Ruma 12 - Ngudradreadrekadhane Ka Sisiu 魯凱語聖經

Pasiakaikai ki Twaumase ku tapanianianiakane

¹ Lakamani, laretesane, kudra paiyanga kikai kakalithi mitane ku Twaumase, lri pasapukwanaku numiane, malra papanianianiake ku kinawmasanesu si patarumara ki Twaumase, la savaeva ku kidremedreme pasikai iniane, si kikiragai iniane. Ala amani kikai ku apiane numi patarumara ka patengatengane ka sasukubane.

² Madha kimalramalra si singikaikai ki kawmasane, ani ka Twaumase ku pakiatulrepenge pakabalrithi ki takidremedremane numi, lri thingale numi ku takidremedremane ki Twaumase, si thingale ka manemane ku ulecegane, ku kiatulrepenge, kamani ku kiragaini.

³ Singikai ku baai ki Twaumase nakwane ku migemi, lri kawrivaku numiane: Madha ngidradrele si ngitatu abelenge turamuru, ngitatwalebea si ngikakamani pangimia, si makitu singikai ku baai ki Twaumase ku salrwane si ngilalekete.

⁴ Ku vaeva ku kinawmasane ngiadarepe twalai ki makaalra ka rarukurukudru ka kinawmasane, sanaka rarukurukudru ka kinawmasane ikai ku makaelaela ku paluludaneini.

⁵ Laka thadaalrane, adravane ka takaalrata, ikaita adringi ki Kirisitu avaeva ka kinawmasane, ka marairaisi, ikai ki kinawmasane makaelaela ku tangimiane.

⁶ Lakamani, tapakathariri arakai ku makaelaela ku baai ki Twaumase ku migemi, si pia ku apiapiane ku awngane. Alaiyasi ka apelaelane ku hukuingi ku baai ki Twaumase ku migemi, lrika arakaiyane ku takathanane ku salrwane;

⁷ luka apasikaiyane ki umawmase kaungu, lri pasikai kaungu; luka abulrwane, lai lri bulru;

⁸ luka apasapukwanane; lai lri pasapukwane; luka abaadhane ki palrapalra, lai lri katwabake baai; luka atamatama, lai kai takidulru ku akwalriane; luka akakalithane ki umawmase, lai lri kiraraagai.

⁹ Lu kilibakane ki umawmase twakapatengatengane madu. Kalrasa si cilri ki ngialisiane, la paluludu ku ulecegane.

¹⁰ Tungimiyaiya ki betakane makilibalibake; pakaelrea ku kidremedreme mawsakesakene.

¹¹ Madha kasalrai, kisamula kaungu, si arakai ku culwane ku kidremedreme pasikai kaungu ki Tamatama.

¹² Ikai ki sasiadradrama kirararagadha, ikai ki sapapacai la kiadili, kakalitha si kai kaelaela ku ainulriane.

¹³ Pakisupilra ku lamanemanesu patuelre ki lamatiakukuru ka retesane; tarwamara madu pasudalru ki singibadhabadhane ku umawmase.

¹⁴ Swabulrubulru madu ku wahakegai muswane ku umawmase; unu, swabulrubulru madu, madha pusupusu.

¹⁵ Twapapalra madu kiraragai ku kiaragaragai ku umawmase, la tupapalra madu tubi ku watubitubi ku umawmase.

¹⁶ Adravane ka ngitwatumane ka umawmase, twathadaalrane madu kakalithi. Madha ngikalrilrilrigu, waguruthungane madu kamani si ngitatu alebe; la madha ngitatu malrigili.

¹⁷ Madha arakaikai ku ngialisiane pangibilri ki ngialisiane; mathariri kai sanaka niyane ka awngane, marabere madu katwase kaungu.

¹⁸ Pakaelrea ku pukusu kikadalru si kielre ki laumawmase.

¹⁹ Laretesane, madha ngipapasikaikai bilri ki badhasu, maesaesai kamani ku elathane ki Twaumase lu putaluvaivai ku kivuthasu, asi lwiyane amia kai ku Sisiu, “Amia kai ku Tamatama: Ku pwataluvaivai ku vinuthane yakai nakwane, lri tara pangibiilriaku.”

²⁰ Kai Sisiu la iya kai, “Ku badhasu alaiyasi kasilrau, wapakane madu iniane, lu kakadhame, la paungulu madu iniane; lu piasu kwini lri pasidrwadrwa ku akainwaneini.”

²¹ Lakamani, madha kipamalebelebe ki ngialisiane, arakaiya ku tharirane si pamalebe ki ngialisiane.