Ruma 1 - Ngudradreadrekadhane Ka Sisiu 魯凱語聖經

¹ Pawruaku ka sasiakawlu ki Kirisitu Yesu, ku Twaumase wapilri nakwane tunisikawlane, si pawkalrivili sikawlu nakwane ku apelaelane ku hukuingini.

^2-4 Kikai hukuingi ikai kunadruma Twaumase ka pangwakai ki layuginsiaini si pikai ki Sisiu ka pinalraingane, ku taiyane patharwakai ki Lalakeini ka Tamatamata ka Yesu Kirisitu. Singikai ku takaumawmasaneini, mwabaibalrithi ki Davidi; singikai ku takabulane taka Twaumasananeini, ku Twaumase patwalai iniane ki tapacadhane pasielane, la pangukai ki pukuini pathingalane kaamani ku Lalake ki Twaumase.

⁵ Ngwakai iniane, tarwamaraku ku mwakalrivili ku puku, si pasikai ku naganeini kitunisikawlane, pakai ku amaililukane ki lakuni ka laumawmase pakisusu kipawtenga iniane.

⁶ Kikai mialri ka kiapaelre numi ka la yakai Ruma, ka kiapilri ki Twaumase si ka swakainga ki Yesu Kirisitu ka umawmase.

⁷ Wapacasaku sukubu numiane makanaelre ka yakai Ruma, ka kilibake ki Twaumase, ka nipilriane ka lrika kawkawluini. Ku migemi si sulivatane ki Tama ka Twaumase si Tamatama ka Yesu Kirisitu ani baai numiane.

Sakiaseasenane ka inulri

⁸ Ku aswalalanga, lri pangukaiyaku ki Yesu Kirisitu, pasikai numiane kiaseasene ki Twaumaseli, asi lwiyane kwini salrwane numi salraelrenga kawmasane.

⁹ Wathingale ku Twaumase nakwane ala ka ngwalringalringavaku numiane ikai ki inulri. Lri dulru pelaela ala ka patengatengane kai pelaelaelali, pakaelreaku kai kidremedremeli pasikai iniane, pelaelaelaku ku hukuingi patharukai ki Lalakeini.

¹⁰ Kiatubiaku ki Twaumase, ku asingikaiyane ku tharirane ku kidremedremeini si pasikai nakwane sudalrane, la nau maka mwa lrikape numiane.

¹¹ Apia kidrelaku si kikawriva numiane, si pakisupilri numiane kai nipatarumarane ki Twaumase pangukai ki niake ki abake, lani aru sapukwane ku takisuswane numi.

¹² Alau nai iyaku kikai, ngwalai ki salrwane numi si salrwaneli, lri dulruta mapakalrumalrumale.

¹³ Laretesane, anithingale amiaku numiane, kingikalralaku nau tara lrikape iya numiane, ai tara yakai ku ngukaili kitelenge, si kai maka ngimia. Ku kidremedremeli yai, nau patwalai numiane sangiluku ki umawmase papia ki Yesu amiaku, mia lu ikaiyaku talidrumane ki sakamaelanane ka umawmase.

¹⁴ Asi lwiyane adravane papiaku ki aneanenga, ku waadilinga ku kakwakudhane, ku kaiyana wadili ku kakwakudhane, ku malrigili, ku kai malrigili, yakaai ku kiameli liniane makanaelre.

¹⁵ Lakamani, ku karacangeli ku apelaelane kai hukuingi numiane ka yakai Ruma ka laumawmase.

Puku ki hukuingi

¹⁶ Kainaku ngwakai ki hukuingi si kainu kalrumale; kikai hukuingi puku ki Twaumase, ka lri palribulu ki sanaka masalru ka umawmase, lri paswala ki swa Yuda, ala lrika sakamaelanane ka umawmase.

¹⁷ Asi lwiyane kikai hukuingi pathingale ku tapangimiane ki Twaumase makakadalru ki umawmase: Twalai ki salrwane pathagili, la alikai ki salrwane tulrepenge. Mararaamau ku taiyane kai ki Sisiu, “Ku ngwakai ki salrwane si makakadalru ki Twaumase ku umawmase lri tara maalra ku patengane ka niake.”

