Ruma 11 - Ngudradreadrekadhane Ka Sisiu 魯凱語聖經

Thalradhane ki Twaumase ki swa Iseraylri

¹ Lalri kivagaku: Ku Twaumase la cilri ki laumawmaseini? Ini! Kwaku mialriaku ka swa Iseraylri, ka mwabaibalrithi ki Aberahame, ka zuku ki Biniyamingi.

² Ku Twaumase twalai sakanadruma kai wacilri kudra pilrini ka laumawmase. Wathingale numi, pinacasane ki Sisiu: Ku Ilria sa kukusu ki swa Iseraylri papia ki Twaumase,

³ kwi lasu amia kai, “Tamatama, kwi lalasu papacai ki yuginsiasu, la buruku ku tapatarumaramarane muswane; la kakathanenga naku tangeangeanga, kwi lalasu la pasana papacapacaiyana nakwane.”

⁴ Ku Twaumase tumana amia tubalre iniane? Amia kai, “Pwatedrana naku ngipapasikai ku tapitu ka kudrulu ku umawmase, kwi lalasu kaiyana wasukubu ki Baale.”

⁵ Kaiasasane ku tangimiamiane la mararaamau: Ku Twaumase ku patwalai ki migemini si pilri ku umawmase tabeekelenga ku tedrane.

⁶ Ku tapilriane ki Twaumase singiakai ki migemi, kaika twatangadrane ki tangivelevelane ki umawmase; alaiyasi singikai ki tangivelevelane ki umawmase, ku migemi kaika patenganenga ka migemi.

⁷ Ku tangimiane laka ngitwatumane? Ku tangimiane yai ku swa Iseraylri kai maka wamalra ku silasilape lini, amaanilringa kudra pilri ki Twaumase ku tabeekele ka laumawmase ku kiadringai; ku drumane ka laumawmase kai twamanemane si kilalra ku tadawlane ki Twaumase.

⁸ Mararaamau ku taiyane kai ki Sisiu, “Ku Twaumase pakasalregesege ki kidremedreme lini; pakela kaiasasane, kai maka wadrele ku maca lini, kai maka kialalra ku calringa lini.”

⁹ Ku Davidi la mialri iyanga kai: Kwi lalasu ani ulrabuku lu ikai ki tangiakanekaneanane, si kipwalra; kwi lalasu ani tubakebake, si kipathavungu!

¹⁰ Ani kadradrimiti ku maca lini, si kai maka drele; kwi lalasu ani lukwane si kacukulunga, kakadrwa ku talikaiyane!

¹¹ La lri kivaga ku: Ku swa Yuda lu pamama pudrapale si tubakebake, la kamudunga? Ini! Asi lwiyane ku tapasalrivane lini, mwa lebe ku sapalribulane makakai ki sakamaelanane ka umawmase, ku lrika apathalrane ki swa Yuda si kisamula.

¹² Ku tapasalrivane ki swa Yuda mailuku si baai ki yakawmasane ku makaalra ka akaesadhane; kudra uramane ki abake lini pakaesailringa ki sakamaelanane ka umawmase. Lakamani, kai swa Yuda luiyasi makanaelre yadringi ikai ki sapalribulane ki Twaumase, kai lrika mailuku ku makaakalra ku akaesadhane?

Palribulu ki sakamaelanane ka umawmase ku Twaumase

¹³ Kaiasasane lri papiaku numiane ka sakamaelanane ka umawmase kawriva: Kudra nisikawlanaku papia ki sakamaelanane ka umawmase, lri tara tukucingalraku kai awnganeli.

¹⁴ Alau lri dulrwaku papathalra ki sakacekeleli si aru kisamula ku kidremedreme lini, sakai kikai si palribulu ikai liniane ku la tapiya ku umawmase.

¹⁵ Alaiyasi kicilri kwi lalasu la makakadalru kai yakawmasane ki Twaumase, kudra lalasu lu kitarumaranga, ku wapacainga ku umawmase kai lri malranga ku niake?

¹⁶ Alaiyasi malrane ku aswalalanga ku nilrevegane ku milrikinku si baai patarumara ki Twaumase, ku la nilrevegane patuelrenga lri mialri ka nipatarumaranenga baai iniane. Alaiyasi la malrane ku balace ki angatu si baai patarumara ki Twaumase, adravane ku la ricingi nipatarumaranenga baai ki Twaumase.

¹⁷ Yakai kudra la kiacelra ku ricingi ki angatu ka ulrive, la pwa cungulu arakai kudra singiubulane ka ricingi ki ulrive ka angatu. Kunumi ka sakamaelanane ka umawmase miyaiya numi ki singiubulane ka ulrive ka angatu, kisupisupilri ku ngiaradhekane ka apanianiakane ki swa Yuda.

¹⁸ Lakamani, madha sidreadreadrekase kudra la mia ki ricingi ka kiacelra ka umawmase. Kunumi ricingi numi sikakathane, anu thuru ngitatwadrau? Kai numi ka paulrudru ki balace, balace ka paulrudru numiane!

