Ruma 13 - Ngudradreadrekadhane Ka Sisiu 魯凱語聖經

Sikiningi papia ki swa kunkwane

¹ Sanaka aneanenga lri pasalaladha ku puku ki kuni, asi lwiyane palraingi ki Twaumase kudra lrika aikaiyane ku puku; kudra puku kudra ki yacengecenge ka warathurathudu ikunkwane twalai ki Twaumase.

² Lakamani, ku kiaecebe ki warathurathudu ikunkwane amani ku kiaecebe ku drekase ki Twaumase; ku miyaiya kai ku umawmase lri tara kisaibange.

³ Ku magagemegeme kai lri paukuludru ki makalecelecege ka umawmase, lri paukuludru ki paiyaiya ku malisi ka umawmase. Nau kai ukuludru ki warathurathudu ikunkwane lu iyasu, pia ku mathariri ku awngane, lani lrigu muswane;

⁴ asi lwiyane Twaumase ka arakaikai iniane, ku awnganeini apakaesadhane muswane. Alaiyasi piasu ku malisi, lri ukuludrusu iniane, asi lwiyane ku sapathavunganeini kaika parwarwaruthale. Twaumase ka arakai iniane, lri pangimia ku sapathavungane ki Twaumase papia kwidra ki paiya ku malisi ku awngane ka umawmase.

⁵ Lakamani, lri tara pasalaladha numi ki warathurathudu ikunkwane, kaika aukuludrane sikakathane ku sapathavungane ki Twaumase, mialri pakai ku akasulivatane ku takidremedremaneta.

⁶ Lu tukazilu numi, mialri ka pasiakai ki thadaalrane ku pacucugane, asi lwiyane ku warathurathudu ikunkwane lu piapia kipuawngane yai pasiakaikai ki Twaumase kaungu.

⁷ Lakamani, lri sawlri numi patuelre kudra kiame numi: Ku apatarumarane, badha patarumara; ku akazilwane, baadha tukazilu; ku amukuludrane, mukuludra; ku ausakenane, usakena.

Sikiningi papia ki palrapalra

⁸ Madha akiakiame! Kathane ku amakilibalibakane ka maru kiamenga numi. Kudra kialibake ki palrapalra, amani ku paluludu ki hulrice.

⁹ Yakai ku drekase ki hulrice ki nitukakudhanane ku amia kai, “Madha sudringadringai; madha papacapacai ki umawmase; madha kupawpa; madha kararau.” Ki kikai patuelre si kudra drumane ka drekase waelrelrenga ikai kai ki “Kilibaka ki umawmase mia lu ngikakilibakesu” ka padradrekase.

¹⁰ Ku kialibake ki palrapalra ku umawmase, kai lri pia ku atulisiane ki palrapalra ku awngane. Lakamani, kai sakialibake pakiatulrepengenga patuelre ki hulrice.

¹¹ Lri tara pia numi kai, asi lwiyane wathingale numi kikai luka watumatumanenga ka vai; kikai akasimeacanenga numi twalai ki tapecane. Kaiasasane padedethengata ki satau kisusuta ku sapalribulane ki Twaumase.

¹² Lri padalrunga si ngilribate ku dradrimitane, lai lri kelanga ku vaiyane. Takai pianga ku ngiakulrungu ku awngane; malra ku sakikaruburuburane si ngipapadulru ku akikaruburane ikai ki vaiyane.

¹³ Ku tatwatumanane si takaumawmasaneta tangukalealedrane, mia kudra ki panianianiake ikai kudra ki vaiyane. Madha ngilralraingi kabusuku, madha ngilralraingi ikai ki asudringadhane, madha karivu mapathathalra.

¹⁴ Ai, kunumi arakaiya ki Tamatama ka Yesu Kirisitu ngirarukudru; madha kakalikalithi sikakathane ku angulwadhanane ku urikaikai ki kinawmasane numi!