Ruma 15 - Ngudradreadrekadhane Ka Sisiu 魯凱語聖經

Kai mwarikai ku angulwadhananeini

¹ Kuta ka makecenge ku salrwane ka umawmase nai paralubuta ki twaramuru ku salrwane, si kivala siamece kudra matelrege ka amece lini, si kai murikai ku angulwadhanane ngikakamani.

² Kuta ka tangea tapasikai kidremedreme ku akaesadhane ki laretesane, si pacegecege ku maramaramau ku salrwane ikai ki tapanianianiakane.

³ Asi lwiyane ku Kirisitu kai mwarikai ku angulwadhananeini, ngiamialringa kudra taiyane kai ki Sisiu, “Kudra sicelregane ki siacelrecelrege numiane ku umawmase makakai nakwane patuelre.”

⁴ Kai vaga ki Sisiu wabulrubulru mitane patuelre ku tapacasane, ku pacugane yai pakai ku adulrwaneta patwalai ku sabulrwane ki Sisiu ku akiadilane si sapasapukwanane la tarumara ku sasiadradrama.

⁵ Kudra amani ku wabaai ku akiadilane si sapasapukwanane ka Twaumase aniparalubu numiane pikai ku maramaramau ku tadrelane, si twalralrau ku tapatwalravane ki Yesu Kirisitu,

⁶ lata taelre makanaelre, si masiasilange drengedrengere ki Twaumase ka Tama ki Tamatamata ka Yesu Kirisitu.

Wadindu papia ki sakamaelanane ka umawmase

⁷ Lakamani, pakai ku akilrigwane ki Twaumase, kunumi matarumaramara mia ki Kirisitu satarumara numiane.

⁸ Nau pelaela numiane, ku Kirisitu pakai ku apathingalane ku takapatenganane ki Twaumase, la asasiakawlu ki swa Yuda, pakai ku angimiane ku takiketeketane ki Twaumase ki latamatama,

⁹ laka thadaalrane ku adrengedrengerane ki sakamaelanane ka umawmase ku thalradhane ki Twaumase. Mararamau ku taiyane kai ki Sisiu: Ngwalai kai, lri ikaiyaku ki sakamaelanane ka umawmase drengedrengedrengere muswane; lai senadhaku ku naganesu.

¹⁰ Kai Sisiu la iyanga kai: Sakamaelanane ka umawmase, Tupapalra ki laumawmase ki Twaumase si karededele kiraragai!

¹¹ La iyana kawriva, sanaka sakamaelanane ka umawmase, drengedrengera ki Tamatama! Sanaka umawmase, drengedrengera iniane!

¹² Ku Isaiya la mialri iya kai: Yakai ku mwabaibalrithi ki Yesi ku lri kainganai, kwi lasu lri ngidrakale si rathudu ki lasakamaelanane; ku lasakamaelanane ka umawmase makanaelre lai lri satalu iniane!

¹³ Ku Twaumase, ka amani kudra berai ki sasiadradrama, lri ngwalai ku salrwane numi iniane, lai lri suete numiane ku la akiragadhane, ku sulivatane, ku sidramane numi, lri ngukai ki puku ki Siri, si aru drimadrima.

Ku Pawru wacungucungu kawriva

¹⁴ Laretesane, patenganaku thingale ka kiasuete numi ku ulecegane, si kakalra ku thingalane, dulru mabulrubulru.

¹⁵ Ai, ikai kai ki tigami, papia kudra ki lamundai, sakamiaku kagarange pakipapawlringau numiane. Lu piaku kai cungucungu kawriva, amani sa baai nakwane ku Twaumase ku nipawkalrivilane ka puku,

¹⁶ la asasiakawlaku ki Yesu Kirisitu, si ikai ki lasakamaelanane ka umawmase kawaungu. Mararaamavaku ki barakalai pelaelaela ku hukuingi ki Twaumase, pakai ki lasakamaelanane ka umawmase ku lrika akamaniane lini ku sarakaiyane ki Siri tusapatarumarane ka waudriwdripi baai ki Twaumase, kamani ku kiragai ki Twaumase tarumara.

¹⁷ Laka miyaiya kai, amani sa ikaiyaku adringi ki Yesu Kirisitu, lri dulrwaku ngwalai ku tapasikaikaiyaneli ki Twaumase si ngilralrigu.

^18-19 Ku lrika akagaranganeli kawriva niakuvavalane: Ku Kirisitu pangwakai ki vagali si tangivelevelaneli, la arakai ku pinangu Twaumasane ka puku si matiasamali ka awngane, si puku ki Ri ki Twaumase, wamalra ki sakamaelanane ka umawmase si papasalaladha ki Twaumase. Ngwalai kikai, twalai Yerusalrime pakela talikai Iliricume, wamwaku kidruanga pelaelaela ku hukuingi ku ngwakai ki Kirisitu.

²⁰ Ku tasidramaneli amani ku adindwaneli, ikai ki kaiyana kialalra ku pangukai ki Kirisitu, amani lu acegecege kai kawaunguli ikai ki karwalai ki palrapalra.

²¹ Kai Sisiu amianga kai: Ku nakai wathingale iniane ku umawmase lri drele; ku kaiyana kialalra iniane ku umawmase lri pulringalringau.

Ku Pawru kiadremedreme ku amwane lrikape Ruma

²² Ai, kingikalralaku kitetelenge, si kai maka dulru mwa numiane kwini.

²³ Ai kaiasasane, kudra twalrepengengaku kai taitalikaiyaneli kai ku awngane, si la kawlainga ka caili ka tapimwaneli lrikape numiane,

²⁴ apia mwaku kaiasasane, lu papiapiaku Sepania ikadalranane, nau ngukakainga drele numiane, si taelreana numiane ikai kwini makapiale, ala nuparalubu nakwane ku apacungulaneli katwase.

²⁵ Ai, pangukai ku apalribulane ki lasinzia kaiasasane lri tara mwaku Yerusalrime.

²⁶ Asi lwiyane kai swa Makidunia si swa Akaia ka kiwkai kiaragai palribulu ara paisu, si paralubu ki sinzia Yerusalrime ku matiakukuru ka laretesane.

²⁷ Unu kikai kiragai lini pia, ai ku patengatengane mialri ka naika apiane lini. Kai Kirisite ki swa Yuda ku pakiasupilringa ku kipatarumara lini ki Twaumase, kai swa sakamaelanane ka umawmase lri mialri arakai ku lamanemane paralubu liniane.

²⁸ Lu tulrepengenga naku kikai awngane, si baainga pakipapawlringau kudra baai lini paralubu ku paisu, lri ngukakaiyaku numiane kwini, si mwa Sepania.

²⁹ Wathingalaku, lu katwasaku lrikape numiane lri mialriaku mailuku ku makaalra ku migemi ki Kirisitu si baai numiane.

³⁰ Laretesane! Sakai ki Tamatamata ka Yesu Kirisitu, la sakai ku baai ki Siri ku sakialialibake, kiatubiaku ku atupapalrane numi nakwane ka tengatengane kitubi ki Twaumase.

³¹ Ku kaika akitulisianeli ki yakai Yuda ki kai masalru ka laumawmase, lani ngulwadhane ku sinzia ku taikaiyaneli Yerusalrime marasikai kaungu ku sapalribulane.

³² Alaiyasi palraingi ku Twaumase, lri maka dulrwaku takukirararagai katwase drele numiane, si ikai numiane isadrana makapiale.

³³ Ku amani ku wabaai ku sulivatane ka Twaumase ani ikai tapalra numiane makanaelre! Amingi.