¹⁹ Alau lri iyasu kikai, “Kudra kicelra ki ricingi, pakai ku aparaisane nakwane.”

²⁰ Kai vaga kikai, kai pasalriu. Kudra celra lini, amani sa kai kasalru kai lalasu; kudra maka kapapedrenge numi acegecege, amani sa kasalru numi. Ai madha ngikalrilrilrigu, pikaiya ku kipapawlringavane ku kidremedreme.

²¹ Kai swa Yuda sakwaka riicingi; kudra kai makalithinga liniane ku Twaumase, lu kidremedremesu ku Twaumase lri kakalithi muswane?

²² Wadreleta patwalai kai, ku Twaumase mathalrai si la matiukuludru. Papia kudra ki la pasakalisi ku tapudrapalane si tubakebake ku umawmase, ku Twaumase matiaukuludru; papia numiane, ku Twaumase mathalrai, lu pacungulu numi panianianiake ikai ki sakialibakeini; mathalrai; lu kai ngimia kwini, lri mialri numi kicelra.

²³ Ku ngwakai ki swa Yuda, alaiyasi la dulru cilri kudra ki kaika takasalrwane lini, lri dulru siwlriwlri mwa kudra ki nasakwanagane lini, asi lwiyane ku Twaumase lri dulru pela cungulu liniane.

²⁴ Kunumi ka sakamaelanane ka umawmase maru cinelranenga ka yaubulane ka ricingi ki ulrive ka angatu, ka kaika nipatupapalrane si kicungulu pikai ki mathariri ki ulrive ka angatu; ku swa Yuda mararaamau kudra nilredrekane ka angatu, ku Twaumase la malra kikai nicelrane ka ricingi ki angatu si pelanga cungulu pikai ki sakwaka ceebe, kaika madwadwai?

Ku thalradhane ki Twaumase salraelre ki sanaka umawmase

²⁵ Laretesane, yakai ku vaeva ka kaika athingalane ka matiasamaimali ka patengane ka sabulrwane, ana thiingale amiaku numiane, amani lu malrigilaku luka taiyaane numi. Kikai patengane ka sabulrwane yai: Kudra nakelrathane ki swa Iseraylri kai lrika palralrawthu, lri ukalava ki sakamaelanane ka umawmase ku akisuswane ki Twaumase makamaelre.

²⁶ Lu kelanga kwini ki vai, lri kipalribulu sanaka swa Iseraylri makanaelre. Mararaamau ku taiyane kai ki Sisiu: Ku lri palribulu lri twalai Ziyungu kainganai; kwi lasu lri mwalra ku pasalrivane ki lamwabaibalrithi ki Yakubu.

²⁷ Ku Twaumase amia kai: Amani kikai ku lrika akiketeketaneli liniane; lukamaninga kwidra, lri pacepaku ku pasalrivane lini.

²⁸ Kai swa Yuda kai tarwamara ki hukuingi, la abadha ki Twaumase, ala kamani ku malra numi ka sakamaelanane ka umawmase ku akaesadhane. Ai, ngwalai ku tapilriane ki Twaumase, la singikai ku palrainginga ki Twaumase ki latamatama, kai swa Yuda sakamiya ka kathalrai ki Twaumase.

²⁹ Asi lwiyane ku tapilriane si migemi ki Twaumase kai lri akabalrithi.

³⁰ Kunadruma kai numi pasalaladha ki Twaumase ka sakamaelanane ka umawmase; kikainga ngwalai ku kaika tapasalaladhane ki swa Yuda, ala ngibalre si kikilibakenga numi ki Twaumase.

³¹ Laka thadaalrane, amani sa kikilibakenga numi, kai swa Yuda kai pasalaladhanga kikai, pakai ku lrika adulrwane lini ikai kikai si mialri kikilibake ki Twaumase.

³² Kai Twaumase waemenge ki sanaka umawmase pikai ki kaika tapasalaladhane, pakai ku apathingalane ku sakialibakeini liniane.

Wadrengedrengere ki Twaumase

³³ Ku migemi ki Twaumase ngiaradhekane turamuru! Ku lrigilane si thingalaneini mwaadringi turamuru! Aneane ku lri dulru pakalalrwai ku taturingaringavaneini? Aneane ku lri dulru papulringalringau ku kadalrananeini?

³⁴ Mararaamau ku taiyane kai ki Sisiu: Aneane ku wathingale ku takidremedremane ki Tamatama? Aneane ku lri dulru atalingikaiyane iniane pelaela ku kidremedremeini?

³⁵ Aneane ku wabaainga ku manemane iniane, si lri kai dulru kai baai sawlri?

³⁶ Asi lwiyane kikai sanaka maneemane twalai iniane, ngwakai iniane, lalri papia iniane. Ku lrigu ani papia iniane, pakeela apalralrawthu! Amingi.