Ruma 10 - Ngudradreadrekadhane Ka Sisiu 魯凱語聖經

¹ Laretesane, makalithaku sidrama turamuru ku adulrwane kipalribulu ki lasakacekeleli, la pasikaikaiyaku kilakikai kai ateateke kitubi ki Twaumase!

² Lri dulrwaku pasudalepe liniane ka kiasamula turamuru papia ki Twaumase, ai kudra kisamulane lini kaika twatangadrane ki patengatengane ka thingalane.

³ Kwi lalasu kai wathingale ku dringelresane ki Twaumase, kiasanu ngitatumadringelrengelrese, la kai pasalaladha ku dringelresane ki Twaumase.

⁴ Ku patengatengane, ku Kirisitu paliakainga ku naika apangimiane ki hulrice, kudra akitumadringelresane makanaelre sanaka masalru iniane ka umawmase.

Kikai sapalribulane nipasikaiyane ki sanaka umawmase

⁵ Patharukai ki ngwakai ki tapaluludane ki hulrice si angimiane kadringelrese ka umawmase, ku Musi naamianga kikai pacase, “Kudra paluludu ku drekase ki hulrice ku umawmase, lri ngwalai ki hulrice panianiake.”

⁶ Ai, pangukai ku ngwakai ki salrwane si kitumadringelrese ka umawmase, ku Sisiu amia kikai, “Madha ngikakivagavaga iya kai: Aneane ku lri musubelebelenge?” (Maru amiyanga kai, aneane ku lri iluku ki Kirisitu mulebe?)

⁷ “La madha kivagavaga iya kai: Aneane ku lri muswadriadringi?” (Maru amiyanga kai, aneane ku lri ililuku ki Kirisitu pubelenge patwalai ki wapacai?)

⁸ Ku pacugane kilakikai vaga amia kai, “Ku sabulrwane ki Twaumase kai wadaili muswane, yakai ki ngudwisu, yakai ki kidremedremesu.” Wadulru madu iya kai, yadringi ki pelaelaela nai kudra ngwakai ki “salrwane” ka sabulrwane.

⁹ Alaiyasi kwi ngudwisu la pelaela ka Tamatama ku Yesu, si kasalru ku kidremedreme ala ka pasiaelane iniane patwalai ki wapacai ku Twaumase, lri dulrusu kipalribulu.

¹⁰ Amani sakasalru kai kidremedremeta, ala kitumadringelreseta ka umawmase, amia kai pelaela ku ngudui, ala kipalribulu.

¹¹ Kai Sisiu amia kai, “Ku masalru iniane kai lri kasalivalrau.”

¹² Kikai vaga kai ku taiyane amanimani ki sanaka umawmase, asi lwiyane kadrwa ku taapakakaelane ki swa Yuda si sakamaelanane ka umawmase; ku Twaumase Tamatama ki sanaka umawmase, lri pakakaalra subulrubulru baai ki sanaka kiatubi iniane ka umawmase.

¹³ Mararaamau ku taiyane kai ki Sisiu, “Sanaka kiatubi ku nagane ki Tamatama ku umawmase lri tara kipalribulu.”

¹⁴ Ai, kwini lalasu kai masalru, ara maka dulru kitubi iniane? Lu kai kilalra, ara maka dulru kasalru? Lu kai patululu pelaela, ara maka dulru kilalra?

¹⁵ Lu kai kisikawlu, ara maka dulru patululu pelaela? Mararaamau ku taiyane kai ki Sisiu, “Ku tarapelaelaela ku vaga ki Twaumase, ku tapudrapalane lini matharirilriinga!”

¹⁶ Ai, kaika lri tarumara sanaka umawmase kai ki hukuingi. Ku Isaiya naamianga kai, “Tamatama, aneane ku lri kasalru kai patulutululu nai kai vagasu?”

¹⁷ Lu drelane kai salrwane twalai ki kialalra kainganai, kai kialalra laka twalai ki vaga ki Kirisitu.

¹⁸ Ai, lri kivagaku: Kwini lalasu tengane ka kaiyana kialalra ku vaga ki Twaumase? Lri tara ka kialalranga. Mia ku taiyane kai ki Sisiu: Ku lingau ki lalasu salraelrenga kai kawmasane; ku vaga lini padarurunga ki sanaka yakainu kai kawmasane.

¹⁹ Lai lri kivaga naku: Ku swa Iseraylri tengatengane ka kai wathingale? Ku aswalalanga, ku Musi arakai ku vaga ki Twaumase tubalre ki kikai ki mendai: Lri arakaiyaku ku “kaiyana akawkawlu” ka umawmase, ku lrika apathalrane numi, si la arakai ku takukulrungu ka lakuni si pangiracuku ki lisiane numi.

²⁰ Ku Isaiya arwa kagarange pelaela ku vaga ki Twaumase iya kai: Lri pakidringadhaku kudra kai wasilape nakwane, si adrelane papia kudra ki kai kiatubi nakwane.

²¹ Ai patharukai ki swa Iseraylri, kwini lasu amia kai: Twaraketaku ku vai taale ku alrima, ku lrika amakakathariraneli kudra ki tarabaebaebalre kakecenge ka laumawmase.