Pilripi 4 - Ngudradreadrekadhane Ka Sisiu 魯凱語聖經

Sabulrwane ki Pawru

¹ Laretesane, amani numi ku kathalraili, mabarengeraku numiane turamuru! Amani numi ku kiragaragaili, ka civareli. Kathalraili ka laretesane, satalwa ki Tamatama si kapapedrenge acegecege.

² Yuadia si Sintiki ka lamali, lri pasapukwanaku numiane ikai adringi ki Tamatama maramaramau ku kidremedreme numi.

³ Lapapapalrali, lri mialriaku kitubi numiane paraluba liniane kai ki tadrusa, asi lwiyane kai lamali ikai ki awngane ki hukuingi natwapapapalra nakwane, si Kelimine, si la drumane ka redelane kaungu kwalrialri, ku nagane kilakikai umawmase pinacasanenga patuelre ikai ki mibu ka niake ki Twaumase.

⁴ Kunumi ngwaladha ku takiparaisane numi ki Tamatama si kirararagai. Lri peela naku kawriva, kunumi yai kiraragadha.

⁵ La pathingalana papia ki laumawmase ku ngisasangatane. Ku Tamatama lri kelanga.

⁶ Nai kakadrwa ku kwalri ki kidremedreme numi; pikaiya ki inulri pelaela ki Twaumase ku urikaikai numi, si arakai ku kiaseasenane ku kidremedreme kitubi.

⁷ Ku baai ki Twaumase kudra walribate ki tathingalane ki umawmase ka sulivatane, lri ngukai ki Yesu Kirisitu, palakebe ki takidremedremane numi.

⁸ Ku bibiilrilinga, laretesane, katakiraraketaana kudra la mathariri si matiadrengedrengere ku awngane. Sanaka patengane, matiausakene, dringelresane, bulane, matiangulwalwadhane, si lrigu ka awngane tukucingalra patuelre.

⁹ Ku tapatwaladhane numi nakwane kibulru, tarumara, kilalra, drele ku taavavagane si kakwakudhaneli, pia pangimia patuelre. Kudra wabaai ku sulivatane ka Twaumase lri tapalra numiane!

Sakiaseasenane ka vaga

¹⁰ Ku taikaiyaneli adringi ki niake ki Tamatama maadrau turamuru ku akiragadhane! Asi lwiyane kaina tarathainu ku tangilribatane, kunumi kaiasasane peaelana numi patarumara nakwane. Ku patengatengane, sakwa kakaalithi numi nakwane, ai kai maka yakai ku tapathingalanane numi.

¹¹ Lu iyaku kikai kawriva, kaika ngwalai ku takawramaneli sanaka maneemane; wathingalenga naku kitwalrau si ngulwadhane ikai ki tangimiane.

¹² Wathingalaku panianiake ikai ki matiakukuru, la thingalaku panianiake ikai ki maesaesaesai. Wamalranga naku, ku tapiapiane, adravane lutumatumane ikai kidruanga, ku ngiaradhekane, ku pakakadrwa, ngwalwadhanaku patuelre.

¹³ Satalu kwidra wabaai nakwane ku puku ka Kirisitu, wadulrwaku kitwalrau tunagame sanaka tangimiane.

¹⁴ Ai, sa kipakwalrialriaku, wakela numi paralubu nakwane, kikai yai mathariri.

¹⁵ Wathingale numi patuelre ka swa Pilripi, sa pathagilaku pelaela ku hukuingi, matwasaku Makidunia, sakamani kwidra kathane ku kiwkai numi ka paralubu nakwane, kiadrulru numi ku akaesadhane si asipunaneli.

¹⁶ Ikai Tisaruniki, kaika kingivavaale, sana ikai ku urikaili, wakela numi paralubu nakwane.

¹⁷ Kainaku ka marau ku manemane ku akibaadhane, anatumane la kisuete si puteedrana amiaku numiane, si mwadringi mwa ki ciwbu numi.

¹⁸ Amani kai kudra sapelaelane ku baai numi ku saceacebe patuelre; ku la baai numi walribate ki urikaili, ku Ipahurudituse atalingikaiyane numiane iluku kai makaalra ka saceacebe, mia ki sangwalreme ka sapasangulrelremane, ka kiragai ki Twaumase ka sapatarumarane ka lamanemane.

¹⁹ Ku Twaumaseli lri singikai ku tapikaiyaneini adringi ki Yesu Kirisitu ku makaalra ku akaesadhane si baai numiane ku urikai numi patuelre.

²⁰ Ku lrigu ani papia ki Tamaita ka Twaumase, pakela apalralrawthu. Amingi.

Bibiilrilinga ka vaga

²¹ Ai iyanga ki swa kai ki Yesu Kirisitu ka lasinzia. Si kikai yakai nakwane ka laretesane ai la iyaiya numiane.

²² Makanaelre sanaka sinzia, inilringa ki yakai ki daane ki tinuhika ki swa Ruma ka laumawmase, ai amiamia numiane makanaelre!

²³ Ku Tamatama ka Yesu Kirisitu ani baai ku migemi numiane!