kirisitu; la mialria aii iyaiyanga ki Arisetubuluse si lawacekecekeleini.

¹¹ Aii iyaiyanga ki sakacekele ka Hirudiune; la mialri, aii iyaiyanga ki retesane ka Narecisu si wacekecekele ka kiasusunga ki Tamatama.

¹² Aii iyaiyanga ki kwalrialri pasikai ki Tamatama ka lamali ka Turipaina si Turipusa; la aii iyaiyanga ki nikilibakane ka kiasamulamula kaungu pasikai ki Tamatama ka alisu ka Peresi.

¹³ Aii iyaiyanga ki Ruhu; kwi lasu ikai adringi ki Tamatama malrigili ka tarakawaungu; la aii iyaiyanga ki tinaini, twathadalrane ki lalakeini nakwane.

¹⁴ Aii iyaiyanga ki Asingekerituse, Piligune, Heremi, Pateruba, Herema, si laretesane ka papapalra lini.

¹⁵ Aii iyaiyanga ki Pililigu si Yulia, la ka Niriu, agini si labetakaneini ka ababai, la ka Ulimepa si taelre liniane ka lasinzia.

¹⁶ Kunumi arakaiya ku bulane matubarengerengerane. Ku la kiwkai ki Kirisitu aii amiamia numiane makanaelre.

Bibiilrilinga ka tapasapukwanane

¹⁷ Laretesane, lri pakipapawlringavaku numiane, dradrela telenge kudra la lri pawvagavagai, si velevele ku salrwane ku kidremedreme ki umawmase, la kidaila kudra wacilringa ki kibulrunga numi ku umawmase.

¹⁸ Asi lwiyane kai miyaiya kaika umawmase kai pasiakaikai ki Tamatamata ka Kirisitu kaungu, pangwalwalwadhane ki barange lini. Kwi lalasu arakai ku mathariri ka lrigilane ka vaga si pamama ki patengatengane kai kadraedrangelre ka umawmase.

¹⁹ Wathingale makanaelre ku takasalrwane numi si pasalaladha ki hukuingi, ngwalai kai kiaragadhaku numiane turamuru. Ani kalrigili ikai ki mathariri ka awngane, la kakulrungu ikai ki malisi ka awngane amiaku.

²⁰ Ku wabaai ku sulivatane ka Twaumase lri kabebetethe suburu ki Satange, ku lrika akasalelebeane ikai tailebe ki drapale numi. Ku Tamatamata ka Yesu ani baai numiane ku migemi!

²¹ Kai papalrali kaungu ka Timuthi, si sakacekele ka swa Yuda ka Luciu, ka Yasune, si Susipatere, aii amiamiya numiane makanaelre.

²² Ku atalingikaiyane nakwane pacase kikai tigami ka Teretiu, mialri ikai ki Tamatama si aii iyaiya numiane.

²³ Kudra paswadalru nakwane, la pikai ki daaneini pairubu ki swa kiwkai ka Gaiuse aii amiamia numiane, kudra taramarasikaikai ki paisu kai ki cekele ka Irasetuse si retesaneta ka Kwaretu mialri aii iyaiya numiane.

Satulrepengane ka inulri si sadrengedrengerane

²⁵ Ku lrigu ani papia ki Twaumase! Lri dulru singikai kai pelaelaelali kai hukuingi si pakakecenge ki salrwane ki kidremedreme numi. Kikai hukuingi yai patharukai ki Yesu Kirisitu ka matiakiragai, pathingale ku twalai kunadruma ka kaika athingalane ka matiasamaimali.

²⁶ Kikai kaika athingalane ka matiasamaimali yakainga ki hungu ki layuginsia athingalane, si singikai ku drekase ki palralrawthu panianiake ka Twaumase pelaela ki sanaka kuni, ku lrika akasalrwane si pasalaladha ki sanaka umawmase.

²⁷ Ku lrigu ani ngukai ki Yesu Kirisitu si papia ki vaeva ka wathingale ki sanaka maneemane ka Twaumase, pakeela apalralrawlrawthane! Amingi.