Pasalrivane ki sanaka umawmase

¹⁸ Ku kaika usakenane kaika ulecegane ki umawmase wakabungu ki patengane ka sabulrwane, ku Twaumase la patwalai belenge ki dringelresaneini pathingalane ku elathaneini.

¹⁹ Ku Twaumase pathavungu liniane, asi lwiyane ku patharukai iniane, lri dulru thingale kai umawmase, athingalaneenga ikai cucubungu liniane, ka amani ku Twaumase ka ngiakakamani paathingalane.

²⁰ Ku tawkalrivilane ki Twaumase ka kaika amakadredrelane, amani kwidra palralrawlrawthuini ka maadrau ka puku si taka Twaumasananeini, ku patengatengane twalai ku tabekacane adrelane, amani kai bekaceini ka paathingalane putaluvaivai. Lakamani kai umawmase kadrwa ku atakaiyane.

²¹ Kwini lalasu adravane thingale ki Twaumase, kai walrigu iniane, la kai kiaseasene iniane, makulrungu si matilrase ku takidremedremane lini.

²² Kwini lalasu ngiatatu malrigili, ai ku patengane makulrungu.

²³ Kwini lalasu kai wasukubu ki palralrawthu panianiake ka Twaumase, matuaselringa sukubu ki lasamiamiange, kamani kudra la nipiane patwalrau ku tangimiane ki lri pacai ka umawmase, si laadhadhame, lawaudriwdripi, lawagulagulai.

²⁴ Lakamani, ku Twaumase pangialralrainginga ku takidremedremane ku gathimi lini la pia ku matiadingeselre, la makamanimani pakakudrulru ku kinawmasane lini.

²⁵ Kwini lalasu wacilringa ku patengane ka sabulrwane ki Twaumase, la tarumara kamani ku kaika patengane, kwini lalasu wasukubu pasikai ki nibekacane ka lamanemane, si kai sukubu kamani ki amani ku wabekace ka Twaumase, ku Twaumase lri kidrengedrengere palralrawthu, amingi!

²⁶ Ngwalai kikai, ku Twaumase la pangilralrainginga liniane capangenga ku urikai ki kinawmasane; ku ababai arakai ku wabaebalre ki nipacengecengane maelre ki sawvalai si alra ngitatu pacengecenge ka kakudhane,

²⁷ ku sawvalai la mialri sarare ku nipacengecengane maelre ki ababai si ngitatu pacengecenge ka kakudhane, la mapakelrakelrabe ku urikaiyane ki kinawmasane, ku tara sawvalai la pia ku matiaininu ku tapiane, la tarumara ku akipathavungane, ngwalai kai ki malisi ka kakwakudhane lini.

²⁸ Ku umawmase ku kai kiadremedreme si tarumara ki Twaumase, ku Twaumase la singikainga ki umawmase ku apikaiyane ku ngialisiane ku kidremedreme, si pia kudra kaika apiapiane ka kakudhane.

²⁹ Kwini lalasu swaete ku makaelaela ku kai madringelrese, malisi ka kakudhane, ravane, sapawlisilisiane, la mialri suete ku pathalrane, apapacadhane, akarivwane, apawlibakane, si kai lalasu kiabubuli madrekadrekase. Matwalililisi,

³⁰ kai lalasu malisi ki Twaumase, mapakiaruburubwane, ngiakalrilrigu, ngiatatwadrau, wabeabekace ku ngialisiane, kai mwasakene ki marudrawdrange,

³¹ kadrwanga ku tharirane ku kidremedreme, kai maka pangiamia ku takawrivane, kadrwa ku kilibakane, kadrwa ku sakiasapapalrane ku kidremedreme.

³² Kai lalasu wathingale, lu singikaiyane ku padradrekase ki Twaumase, ku paiya ku miyaiya kikai ku umawmase lri pacai iya; ai, kai lalasu kaika ngiakakamani pia kilakikai sikakathane, mialri palraingi ki palrapalra pia kilakikai.